Hatutan.com, (27 Maiu 2026) Díli-Polísia Nasionál Timor-Leste (PNTL), Kuarta (27/05), detein suspeitu na’in-tolu ho naran inisiál AA, RD, no DA ne’ebé importa no transporta sasán kontra bandu, hanesan bebidas Cocacola, Sprite, Red Bull, Larutan Cap Kaki tiga, Milko, Pocari Sweat no seluk tan.

Evidésia sira ne’ebé autoridade sira prende husi suspeitu na’in-tolu iha área Tibar, Liquiça tanba importa ilegalmente. Foto/Juvinal Cabral dos Santos

Informasaun ne’ebé Hatutan.com rekolla husi autoridade seguransa balun katak hale’u tuku 14:20 Otl, ekipa konjunta kompostu husi   Unidade Polísia Maritima (UPM),  N2 Komponente Naval FALINTIL-Forsa Defeza Timor-Leste (F-FDTL) kaptura suspeitu na’in-tolu hamutuk ho evidensia ba krime sasán kontra-bandu iha área Tibar, Munisípiu Liquiça.

Ekipa konjunta PNTL ho F-FDTL hapara kareta baskolante kor kinur ho xapa matrikula A.57.0XX iha área Tibar, Munisípiu Liquiça ne’ebé ba transporta sasan kontra bandu iha área Kosteira Palaka-Bobonaro mai Díli.

Ekipa konjunta bainhira hapara tiha transporte refere iha Tibar hamutuk ho evidénsia kompletu, no ekipa transporta evidensia refere ba kedas  Kuartel Jerál PNTL iha edifisiu Diresaun Servisu Investigasaun Kriminál (DSIK) hodi submete prosesu enkéritu no identifikasaun.

Hafoin ekipa entrega ba Diresaun Servisu Investigasaun Kriminal kontinua kedas submete ba prosesu flagrante-delitu, kazu ne’e prosesu ho NUK : 0199/26.PNSIC.

Dadaun suspeitu na’in-tolu naran inisiál AA, RD, no DA detein hela iha sela detensaun Komandu Polísia Munisípiu Díli no tuir informasaun katak Kinta aban (28/05/2026) sei aprezenta ba iha Prokuradoria Maliana.

Jornalista: Juvinal Cabral dos Santos