Hatutan.com, (10 Dezembru 2021), Díli—Assalam FC ho AD SLB Laulara FC obrigadu tenke fahe pontu hanesan iha jornada dalimak Liga Futeból Timorense (LFTL) hafoin impata 3:3.

Ekipa Assalam FC. Foto/LFTL.

Assalam FC iha oportunidade hodi lidera uluk liu hosi hat-tricks jogadór avansadu Hasan Costa (7) iha minutu 7,37 no 49, maibé vitória ne’e tenke nakfilak ba impata.

Notísia iha Relasaun:Emanuel FC Kampiaun ba Segunda Divizaun LFTL Époka 2021

Ho rezultadu ne’e, mantein pozisaun iha zona seguru tabela klasifikasaun provizóriu Liga Futeból Timor Leste, époka ne’e.

AD SLB Laulara FC ho Assalam FC hahú lansa atake ba malu iha minutu uluk jogu hahú. AD SLB Laulara FC halo mudansa ba tátika jogu iha liña defeza, hodi husik Felipe Oliveira (24) iha liña suplente tanba  la fit no muda kapitaun ekipa Nidio  Alves (93) hamaluk Fernando de Carvalho (3) iha defeza sentrál.

Assalam FC haree mudansa ne’ebé AD SLB Laulara FC iha nu’udár  oportunidade atu halo atake hodi bele rekolla vitória.

Tama ba minutu 6, Assalam FC lansa kedan golu ida liu hosi bola falta hafoin kapitaun ekipa AD SLB Laulara FC Nidio Alves (93) halo falta hasoru avansadu Assalam FC Martinho Belo (22), besik área grandeal parte karuk. Hasan Costa ne’ebé ezekuta bola falta ne’e konsege lansa golu ida hodi muda skore ba 1:0.

Ekipa AD SLB Laulara FC, mantein nia ritmu jogu maske falla barak iha liña defeza tanba kapitaun ekipa sempre lakon bola bainhira avansadu adversáriu halo atake. 

AD SLB Laulara FC nafatin halo esforsu liu hosi jogu hodi nafatin iha konsisténsia ba tátika hodi domina bola klaran.

Nidio Alves (93) kapitaun ekipa AD SLB Laulara FC konsege responde golu ida aproveita bola kantu hodi muda skore ba 1:1 iha minute tuir mai.

Hafoin golu, AD SLB Laulara FC koko hadi’a liña hodi halo kombinasaun entre jogadór sira iha liña klaran no defeza atu bele asegura atake hosi Assalam FC.

Ekipa rua mantein sira nia jogu hodi buka oportunidade atu hatama golu. AD SLB Laulara FC halo substituisaun ba nia jogadór hodi hasai Pascoál Ximenes (16) no hatama Jib Mark Freitas (15) atu bele halo balansu ba Assalam nia jogu.

Jogadór Jordão da Silva hosi AD SLB Laulara FC simu kartaun kinur hafoin halo falta ba adversáriu iha liña klaran.

Tama ba minutu 35, jogadór AD SLB Laulara FC Jeremias Baptista (69) lansa tán golu ida hodi muda skore ba 2:1.

Assalam FC mantein nia jogu ofensivu hodi lansa atake ba ekipa adversáriu atu bele ha lo impata no iha duni rezultadu tanba tama ba minute 37 Hasan Costa (7) hatama golu daruak ba nia ekipa hodi halo impata ba jogu ne’e.  Ekipa rua mantein jogu to’o tempu primeira parte remata.

Tama ba segunda parte, ekipa rua nafatin mantein ritmu jogu no buka oportunidade atu bele hatama golu hodi lidera no posível rekolla pontu 3.

Assalam FC halo supreza ba AD SLB Laulara FC liu hosi terseiru golu Hasan Costa (7) iha minutu 49. Hafoin golu ne’e AD SLB Laulara FC halo kedan substituisaun ba nia jogadór iha minutu 52 hodi hasai Jorge Moniz (5) no hatama Felipe Oliveira (24).

Hafoin substituisaun ne’e, AD SLB Laulara FC halo hikan mudansa ba jogadór iha liña avansadu no defeza nune’e hahú domina jogu iha kada liña hodi halo atake ba adversáriu atu bele duni atrazu ne’ebé iha, hodi muda skore iha tabela.

Assalam FC halo substituisaun ba nia jogadór iha liña avansadu hodi hasai Hasan Costa (7) no hatama médiu Romalho Gama (14) ho intensaun bele asegura pontus ne’ebé iha.

Jogadór Assalam FC Emmanuel Tunu (28) simu kartaun kinur hafoin halo falta ba jogadór adversáriu.

Assalam FC kontinua halo substituisaun ba nia jogadór iha liña avansadu hodi hasai Martinho Belo (22) no hatama Derson Ulu (26) iha minutu 65.

AD SLB Laulara FC buka posibilidade atu halo impata liu hosi esforsu ne’ebé iha hodi kontinua halo substituisaun ba jogadór hodi hasai Jeremias Baptista (69) no hatama Luis da Silva (17).

Filipe Oliveira (24) jogadór AD SLB Laulara FC simu kartaun kinur hafoin komete erru hasoru jogadór Assalam FC Emmanuel Tunu (28).

Ekipa AD SLB Laulara FC. Foto/LFTL.

AD SLB Laulara FC kontinua halo atake ba Assalam FC no tama ba minutu 74 kapitaun AD SLB Laulara FC Nidio Alves (93) hatama golu daruak ba nia ekipa hodi halo impata 3:3.

Hafoin golu ne’e, ekipa rua nafatin buka oportunidade atu hadau vitória, maibé nafatin falla tanba kada ekipa sei mantein disipliña.

Jogadór Assalam FC Romalho Gama (14) simu kartaun kinur hafoin halo falta hasoru jogadór AD SLB Laulara FC Alexandro Ima Kefi (21).

AD SLB Laulara FC halo substituisaun ikus iha minutu 89 hodi hasai Luis da Silva (17) no hatama Domingos Ribeiro (22). To’o jogu remata, ekipa rua mantein skore iha tabela no obrigadu tenke fahe pontus hanesan.

Prezidente Assalam FC Hipólito Soares hateten, loloos ne’e Assalam FC iha oportunidade atu rekolla vitória iha jornada dalimak, maibé fallansu hosi liña defeza ne’e la konsentra ba adversáriu nia jogu ikus mai tenke fahe pontu hanesan.

“Ami manan jogu ne’e maibé tanba liña defeza la antesipa adversáriu nia jogu ikus mai tenke impata,” Hipolito soares, hateten.

Treinadór AD SLB Laulara FC, Efrem Jerónimo hateten ekipa rua iha jogu di’ak, nune’e fahe pontus hanesan.

Jornalista: Vito Salvadór