Hatutan.com, (12 Marsu 2026), Díli-Komisaun Revizaun, Supervizaun no Fiskalizasaun ba prosesu rekrutamentu kadete Polísia Nasionál Timor-Leste (PNTL) 2025, identifika iha dokumentu sira rekrutamentu nian, hatudu katak Polísia nia oan na’in-71 no veteranu nia oan ka jerasaun patriota na’in-72 mak kontempladu iha lista laran nu’udár prioridade atu konitnua ba faze teste médiku.

Lee Mós: Segunda, Komisaun Ba Revizaun Rekrutamentu PNTL Halo Primeira Reuniaun

Prezidente Komisaun Suprevizaun no Fiskalizasaun ba revizaun rekrutamentu PNTL tinan 2025, Paulo Assis Belo. Foto/Juvinal Cabral dos Santos

Prezidente Komisaun Suprevizaun no Fiskalizasaun ba revizaun rekrutamentu Polísia Nasionál Timor-Leste (PNTL) tinan 2025,  Paulo Assis Belo, Kinta (12/03/2026), informa ba jornalista sira katak,  durante semana ida ho balun komisaun ba  revizaun halo servisu no  identifika entre na’in-400 ne’ebé kontinua ba teste médiku ne’e, kontempla  Polísia nia oan na’in-71,  no veteranu nia oan na’in-72.

“Komisaun ne’e ami foin hahú servisu iha loron 26 fulan-Fevereiru 2026, ami hala’o ami nia primeiru reuniaun agora dadauk ne’e komisaun komesa halo revé fali prosesu sira ne’e, revé uluk sira 400 liu ne’e iha failansu ka laiha failansu, iha manipulasaun ka lae, ko’alia dehan familiarismu ka laiha familiarismu. Komisaun sei haree ida-ne’e,” Paulo Assis Belo hateten iha Sentru Formasaun Polísia (CFP-sigla portugés)  iha Comoro, Díli.

Prezidente komisaun no suprevizaun fiskalizasaun ba revizaun rekrutamentu PNTL esplika,  maneira revé ne’e haree notas sira ne’ebé públiku fó sai ne’e, no notas sira orijinál ne’e, provas ne’ebé sira halo ne’e iha akordu duni ka lae ka iha manipulasaun.

“Depois reklamasaun sira ne’ebé tama ladún barak ida, ami simu to’o agora ne’e reklamasaun  200  de’it, kuaze reklamasaun sira ne’e porvolta kona-ba familiarismu no nepotismu mak barak no polísia nia oan. Mais,  ha’u hakarak hateten ba ita boot sira katak Polísia nia oan ne’ebé ami hetan dadus ne’e entre na’in-400 ne’e sira iha  na’in-71 de’it, sira veteranu nia oan ne’e ami hetan na’in-72 (jerasaun patriota),” Paulo Assis Belo haktuir.

Kompozisaun membru Komisaun no Suprevizaun Fiskalizasaun ba Revizaun Rekrutamentu PNTL  2025 ne’e mai husi reprezentante jerasaun patriota, membru  Parlamentu Nasionál na’in-rua, reprezentante husi  Prezidénsia Repúblika, Provedór Direitus Humanus no Justisa (PDHJ)  nune’e mós iha Komisaun Funsaun Públika ho Guarda Nasionál Repúblikana (GNR) ho Polísia Austrália.

“Ita haree lai iregularidade ne’e boot liu ka oinsá ne’e sei haree lai, komisaun ne’e la foti desizaun  mais sei halo de’it relatóriu ba governu depois husi Konsellu Ministru (KM) mak foti desizaun kona-ba anula totál ka, anula parsial ka ne’e governu mak halo,” Paulo Assis Belo afirma tan.

Nia hatutan, maske agora  dadus ne’ebé komisaun rekrutamentu fó mai ne’e na’in-71 mak polísia nia oan, maibé komisaun revizaun sei halo nafatin investigasaun atu bele hatene  tebes ka lae na’in-71 ne’e de’it ka sei iha tan seluk. Nune’e mós konfirma lolos númeru  jerasaun patriota na’in-72 ne’e.

Iha rekrutamentu Polísia tinan 2025 nian ne’e, Governu konsta kuota 20% ba polísia nia oan no 20%  ba jerasaun patriota, maibé PDHJ foti problema ne’e ba iha Tribunál Rekursu deklara katak ne’e inkonstitusionál ne’ebé Kuota ne’e la aplika ona, signifika sira hotu-hotu iha direitu atu bele kompete ba  vaga Polísia ne’e hanesan.

Jornalista: Juvinal Cabral dos Santos