Hatutan.com, (03 Juñu 2026) Díli-Reuniaun Konsellu Ministrus (KM), Kuarta (03/06/2026),  iha Palásiu Govenru, aprova projetu Rezolusaun Governu ne’ebé aprezenta husi Ministru Interiór (MI), Francisco da Costa Guterres, kona-ba definisaun nesesidade anuál husi pesoál ne’ebé sei rekruta ba Polísia Nasionál Timor-Leste (PNTL) iha tinan 2026 hamutuk na’in-750.

Lee Mós: Rekrutamentu Kadetas PNTL Aumenta Ba Na’in-750

Reuniaun Konsellu Ministru iha Palásiu Governu, Kuarta 03 Juñu 2026. Foto/Espesiál

Rezolusaun Governu nian estabelese ba 350 númeru vaga adisionál ne’ebé sei rekruta hosi PNTL iha tinan 2026, ne’ebé aumenta ba vaga 400 ne’ebé antes ne’e aprova ona ba admisaun iha Kursu Formasaun Ajente hodi aumenta totál vaga 750.

Husi vaga sira ne’ebé prevee ona, 400 destina ba polisiamentu jerál ne’ebé asegura hosi Komandu Munisipál sira no 350 ba reforsu Unidade Espesializada no Rezerva PNTL nian, maka hanesan Unidade Polísia Marítima (UPM), Unidade Patrullamentu Fronteira (UPF) no Unidade Espesiál Polísia (UEP).

Medida ida-ne’e ho objetivu atu hametin kapasidade operasionál PNTL nian atu hatán ba nesesidade seguransa nasionál, hodi konsidera dezafiu sira ne’ebé relasiona ho prosesu eleitorál sira ne’ebé sei mai, protesaun fronteira no Timor-Leste nia Prezidénsia ba ASEAN iha tinan 2029.

“Tuir loloos fulan-Maiu ne’e prosesu tiha ona, mais presiza fali instrumentu legál ida, mabé agora hotu ona,” Ministru Interiór (MI) Francisco da Costa Guterres, informa   ba jornalista sira hafoin reuniaun Konsellu Ministru.

Ministru Interiór informa Konsellu Ministru aprova ona instrumentu legál  kona-ba prosesu kontinua ba hodi hetan 750 agora komesa la’o loos hotu ona.

“Fulan-Juñu nia laran ne’e sira sekretáriadu monta hotu ona, espera katak sira hahú ona, tanba iha ne’ebá fó tempu semana ida ka rua para sira komesa ona komunika bá kraik depois ekipa sira konstitui ona depois reuniaun fó hatene ba kraik,” Ministru Francisco da costa Guterres esplika.

Dadaun juri forma hotu ona, Sekretáriadu no Komisaun Fiskalizasaun Monitorizasaun mós iha hotu ona, ne’ebé hein de’it katak instrumentu legál ida ohin aprova ne’e depois ida-ne’e automatikamente bele la’o ona.

Ekipa juri husi rai-li’ur na’in-haat no husi rai-laran na’in-tolu, kompostu husi  PNTL na’in-rua no Funsaun Públika  na’in-ida.

Prosesu rekrutamentu Governu fó kompetensia tomak bá Komandu PNTL hodi bele akompaña prosesu rekrutamentu atu la’o  ho di’ak no transparante.

Jornalista: Juvinal Cabral dos Santos