Hatutan.com, (10 Dezembru 2025), Díli-Polísia Nasional Timor-Leste (PNTL) liuhusi Diresaun Servisu Investigasaun Kriminál (DSIK)   lidera husi Superintendente Asistente Polísia Mouzinho T. Correia, hamutuk ho Polísia Sientifika Investigasaun Kriminál (PCIC), Forensik no Servisu Migrasaun, Kuarta (10/12/2025), tuku 15:00 Otl,  halao inspesaun ba atividade empreza Kapitál Venturas Timor (CVT-sigla Portugues) iha andár-lima Torre ETO, Mandarin, Díli.

Lee Mós: Deskonfia Loke Jogu Online, PM Xanana Haruka Taka Lotaria Grand Dragon

Ekipa konjunta halo inspesaun ba empreza CVT iha Torre ETO, Mandarin-Díli, Kuarta (10/12/2025). Foto/Juvinal Cabral dos Santos

Tuir observasaun Hatutan.com iha lokal inspesaun, hatudu katak ekipa konjunta sira to’o iha fatin  empreza CVT hale’u 15:00 OTL no durante inspesaun autoridade polísia tama sala haat ne’ebé komapañia refere uza ba atividade servisu maka; sala primeiru komputadór  marka Dell  ho unidade 52, laptop Lenovu 17, LED ka Layar TV 2, sala Segundu komputadór Samsung  unidade 2, laptop Acer 1, printer Epson 1, sala terseiru komputadór  LG  unidade 16, inklui mós asesoris seluk ne’ebe falun iha kaixa hela no sala dahaat mak jerente CVT nia eskritóriu ne’ebé kompleta ho fasilidade komputadór Samsung 1 no laptop HP 1 Acer 1 iha laran mós kuartu kiik ida ne’ebé monta asesoris eletroniku nian.

Superintendente Asistente Polísia Mouzinho T. Correia, informa ba jornalista sira katak karik publika bele tau atividade ida ne’e hanesan halo inspesaun ba komapañia Kapitál Venturas Timor (CVT-Sigla Portugues).

Hafoin inspesaun autoridade Polísia dada kedas fita polisia nian ka police line ba sala rua ne’ebé komapañia refere utiliza ona ba servisu, sala rua seluk haree katak ekipamentu iha ona laran, maibé seidauk monta no seidauk halo ba servisu, nune’e la dada “police line”.

Biban ne’e autoridade Polísia lori traballadór Timoroan na’in-haat ba halo identifikasaun iha Komandu Jerál Polísia Nasionál Timor-Leste (PNTL) Caicoli no asegura mós pasaporte rua.

Ekipa konjunta halo inspesaun ba empreza CVT iha andár lima, Torre ETO, Mandarin, Díli. Foto/Juvinal Cabral dos Santos

Durante inspesaun ne’e Timoroan ida ne’ebé servisu besik liu jerente ho nasionalidade Singapura ne’e, klarifika liuhusi konversa ho autoridade seguransa katak sira hetan lisensa mak loke atividade ne’e, atividade ne’e sosiu nain tolu mak hamutuk, maibe nain-rua seluk servisu iha estranjeiru. Maibé nia rasik mós la iha koñesimentu kle’an kona-ba atividade refere tanba antes ne’e loke vaga ema kuaze rihun rua (2.000) resin mak mai tuir maibé passa ne’e la to’o  na’in -20.

Tuir observasaun ne’e nota katak iha sala primeiru komputadór monta ho modelu rin ida monta komputador 4 uza keyboard ida de’it no koneksaun ba laptop ida, total komputador marka Dell iha sala primeiru ne’e hamutuk 52, maibé traballador Timoroan na’in-tolu inklui sidadaun estranjeiru mane ida mak halo hela atividade servisu iha laran, mas  komputador seluk mate la uza.

Informasaun ne’ebé Hatutan.com halibur iha lokan inspesaun iha Torre ETO mós katak empreza  Kapitál Venturas Timor (CVT-Sigla Portugues) la’ós empreza ETO nian, maibé empreza seluk ida mak halo sosiu hodi halo arrendamentu ba andar lima iha Torre ETO hodi halo sira-nia atividade. Nune’e, kualkér atividade ne’ebé la’ós tuir lei mak responsabilidade eskluziva husi CVT  la’ós husi empreza grupu ETO.

Jornalista: Juvinal Cabral dos Santos