Hatutan.com, (22 Janeiru 2026), Díli- Ministru Justisa, Sergio de Jesus Hornai informa, Governu sei halo negosiasaun ho empreza Ensul Meci-Gestão de Projectos de Engenharia, S.A atu sosa fali uma andár Dili Financial Business Centre (DFBC) ne’ebé daudaun sei iha prosesu konstrusaun iha área Colmera, Díli.

Uma Andár Dili Financial Business Centre (DFBC) iha hela faze konstrusaun iha área Colmera, Díli. Foto/Dok.DFBC

Ministru Justisa hateten katak nia parte sei rona instrusaun mai husi Primeiru-Ministru Kay Rala Xanana Gusmão kona-bá  desizaun Governu ne’ebé atu sosa uma andár Dili Financial Business Centre (DFBC) ne’e.

“Prosesu la’o daudauk ona iha kedan tinan kotuk, ami halo ona aproximasaun balu, tantu iha servisu Diresaun Jeral Terras Propriedade, Ministériu Justisa nian hamutuk ho Ministériu Obras Públika, para haree took ida-ne’e ninian probabilidade sira halo nusa Ministériu Planeamentu Investimentu Estratejiku,”  Ministru Justisa Sergio Hornai ba jornalista sira iha Palásiu Governu, Kuarta (21/01/2026).

Governante ne’e hateten, tanba obra ida-ne’e halo iha rai Estadu nian, momentu ne’e administra hela husi Governu, rai propriédade pertense ba dominiu  estadu nian.

“Maibé konstrusaun píso (andár) ne’e pertense ba iha privadu, entaun ita konsegé agora daudaun halo hela levantamentu orsamentu hira mak ita atu fó kada píso bele monu ba osan hira depois halo somatoriu ida total ba andár ne’e hira ita sei haree ida-ne’e,” tenik Ministru Justisa.

Nia esplika katak kona-bá teknikamente   MOP  mak sei haree nune’e sei  halo hela koordenasaun ba asuntu ida-ne’e.

Tuir planu Governu nian katak uma andár ne’e sei oferese ba embaixadór foun sira  ne’ebé hakarak harri sira nian embaixadór iha Timor-Leste.

Jornalista: Zita Menezes