Hatutan.com, (27 Novembru 2025), Díli-  Prezidente Repúblika José Ramos-Horta, Kinta (27/11/2025), promulga ona Orsamentu Jerál Estadu (OGE siglá portugés)  tinan 2026 ho montante billaun US$2,291. 

Lee Mós: OGE 2026 Billaun US$2,291 Aprova iha Finál Globál, FRETILIN ho PLP Vota Abstensaun

Prezidente Repúblika, José Ramos-Horta. Foto/Zita Menezes

Prezidente Repúblika José Ramos-Horta, hateten hafoin simu  Lei OGE 2026 husi  Prezidente Parlamentu Nasionál (PPN), Maria Fernanda Lay iha Kinta-ne’e, nia parte direita promulga kedan tanba durante ne’e nia akompañia hela prosesu debate OGE 2026 iha Parlamentu Nasionál.

“Ohin, ha’u simu Prezidente Parlamentu Nasionál Maria Fernanda Lay ne’ebé entrega lei orsamentu Jeral Estadu 2026, ohin kedan, iha nia oin ha’u asina tiha ona, katak promulga tiha ona,” Ramos-Horta informa bá jornalista sira iba Palasiu Prezidensiál.

Xefe Estadu afirma, tanba nia  akompañia prosesu OGE 2026 iha fulan ida nian laran , ida-ne’e mak loloos prezidente ida tenke halo.

“Debate la’o  daudaun, primeiru OGE Governu bá Parlamentu Nasionál ne’e fulan Agostu hahu kedan ona, depois tama ho tama ha’u iha kopia OGE no ha’u akompañia, entaun ha’u haree laiha problema konstituisionalidade, ha’u la presiza haruka bá ha’u nia jurista sira, ha’u mós hatene, entaun haree liña jeral orsamentu nian detallu balun, ha’u konkorda ne’ebé alokasaun orsamentu sira ne’e,” Xefe Estadu afirma.

Tuir nian haree ezekusaun orsamentál iha tinan 2025  makaas iha área  infraestrutura hanesan estrada nasionál no estrada rural, eskola no mós kanalizasaun bee iha setór agrikultura no mós telekomunikasaun.

“Buat sira ne’e ha’u lee hanesan ema ne’ebe hatene Lee orsamentu Jeral estadu, tanba ne’e mak kuandu Prezidente Parlamentu Nasional lori mai ha’u konese tiha ona, no ohin kedan ha’u asina para lalika lakon tan tempu,” tenik PR Ramos-Horta.

Tuir Prezidente Repúblika nia haree bá OGE 2026  laiha problema ho orsamentu ne’ebe aloka bá iha setór produtivu sira.

Jornalista : Zita Menezes