Hatutan.com, (23 Fevereiru 2026), Díli-Autoridade kompetente sira Timor-Leste nian, liuliu Ministériu Interiór ho Servisu Migrasaun, halo daudaun ona investigasaun ba pesoál Servisu Migrasaun ne’ebé deskonfia la fo sansaun ba sidadaun feto ida husi Indonézia ne’ebé overstay.

Diretora Ezekutiva Servisu Migrasaun, Superintendente Xefe Polísia, Natércia Eufrásia Soares Martins. Foto/Juvinal Cabral dos Santos

Overstay maka bainhira ema estranjeiru ida hela iha nasaun ida liu períodu husi sira nia lisensa ka vistu ne’ebé hetan ona. Ida-ne’e maka violasaun Migrasaun nian ne’ebé maka grave, ne’ebé bele hetan kastigu multa administrativu sira US$150.00,  deportasaun no to’o detensaun.

Iha kazu overstay ba sidadaun feto Indonéziu ida ne’ebé viral iha mídia sosiál Facebook, hatudu katak sidadaun Indonézia ka WNI, sigla iha lian Indonézia, overstay no bainhirta hauur iha Postu Fronteira Batugade, Bobonaro, pesoál Servisu Migrasaun la aplika sansaun administrative, maibé tuir informasaun, katak pesoál Servisu Migrasuan ne’e tau karimbu Alerta iha WNI ne’e nia passaporte.

Alerta Servisu Migrasaun nian ba sidadaun estránjeiru sira ne’ebé maka hela nia lisensa (overstay) nu’udart sansaun administrativa ida ne’ebé maka’as, inklui multa ka deportasaun imediata no lista metan bainhira hela liu loron 60.

Alerta ne’e katak bainhira nia tama fali mai Timor-Leste tenke selu multa ho montante purvolta US$150.00, maibé bainhira la selu, maka sei halo termina lista metan ba sidaduan estrnajeiru ne’e atu la tama tan teritóriu Timor-Leste ho tempu determinadu.

“Prosesu investigasaun la’o hela, ita tenke foti medida hasoru pesoál Servisu Migrasaun ne’ebé la aplika sansaun ba WNI ne’ebé overstay,” Ministru Interiór (MI), Francisco da Costa Guterres informa ba jornalista sira iha Ministériu Finansas (MF), Segunda (23/02/2026).

Ministru Interiór hateten, funsionariu Servisu Migrasaun l ida fasilita sidadaun Indonézia passaporte mate liu tiha de’it, la iha sansaun multa, kuandu investiga loloos nia mós sei hetan sansaun.

“Agora Servisu Migrasaun halo hela investigasaun depois mak sira relata mai ita haree to’ok,” Francisco da Costa Guterres hateten.

Iha sorin seluk Diretora Ezekutiva Servisu Migrasaun, Superintendente Xefe Polísia, Natércia Eufrásia Soares Martins, ba jornalista sira iha Ministru Interiór (MI), hateten, informasaun ne’e foin virál Domingo (22/02/2026) iha mídia sosiál, ema barak fahe informasaun ne’e mai liuhusi mensager Facebook no WhatsApp, tanba ne’e hanesan kualidade diretora ezekutiva hola kedas konsiderasaun boot ida orienta  diretores relevante bá hahú forma ona ekipa investigadór ida.

“Hakarak hato’o ba iha públiku katak ne’e la’ós foin mak akontese, maibé akontese kedas iha loron  27 fulan-Janeiru 2026, kala individu balun hatene  informasaun ne’e foin fó sai iha mídia tanba ne’e maluk barak hatutan iha média sosiál. Ida-ne’e importante tebe-tebes ba Migrasaun rasik ha’u lori Migrasaun nia naran hato’o ami nia agradesimentu barak bá iha públiku, komunidade no entidades hotu ne’ebé mak konsidera katak situasaun ida ne’e problema,” Superintendente Xefe Polísia, Natércia Eufrásia Soares Martins hateten.

Nia informa ba públiku kontinua nafatin halo observasaun no fó informasaun mai iha Servisu Migrasaun  atu nune’e bele fó atensaun bá servisu sira ne’ebé mak membru no staff sira halo.

“Ami forma ekipa ida no hahú halo prosesu ida-ne’e, depois prosesu nia rohan ami sei públika fila-fali bá iha públiku para bele akompaña,” Natércia Eufrásia Soares Martins informa.

Diretora Ezekutiva Servisu Migrasaun ne’e hatutan, loos duni katak  pesoal identifika ida-ne’ebé mak suspeita nia komete duni aktus irregularidade ne’e ka lae, sé nia komete duni irergularidade mak iha Leí atu bele prosesa aktus ida-ne’e.

Jornalista: Juvinal Cabral dos Santos