Hatutan.com, (26 Maiu 2026), Díli–  Tribunál Kosta fó ona vistu ka aprova ona dokumentu ba kontratu projetu  konstrusaun terminal pasajeiru Aeroportu Internasionál Prezidente Nicolau Lobato (AIPNL).

Aeroportu Internasionál Prezidente Nocolau dos Reis Lobato, Díli, Timor-Leste. Foto/dok.

Ministru  Transporte no Komunikasaun (MTK),  Miguel Marques Manetelu  durante enkontru entre Govenru Timor-Leste ho parseiru dezenovlimentu iha Salaun Auditóriu Kay Xanana Gusmão Ministériu Finansa, Díli, Tersa (26/05/2026), konfirma  katak semana kotuk Tribunál Konta fó ona vistu ba projetu terminal pasajeiru AIPNL, nune’e iha semana ida-ne’e sei hasai notifikasaun bá kompaña ne’ebé kaer obra konstrusaun terminal pasajeiru refere.

Ministru Miguel  dehan IX governu kontisionál hakarak hahú ho apresiasaun bá Asian Development Bank (ADB), Japan International Cooperation Agency (JAICA) no DFAT Austrália tanba sira fó apoiu finansiamentu bá konstrusaun no alargamentu AIPNL.  Tanba ne’e, presiza hametin liután koordenasaun tanba parte balu husi projetu hahú ona, hanesan área “Air Side” ne’ebé finansiadu husi ADB no obra balu hanesan “parallel taxiway” mós lao hela.

Ministru  Miguel mós espera  bá Ministra Finansas bele konklui lalais ajustamentu sira ne’ebé presiza atu nune’e bele hahú prosesu tenrderizasaun  asesu bá Aeroportu Internasionál Presidente Nicolau Lobato.

“Iha parte DFAT balu ha’u espera katak Ministra Finansa iha tempu badak bele konklui ajustamentu sira ne’e atu nune’e DFAT bele hahú prosesu tenderizasaun bá asesu  bá Aerpoortu Internasionál Prezidente Nicolau Lobato, ne’ebé dala ida tanba obrigadu barak bá JICA  ho Austrália,” Miguel Manetelu hateten.

Iha loron 20 fulan-Maiu tinan 2026, IX Governu Konstitusionál liu husi Ministériu Transporte no Komunikasaun, lansa fatuk dahuluk bá projetu konstrusaun espansaun no dezenvolvimentu Aeroportu Internasionál Prezidente Nicolau Lobato.

Projetu lansa husi Primeiru-Ministru, Kay Rala Xanana Gusmão, ne’ebé akompaña mós husi Ministru Negósiu Estranjeiru no Kooperasaun, Bendito Freitas no Vise-Ministra bá Asuntu ASEAN, Milena Rangel ho Membru Governu, Membru Parlamentu Nasionál, Korpu Diplomátiku no entidade seluk tan.

Fundu bá projetu konstrusaun Aeroportu Internasionál Prezidente Nicolau Lobato ne’e ho apoiu husi parseiru internasionál sira hanesan, Governu Japaun liu husi JICA, DFAT Austrália, ADB, International Finance Corporation (IFC) inklui fundu kontra partida husi Governu Timor-Leste rasik.

Dezeñu integradu bá Aeroportu Internasionál Prezidente Nicolau Lobato, hetan ona aprovasaun husi Primeiru-Ministru, Kay Rala Xanana Gusmão, nune’e bele hahú ninia implementasaun.

Projetu refere iha kontratór tolu no konsultan supervizaun bele to’o lima, tanba obra ne’e iha modalidade fontes orsamentu ne’ebé la hanesan, iha ne’ebé fundu impréstimu husi ADB 18% husi totál kustu bá konstrusaun Pista, APRON, ATC, drainajen no torre kontrolu: Fundu ne’ebé apoia husi JICA sei harii terminal bá pasajeiru: Fundu husi DFAT Austrália nian sei konstrui estrada asesu bá Aeroportu, Kuarentena no sentru saúde.

Bá pista, APRON, ATC, drainajen no torre kontrolu, sei responsabiliza husi Kompañia Estatal Waskita (BUMN) husi Indonézia. Maibé, bá terminal pasajeiru, estrada asesu bá Aeroportu, Kuarentena, sentru saúde no seluk tan, JICA ho DFAT Austrália, ida-idak sei loke tenderizasaun atu bele hetan konsultan hodi bele finaliza DED, nune’e bele avansa bá konstrusaun.

Jornalista: Marcelino Tomae