Hatutan.com, (19 Novembru 2025), Díli— Komisaun Anti-Korrupsaun (CAC-sigla portugés)  mós sente dúvida no sei halo verifikasaun direta ba projetu konstrusaun Edifísiu Sentrál Rádiu Televizaun Timor-Leste, Empreza Públiku (RTTL.E.P) ne’ebé paradu.

Lee Mós: CAC Sei Halo Averiguasaun Bá Projetu Konstrusaun Edifísiu RTTL,E.P Ne’ebé Deskonfia iha Abuzu Podér no Korrupsaun

Dezeñu Edifisiu foun RTTL,E.P nu’udár legacy husi Governu da-ualu (8). Foto/Espesiál

Adjuntu Komisáriu CAC  bá  asuntu Prevensaun no Sensibilizassun, Rosário Salinha bá Hatutan.com liuhosi telefe, Kuarta (19/11/2025),  hateten se projetu konstrusaun bá   edifísiu  sentral RTTL,E.P paradu ona,   ekipa prevensaun husi CAC  sei tun halo   verifikasaun.

“Ha’u sei  haruka ekipa  hodi tun halo verifikasaun, tanba  saída maka  konstrusaun ne’e paradu, no atu halo dezeñu foun, tanba  dezeñu tuan ne’e parese gosta ona osan lubuk ona,” Adjuntu Komisáriu CAC  bá Prevensaun no Sensibilizassun, Rosário Salinha Araújo hateten.

Nia esplika, sei iha indísiu ruma bá konstrusaun Edifisíu Sentrál  RTTL, E.P,  reponsabilidade bá CAC ne’e ténke halo  médida prevensaun. Tanba ne’e, CAC sei  halibur informasaun sira kona-bá razaun saída maka empreza internasionál PT Aulia Multi Sarana  hakarak retira.

“Ami   buka tuir kona-bá  razaun kompañia dada aan fali tanba saida, ida-ne’e maka ita sei  haruka  ekipa tun iha terrenu hodi buka tuir,” nia afirma hodi dehan tan katak  agora ekipa sei halo verifikasaun iha  Munisípiu Aileu  no sei kontinua bá Metinaro, tanba ne’e  semana oin ekipa  sei tun fali bá konstrusaun Edifisíu Sentrál RTTL,E.P nian.

“Ha’u bele dehan katak tempu badak ha’u sei koloka ekipa tun bá hodi halo verifikasaun bá konstrusaun ne’e,” nia afirma.

Fó hanoin fila fali katak, projetu konstrusaun edifisiu sentrál Radiu Televizaun Timor-Leste, Empreza Públika (RTTL,E.P) ho kustu total US$3,760,405.00 neʼebé ezekuta husi kompañia internasionál PT Aulia Multi Sarana husi Indonézia la’o atraza to’o dada aan deit.

Projetu ne’ebé sai hanesan legacy husi Governu da-ualu (8) liuhusi Ministériu Asuntu Parlamentár no Komunikasaun Sosiál (MAPKOMS) no ezersísiu estra-ordináriu husi Prezidente Konsellu Administrasaun RTTL, E.P altura ne’ebá José António Belo “Taraleu”, konsege hala’o nia lansamentu ka hatuur fatuk-inan, husi Primeiru-Ministru (PM), Kay Rala Xanana Gusmão iha loron 19 fulan-Dezembru tinan 2024.

Sura husi loron serimónia hatuur fatuk-inan to’o agora empreza internasionál husi Indonézia, PT Aulia Multi Sarana, seidauk hatuur nia fundasaun ka fondasi no la hatudu esforsu ba mobilizasaun ekipamentu iha terrenu konstrusaun tanba empreza enfrenta difikuldade no prejudika progresu konstrusaun la’o tuir nia kontratu servisu.

PT Aulia Multi Sarana lori sai ona sasán balu iha terrenu projetu konstrusaun edifísiu sentral foun RTTL,E.P. Foto/Dok.Marcelino Tomae

Edifísiu sentrál RTTL,E.P nian ne’e tau naran Francisco Borja da Costa iha andar haat (4) kompletu ho estudiu rádiu ho televizaun, fatin servisu ho ezekutivu, ho totál administrasaun no jornalista na’in-600.

Iha andar da-haat leten ne’e fatin sorumutuk ho naran auditóriu Nino Konis Santana ho kapasidade akomula ema na’in-1000.

Iha fulan-Outubru tinan 2023, UNDP lansa konkursu dezeñu ho site assessment no hafoin iha fulan-Jullu tinan 2024 no fulan-Agustu 2024 hetan aprovasaun bá dezeñu husi Ministériu Obras Públika (MOP) depois lansa kedan bá konsursu internasionál hodi hetan kompañia internasionál husi Indonézia PT Aulia Multi Sarana hanesan manan na’in ba konkursu internasionál ne’e ho totál kustu ba projetu ne’e $3,760,405.00.

Iha akordu neʼebé estabelese ho parte sira, liuliu UNDP no Governu Timor-Leste liuhusi Sekretáriu Estadu Komunikasaun Sosiál (SEKOMS) iha mandatu Governu da-sia (9) nian ne’e, kompañia PT Aulia Multi Sarana kompromete atu hatama nia ekipamentu rasik, modernu no sufisiente, maibé realidade PT Aulia Multi Sarana aluga de’it eskavadora ida ho karreta baskulante rua (2) ka tolu (3) husi empreza nasionál TINOLIN, Lda, maibé to’o agora fasilidade sira ne’e la estasiona ona iha fatin projetu, inklui terrenu projetu nian la hatudu progresu no paradu totál.

Molok implementa projetu ne’e, UNDP ho Governu Japaun hasai ona osan hodi kontrata  empreza NIPPON KOIE halo estudu no  teste soil ka soil test bá rai ba projetu konstrusaun edifísiu sentrál foun Rádiu Televizaun Timor-Leste, Empreza Públika  (RTTL,E.P).

Jornalista: Marcelino Tomae