Hatutan.com, (06 Novembru 2025), Díli-Membru Polísia Nasionál Timor-Leste (PNTL) nain-ida, Superintendente Asistente Polísia ho inisiál AQ  deskonfia falsifika dokumentu veteranus to’o hetan grau 8 a 14 iha Munisípiu Lautem.

Autoridade Polísua fó sai ba públiku kona-bá prosesu membru PNTL na’in-ida ne’ebé deskonfia falsifika dokumentu veteranu. Foto/Juvinal Cabral dos Santos

“Kazu falsifikasaun dokumentu veteranu iha Munisípiu Lautem nian, despaixu tun ona ba Diresaun Servisu Investigasaun Kriminál (DSIK), saida mak ita halo sei tuir planu investigasaun  ne’ebé iha. Naturalmente, ita sei buka testemuña sira inklui mós ba iha Komisaun Verifikasaun Veteranu iha Munisípiu Lautem mak ita haree, ita seidauk  halo konkluzaun ba kazu ida-ne’e tanba foin simu despaixu,” Portavós interinu PNTL Superintendente Asistente Polísia Mouzinho T. Correia, informa ba jornalista iha Villa-Verde, Díli, Kinta (06/11/2025).

Portavós PNTL ne’e afirma, autoridade seguransa notifika ona ema na’in-rua bazeia ba keixa ne’ebé submeter husi parte sira iha kuarta, 05 fulan-Novembru tinan 2025.

“Iha tempu badak ekipa ida sei ba Lautem hodi rekolla tan informasaun husi parte relevante sira. Tuir relatóriu membru  Polísia ho inisiál AQ provizoriamente akuza ida de’it mak naran iha despasu ne’e,” Mouzinho T. Correia hateten.

Informasaun ne’ebé Hatutan.com rekolla fontes  balun katak, prosesu la’o ona horseik foti ona vitíma nia deklarasaun no sasin, depois mak  sei  bolu  suspeitu ne’ebé fasifika dokumentu veteranus to’o hetan grau  8 a 14 iha Munisípiu Lautem.

Jornalista: Juvinal Cabral dos Santos