Hatutan.com, (10 Dezembru 2025), Díli-Polisia Nasionál Timor-Leste (PNTL) liuhusi Diresaun Tranzitu Rodoviariu lidera husi Xefe Departamentu  Koordensaun Jestaun Risku Formasaun Edukasaun Sivíka, Superintendente Asistente Polísia, Domingos Sarmento Gama, ho ekipa halo operasaun ba loja sira iha Kapitál Díli hodi avizu no alerta ba loja nain sira koloka pesoál estasionamentu iha loja oin hodi regula transporte sira. Nune’e, evita engarrafamentu tráfiku.

Autoridade Polísia halo konfirmasaun ba loja sira iha Díli laran atu funsiona pesoál estasionamentu iha loja oin hodi regula transpote sira, Kuarta (10/12/2025). Foto/Juvinal Cabral dos Santos

“Ita nia emprezariu sira ne’e haruka tiha ona ninia pesoál ida kada loja ba iha seguransa rodoviariu tranzitu nasionál hodi partisipa iha treinamentu kuaze loron tolu para atu sai hanesan  pesoál  estasionamentu, realidade loja nain sira la koloka pesoal sira ne’e hodi hala’o servisu atua transporte sira ne’ebé estasiona iha loja oin sira,” Superintendente Asistente Polísia, Domingos Sarmento Gama, ba jornalista sira hafoin atividade operasaun fahe informasaun kontrola estasionamentu sira iha loja sira parte Audian, Díli, Kuarta (10/12/2025).

“Ita uza tempu no uza enerjia atu fó treinamentu ba sira atu bele ajuda  estasionamentu iha kapitál Díli. Ne’ebé momentu lori bá ne’e sira nia patraun mak nia ema ida-idak ba iha ne’ebá treinamentu  no durante ne’e la implementa.”

Nia hateten, governu mós kestiona tanba mosu engarrafamentu tráfiku númeru boot tebe-tebes atraves liuhusi Komandu Jerál hato’o ba Diretór Diresaun Tranzitu Seguransa Rodoviária Nasionál hodi ohin loron implementa.

Autoridade Seguransa  ne’e afirma, tuir loloos ne’e engarrafamentu sira hanesan devia la akontese, maibé tanba de’it kondutór sira konsensia ne’e la iha mak mosu engrafamentu.

Superintendente Asistente Polísia, Domingos Sarmento Gama, fó ezemplu hanesan loja Hadomi Familia sira nia pesoal estasionamentu ba tuir tiha treinamentu, maibé nia patraun haruka nia ba hiit fali sasan.

Autoridade Seguransa lamenta tebes bainhira nain ba loja sira la koloka nia pesoál  hodi kontrola estasionamentu mak mosu engarrafamentu tráfiku iha loja oin sira ne’e.

“Bazeia ba deklarasaun ne’e ita halo relatoriu ba iha Ministeriu Komersiu Industria (MCI-sigla portugés) para haree fali asuntu ne’e”, Xefe Departamentu  Koordensaun Jestaun Risku Formasaun Edukasaun Sívika, Superintendente Asistente Polísia, Domingos Sarmento Gama esplika.

Iha fatin hanesan, responsavel Loja Hadomi Familia Domingos, rekoñese nu’udar responsavel ba loja  iha Audian ne’e dalaruma mosu engarrafamentu tráfiku nune’e   fatin estasionamentu   ba kustumer sira prepara ona, maibé ba karreta nia mak sira seidauk prepara.

“Kliente balun mai ita tenke obriga mak para tuir parajen ne’ebé ami prepara,” nia hateten.

Responsavel ne’e dehan sira mos preukupa ho estasionamentu maibé sira nafatin buka maneira hodi koloka tuir motór iha estasionamentu, maibé ba futuru sira sei hadi’a di’ak liutan problema ida ne’e.

Jornalista: Juvinal Cabral dos Santos