Hatutan.com, (23 Janeiru 2026), Díli – Ambiente servisu iha mídia Estatál Rádiu Televizaun Timor-Leste, Empreza Públika (RTTL,E.P) iha semana sira ikus ne’e sai preokupadu uitoan.

Lee Mós: Diskusaun no “Ezonerasaun” KM Ba Prezidente Inkompativel RTTL,E.P Muda Ba Semana Oin

Karreta sira RTTL,E.P nian la bele halo operasaun tanba laiha ona kombustivel. Foto/Marcelino Tomae

Prezidente inkompativel Konsellu Administrasaun RTTL,E.P, Elizeu Isaac Fernandes durante semana ida ona la tama servisu dezde polémika ninia inkompatibilidade iha knaar hanesan dirijente iha Organizasaun Juventude Partidu CNRT (OJP-CNRT) Munisípiu Díli.

Iha internal RTTL,E.P komesa hafuhu malu no alega malu to’o distribui ka haklekar karta konfidensiál ne’ebé iha tendésia alega malu kona-bá situasaun jerál iha RTTL,E.P ne’ebé hato’o ba Sekretáriu Estadu Komunikasaun Sosiál (SEKOMS), Expedito Dias Ximenes ho data 20 Janeiru 2026.

Tuir fontes RTTL,E.P ne’ebé husu atu labele publika nia identidade katak semana ida ne’e nia laran RTTL,E.P enfrenta mós problema laiha kombustivel ba karreta operasionál. Nune’e, hahú Kinta-Sesta (22-23/01/2026), karreta operasionál ida de’it mak halo movimentu tula jornalista sira ba halo atividade jornalistika no karreta seluk estasiona deit iha resintu RTTL nian tanba laiha kombustivel.

Kazu fornesimentu kombustível husi Empreza Mãe da Graça agora dadauk prejudika loos servisu diária RTTL, E.P nian, tanba empreza  Mãe da Graça lakohi ona fonese kombustivel ba RTTL,E.P tanba RTTL,E.P seidauk halo pagamentu ba fonesimentu kombustivel iha fulan hirak ba kotuk to’o agora.

Fontes ne’e hateten jornalista balun mak ho voluntáriu oferta nia karreta privadu hodi transporta fali jornalista sira ba halo kobertura hodi bele sustenta programa notísia RTTL,E.P nian.

Iha Sesta (23/01/2026), parte sira RTTL,E.P liuliu iha redasaun konvoka reuniaun hodi diskute mós problema kombustivel,  maibé laiha dirijente ida brani  foti desizaun, tanba dezde  Segunda-Sesta (19-23/01/ 2026),  Prezidente Konsellu Administrasaun RTTL, E.P inkompativel, Elizeu Isaac Fernandes lá mosu iha resintu RTTL,E.P.

Prezidente Konsellu Administrasaun RTTL, E.P, Elizeu Isaac Fernandes alegadamente abandona nia servisu durante semana ida ona, ho razaun inkompatibilidade kargu. To’o agora, seidauk iha klarifikasaun ofisiál husi nia parte ba membru board Konsellu Administrasaun RTTL,E.P nian.

Informasaun ne’ebé iha katak iha Kuarta, 21 fulan-Janeiru 2026, Xefe Lojistika  RTTL, E.P, Raimundo dos Santos dezloka ba Munisípiu  Covalima, ho objetivu atu hadi’a lampu transmiter no foti mós kombustivel iha transmiter Suai lori mai Dili atu enxe bá karreta sira hodi aguenta halo operasaun.

Karreta operasionál RTTL,E.P nian la bele halo operasaun tanba la iha kombustivel. Foto/Marcelino Tomae

Jeradór ida iha  RTTL,E.P atu granatia ahi lakan bainhira EDTL hamate eletrisidade mós kombustivel maran ona, tanbá iha Sábadu (17/01/2026), bainhira EDTL hamate eletrisidade,  sira lojístika hamoris jerador durante oras rua nia laran to’o kombustivel maran no to’o agora seidauk atesta ka seidauk enxe fali.

Hatutan.com halo ona esforsu hodi  halo konfirmasaun ho Prezidente Konsellu Administrasaun RTTL,E.P,  Elizeu Isaac Fernandes, durante loron tolu tuituir malu, Kuarta-Sesta (21-22-23/01/2026), liuhusi  mensajen WhatsApp, kontaktu telefonika direita iha kedas gabinte  RTTL, E.P,  maibé to’o agora seidauk hetan resposta.

Pesoál gabinete prezidente Konsellu Administrasaun RTTL,E.P nian ne’ebé hasoru malu ho Hatutan.com konfesa katak desde Segunda (19/01/2026), Prezidente RTTL,E.P, Elizeu Isaac Fernandes seidauk tama edifisiu.

“Bainhira prezidente mai ona servisu mak ami kontaktu fali ita-boot mai halo entrevista,” pesoál iha Gabinte Prezidente Konsellu Administrasaun RTTL,E.P ne’e hateten.

Hatutan.com  mós konfirma ho  Diretór Ezekutivu RTTL,E.P, João Guterres da Silva, maibé  nia lia-tun dehan, kestaun ne’e  kompeténsia Prezidente Konsellu Administrasaun RTTL,E.P, Elizeu Isaac Fernandes nian hodi foti desizaun.

“Ida-ne’e imi bá husu bá Prezidente de’it, nia (Elizeu Isaac-Red) maka foti desizaun, bá problema sira hanesan ne’e,” João Guterres da Silva informa.

Iha loron-rua tuituir malu, Kinta-Sesta (22-23/01/2026),  Hatutan.com  halo buka konfirmasaun ho  jerente empreza  Mãe da Graça, Unipesoal Lda, Giovanio M.F Gomes,  maibé husi parte finansas informa katak jerente bá haree rai iha Same atu loke tan estasaun mina  iha Same.

“Ha’u mós ohin mai sira dehan atu sai bá Munisípiu hodi haree rai iha ne’ebá, atu loke tan estasaun ida,   ne’ebé kona-bá fornesimentu Kombustivel bá RTTL,E.P ha’u mós la hatene, tanba ha’u mós ohin foin tama servisu,” nia dehan.

Hatutan.com halo mensajen liuhosi WhatsApp no kontktu direita ba numeru telefone, maibé  la haree no la simu kontaktu  to’o agora.

Sekretáriu Estadu Komunikasaun Sosiál (SEKOMS), Expedito Dias Ximenes, ne’ebé Hatutan.com konfirma hafoin remata media briefing iha Palásiu Governu, Sesta (23/01/2026), hateten, to’o agora nia la hatene  kazu no problema sira iha RTTL,E.P tanba nia seidauk simu relatóriu.

“Ne’e bá husu bá sira RTTL,E.P, tanba sira seidauk hato’o relatóriu mai,” Expedito Dias Ximenes, antigu jornalista no xefe redasaun jornál Novas ne’ebé funda husi matebian Governadór Timor-Timur (Timtim), Abílio José Osório Soares iha   tempu Indonézia ne’e afirma. 

Kona-bá karta konfidensiál ne’ebé hato’o situsaun jerál ba SEKOMS Expedito Dias Ximenes iha loron 20 fulan-Janeiru ne’e, Diretór Ezekutivu RTTL,E.P,  João da Silva Guterres hateten,  informasaun sira ne’ebé ema balun husi RTTL,E.P hato’o ne’e informasaun laloos no imformasaun falsu.

Diretór Ezekutivu RTTL,E.P,  João da Silva Guterres.

“Informasaun ne’ebé ema balun lansa,  iha situasaun atuál ne’e  parte ida refere bá ha’u hanesan Direitor Ezekutivu  ne’e atu dezakrita ha’u nia naran,” João Guterres hateten.

Nia subliña katak, hanenesan Direitor Ezekutivu nia laiha kompetensia atu halo rekrutamentu sá tan atu halo promosaun  bá grau ruma.

“Buat hotu iha ne’e atu uza ha’u nia kompetensia ne’e laiha,  iha ne’e iha prosesu, iha nia dalan, kompetensia bá iha Prezidente Konsellu Administrasaun no membru Konsellu Administrasaun RTTL nian, sira ne’e maka kompetensia desizaun aas liu,” nia dehan.

Nia esplika, kompetensia  nu’udar Diretór Ezekutivu bá RTTL,  hala’o servisu  de’it bá diresaun ne’ebé hala’o, no  mós halo relatóriu bá membru Konsellu Administrasaun RTTL liu bá Prezidente.

Nia afirma, tanba informasaun  ho situasaun bá Konsellu Ministru atu ezonera Elizeu Isaac Fernandes husi Prezidente Konsellu Administrasaun RTTL,E.P,  tanba ne’e maka ema balu tenta lansa imformasaun falsu.

“Maibé ha’u atu hateten de’it katak ha’u servisu tuir de’it estatutu ho regulamentu ne’ebé iha hodi garantia  funsionamentu RTTL bá oin,” nia hateten.

Tuir mai Hatutan.com públika kompletu konteudu karta konfidensiál ne’ebé ema deskoñesidu sira lansa no haruka ba Sekretáriu Estadu Komunikasaun Sosiál (SEKOM), Expedito Dias Ximenes:

Carta confidensial

Hato’o ba : Sua Excelencia Secrtario Estado comunikasaun Social Sr.Expedito Dias Ximenes

Data : 20-Janeiro-2026

Assunto : informa situasaun jeral iha RTTL,ep

Liu hosi biban ida ne’e hakarak informa ba Sua Excelénsia, bazea ba factos ne’ebé iha hatudu katak Sr. João Guterres nu’udar Dirteur Ezecutivo iha instituisaun Radio Televizaun Timor Leste Empresa Publica ladun tau importansia ba instituisaun no hamosu deskriminasaun iha ne’ebé Sr.João Guterres rasik sempre konvoka enkontro gropuizmo iha resinto RTTL talves mos iha nia residensia privada Pantai Kelapa Dili, hodi informa situasaun segredo instituisaun no sabutagem hasoru President Conselho Administrasaun Elizeu Issac Fernandes perante iha RTTL,ep.

Alende ne’e fatin Sr.João Guterres nu’udar mos Diretur Ezecutivo nian sempre halibur grupo balun hodi halo ameasa no fo presaun ba trabalhador sira bainhira halo kritiku hasoru Diretur Ezekutivo João Guterres.

João Guterres mos comete erru hodi halo promosaun ba grau ho dalan illegal iha ne’ebé halo promosaun ba grafizmu sem teste liu hosi vaga internal ruma maybe derepente deit nia uza nia poder hodi ameasa servisu administrasaun atu ezekuta tuir ordem ne’ebé nia hatun.

Situasaun hirak ne’e hotu akontese ho planeado iha ne’ebé Diretur Ezekutivo João Guterres rasik abandona no lakohi atu resolve servisu opperasional nian maibe nia rona liu hosi gropu balun hodi halo ameasa no presaun boot hasor trabalhador sira.

Realidade hatudu iha fulan Desembro por volta tuku 7:30 Sr. Mario Fraga atúal Chefe Departamento Programasaun TV no motorista diretur ezekutivo João Carlos uza transporte Estado RTTL nian hodi ba hemu tua iha liur no fila mai ho kondisaun lanu no altura ne’eba

Sr.Almero Afonso nu’udar chefe redasaun Sesante mos hamrik no konversa hela ho jornalista Manuel Gusmão, maibé derepenti deit Mario Fraga no João Carlos tun hosi karta derita ba husu kedas Sr.Almero Afonso ho lian makas …. No sira nain rua halo kedas agresaun fiziku hasoru Almeiro hodi tuku iha parte kotuk laran no sira tenta buka sasan kroat (arma Branca) atu hakanek maibe Almeiro konsege hala’i ses hosi sira no sira ho lian makas dehan.

Maske situasaun grave ne’e akontese iha resinto RTTL nian mabe Diretur Ezecutivo João Guterres rona maibe lakohi atu buka hatene no resolve situasaun ne’e no husik let deit.

Hahalok at ida ne’e alias PREMANIZMO até agora seidauk rzolve entaun ba oin sei sai ameasa ba trabalhadores sira hotu.

KONKLUSAUN

Ho faktus ne’ebé descreve iha leten demostra katak Dirteur Ezekutivo RTTL no nia gropu tomak durante ne’e komete iregularidade barak no iha mos tendensia ba krimi no faktus hirak ne’e iha konhesemento dereita hosi Diretur Ezekutivo rasik, ho nune’e laiha mudansa rum aba diretur ho kargu xefia balun mak RTTL sei kontinua la’o hakdasak ba oin nafatin no servisu sei la la’o ba oin.

REKOMENDASAUN

Hosi konkluzaun iha leten rekomendasaun ba sua excelénsia atu halo intervensaun dereita hodi halo re-estrutura hod troka diretur ezekutivo, diretur DNIA ,dirtora DNP, chefi redasaun, chefi

departamento programasaun TV, chefi Aprozonamento, no tenki hamosu estrutura foun hodi bele assegura servisu opperasional no kobre atividade dezenvolvimento governu atúal nian.

Husu mós excelénsia atu kria enkontro jeral ida ho karate urjensia hamutuk ho trabalhador RTTL nian hod bele rona dereita prokupasaun hod nune’e bele solusiona problema ne’ebé dadaun ne’e akontese.

Obrigado no comprementos

 Jornalista: Marcelino Tomae