Hatutan.com, (24 Outubru 2025),Díli—Dirijente sira iha Rádiu Telvizaun Timor-Leste, Empreza Públika (RTTL,E.P) komesa lansa senáriu foun atu dezvia fó prejuízu ba Estadu iha projetu servisu fornesimentu kombustivél ne’ebé kazu ne’e tama ona iha faze invrstigasaun husi Ministériu Públiku (MP).

Lee Mós: Kazu Projetu Fornesimentu Kombustivél no Manutensaun Karreta RTTL,E.P, Arguidu Na’in-rua ho Sasin Ida Presta Tan Deklarasaun iha MP

Estasaun kombustivél Mãe da Graça iha Dili.

Desizaun ne’ebé Prezidente Konsellu Administrasaun RTTL,E.P, Elizeu Isaac Fernandes foti hodi  indika empreza Mãe da Graça sai fali vensidor mézmu  la prienxe rekizitu hodi manan projetu fornesimentu kombustivel ba RTTL,E.P deskonfia iha tendénsiu abuzu podér, korrupsaun  no fó prejuízu ba Estadu.

Ho nune’e, atu evita la hamosu prejuízu ba Estadu iha projetu fonesimentu kombustivél, maka daudaun ne’e, RTTL,E.P deside “pendente” hela  pagamentu ba empreza fornesidor kombustivél Mãe da Graça, mézmu Mãe da Graça rasik submete ona invoice pagametu fulan-neen nian dezde fulan-Maiu 2025 to’o agora.     

Tuir informasaun hosi funsionáriu ne’ebé halo knaar iha RTTL,E.P no husu atu labele públika nia identidade hateten, servisu fornesimentu kombustivél  husi empreza Mãe da Graça, seidauk halo pagamentu fulan-neen (6) dézde fulan-Maiu 2025 to’o ohin loron.

“Tuir ha’u rona katak seidauk selu, no autóridade judisiál balun dehan bá RTTR labele prosesa lai pagamentu hodi hein prosesu judisiál nian remata mak sira prosesa pagamentu fali,” fonte hosi RTTL,E.P ne’e infroma bá Hatutan.com,  Sesta  (24/10/2025).

Nia informa mós katak,  dézde fulan-Maiu to’o agora, kuaze fulan-neen ona,  invoice  hosi empreze Mãe da Graça hatama ona,  maibé seidauk halo pagamentu.

Hatutan.com  konfirma  kedas ho jerente Jerente Kompañia Mãe de Graça Unipesoal Lda, Giovanio M.F Gomes, rekñese  fulan-neen ona seidauk halo pagamentu.

“Sim! Seidauk halo pagamentu, maibé ida-ne’e ha’u tempu laiha atu halo komentáriu bá ida-ne’e,”  Giovanio M.F Gomes hateten.

Hatutan.com konfirma  informasaun katak dézde fulan-Maiu to’o agora kuaze  fulan-neen ona invoice hira mak hatama ona no hira mak prosesa ona ka halo ona pagamentu, maibé  Giovanio M.F Gomes lakohi fó komentáriu.

Iha  tuku 13:51 Otl,  Hatutan.com konfirma mós  ho  Diretór Finansas RTTL,E.P, Emanuel da Costa Soares, kona-bá asuntu hanesan, maibé lakohi fó komentáriu no  nia rekomenda atu husu ka halo konfirmasaun direta deit ho Prezidente RTTL,E.P  Elizeu Isaac Fernandes.

“Ida-ne’e imi bá komfirma ami nia prezidente de’it, nega,” Emanuel da Costa Soares hateten tan.

Iha tuku 13:54 Hatutan.com  kontaktu  Prezidente RTTL,E.P,  Elizeu Isaac Fernandes hodi konfirma kona-bá fulan-neen ona seidauk  halo pagamentu  bá  empreza Mãe da Graça, informa katak laiha koñesimentu.

“Halo ne’e ho sé, nusá-ne’e?  ha’u han meiudia hela, ne’e ha’u la hatene ida,” Elizeu Isaac Fernandes hateten liuhosi kontkatu telefone.

Jornalista: Marcelino Tomae