Hatutan.com, (24 Fevereiru 2026), Díli– Polísia Sientífiku Ivestigasaun Kriminál (PCIC-sigla portugés), asegura suspeitu ho inisiál JMR hodi halo indentifikasaun tanba  deskonfia prátika  atividade   meius operandu burla hodi   hasbosok ema   bá  servisu iha Austrália.

PCIC asegura suspeitu ho inisiál JMR tanba deskonfia prátika atividade meius operandu burla hodi hasbosok ema bá servisu iha Austrália. Foto/Marcelino Tomae

Portavós PCIC, Inspetór-Xefe Mário Tavares, bá  Jornalista  sira  nia kna’ar fatin, Edifisiu PCIC  Caicoli,  Díli Tersa (24/02/2026), informa  durante semana ida nia laran, PCIC hala’o servisu no  konsege halo indentifikasaun  bá suspeitu JRM, hahú kedas h onia modus operandu  liu-husi públikasaun iha Tiktok,   konvense vitíma sira atu bele entrega  osan balun bá nia atu  bá trata vítima sira-nia  dokumentu  hodi fasilita  bá servisu iha Austrália.

“Suspeitu JMR ne’ebé maka alegadamente halo atividade burla lori  vitíma sira bá servisu iha Austrália ho prejuiza  ne’ebé vitíma sira ne’ebé maka ho osan montante US$11,000.00,” Portavós PCIC Mário Tavares hateten.

Nia hatutan, suspeitu  JMR  halo modus operandu diferente hodi atrai vitíma  sira  hodi hateten nia servisu hanesan  médiku ida iha HNGV,  maibé ekipa PCIC sira konsege halo konfirmasaun ho médiku  ne’ebé maka  suspeitu utiliza nia naran. Médiku ne’e, iha duni maibé la’ós médiku ne’e maka halo modus operandu iha média sosiál.

Suspeitu JMR  ne’e konvense vitíma sira mós  hodi hateten katak nia hanesan Polísia Militár,  ne’ebé maka halo rekrutamentu bá servisu iha Austrália,  maibé depois  Autoridade  Judisiál    liu-husi servisu informasaun PCIC halo konfirmasaun suspeitu JMR  la’ós  membru husi Forsa Defeza nian.

Suspeitu JMR mós  utiliza modus operandu hodi bosok vitíma sira katak nia oan husi Ministra Solidaridade Sosial no Inkkuzaun, Veronica das Dores, nune’e nia fó garantia bá vitíma sira hodi  tratamentu dokumentu bá servisu iha Austrália

“Suspeitu lohi vitíma sira katak nia hanesan oan husi Membru Govenrnu  ida,  ne’ebé hala’o servisu  hanesan membru Governu nia oan nia maka halo servisu  bá membru Governu refere, tanba hatan komfiansa  ita nia na’i ulun Polítika sira, suspeitu ne’e garantia bá vitíma sira katak  nia bele  haruka ona bá servisu iha Austrália,” nia dehan

Ekipa investigasaun  konfirma ona membru Governu refere katak la’ós nia oan maka Suspeitu JMR, maibé suspeitu maka utiliza meiu ida-ne’e hodi konvense vitíma sira  hodi tratamentu dokumentu bá servisu iha estranjeiru

Suspeitu  JMR promete bá vitíma sira atu viajen bá Austrália  loron 15 Fevereiru 2026, maibé depois nia halo fali aliña seluk ida  nia promete tan  bá vitíma hodi adia bá 19 Fevereiru 2026,  maka aranka bá  Austrália.

Vijilánsia PCIC ho kolaborasaun eskuadra Polísia Dom Aleixo, asegura suspeitu JMR  iha tuku 07:40 iha Suku Bairo-Pite no  suspeitu  aluga  hela karreta Mazda Demio ho númeru matríkula A 28 487. 

Portavós PCIC Mário Tavares, hateten  PCIC foti   suspeitu bazea   bá keixa husi komunidade  no PCIC halo tratamentu no verifikasaun informasaun, buka tuir dadus ne’ebé iha, inklui rekolla informasaun kona-bá suspeitu  JMR konversa ho vítima sira.

Evidénsia ne’ebé iha agora mak identifika karreta ne’ebé Suspeitu JMR utiliza. Vítima sira mós aprezenta prova sira ne’ebé hatudu katak suspeitu promete buat balu bá sira, no sasin husi vítima rasik mak  hato’o keixa hasoru suspeitu refere.

Nia esplika, tuir prosedimentu prosesuál, PCIC sei hala’o prosesu identifikasaun, no prosesu ida-ne’e tenke kumpri antes oras rua (2), hodi garante legalidade no direitu hotu-hotu.

Nia subliña, vítima na’in-rua ho inisiál NS ho IFX hetan prejuízu to’o US$11,000.00. Maski nune’e, PCIC fiar katak vítima seluk  sei ihano suspeitu ne’e la’o la mesak, maibé iha rede ida ne’ebé servisu hamutuk ho nia.

PCIC sei halo auto partisipasaun ba Ministériu Públiku hodi hala’o atuasaun bá inkeritu. Maske nune’e,  la taka dalan bá  PCIC nia servisu rekolla informasaun no prova seluk, hodi submete nafatin bá autoridade kompetente.

Nia dehan, uainhira prosesu inkeritu loke ona, investigasaun sei kontinua nafatin, tanba kestaun ida-ne’e envolve servisu rede ne’ebé utiliza média sira atu konvense komunidade liu-husi modus operandu Burla

Jornalista: Marcelino Tomae