Hatutan.com, (22 Juñu 2026) Díli-Ministru Interiór (MI) Francisco da Costa Guterres,  orienta ba Komandu Polísia Nasionál Timor-Leste (PNTL) atu halo alerta no prevensaun ba  atividade oioin ne’ebé  perturba ambiente lutu nasionál durante loron hitu nia laran kona-bá falesimentu eis-Prezidente Repúblika, Francisco Guterres “Lú-Olo”.

Lee Mós: Timor Lakon Lider Nasionál Francisco Guterres “Lú-Olo”

Famìlia sira haloot ona mate-isin eis-PR Lú-Olo iha kaixaun hodi hein transporta ho aviaun Aero Dili husi Kuala Lumpur mai Timor-Leste. Foto/Espesiál

Konsellu Ministru (KM) liu husi sorumutuk estraordináriu iha Auditóriu Kay Rala Xanana Gusmão iha Ministériu Finansas, Segunda (22/06/2026), aprova votu pezar no dekreta lutu nasionál durante loron-hitu  ba falesimentu Francisco Guterres “Lú Olo”, eis-Prezidente Repúblika Demokrátika Timor-Leste no Prezidente partidu FRETILIN.

Lutu nasionál hahú hosi tuku 15:00 Otl iha loron 22 Juñu 2026 to’o tuku 12:00 kalan Otl iha loron 28 Juñu 2026.

Durante períodu ne’e, bandeira nasional hasa’e to’o ai-riin klaran de’it (meia haste) iha edifísiu públiku hotu-hotu, inklui embaixada, konsuladu no reprezentasaun Estadu nian iha teritoriu nasionál no iha rai-li’ur.

Eis-Prezidente Repúblika, Francisco Guterres Lu-Olo hakotu iis iha Hospital Prince Court , Kuala Lumpur, Malázia, Domingu-kalan, 21 Juñu 2026, hale’u tuku 10:00 kalan Oras Malázia.

Governu liuhusi Minitru Interiór, Francisco da Costa Guterres, husu ba komunidade, liuliu juventude sira, atu kontinua akompaña jogu futeból ho maneira hakmatek no evita festa, tun-sa’e ka halo barullu ne’ebé la respeita períodu lutu nasionál.

Ministru Interiór, reafirma katak durante lutu loron hitu ne’e, komunidade tomak presiza respeita desizaun governu. Atividade hanesan uza múzika ho lian aas ka eventu seluk ne’ebé bele konsidera hanesan la respeita ambiente lutu, husu atu suspende temporariamente.

“Kestaun kona-ba tela ka LED screen (LD) ne’ebé instala iha fatin balun hodi halibur komunidade ba asiste jogu kopa mundiál ne’e, Governu sei halo koordenasaun ho Rádiu Televizaun Timor-Leste (RTTL.EP) hodi avalia no foti medida preventiva atu garante observasaun lutu nasionál ne’e lao ho di’ak, tanba agora tempu ita fó omenajen no halot lai ita-nia eis-Prezidenti nia mate-isin hafoin bele kontinua atividade seluk,” Ministru Interiór Francisco da Costa Guterres  informa ba jornalista sira.

Preparasaun ba simu maktoban no prosesu serimónia sira, parte seguransa deklara katak sira prontu atu garante seguransa no fó apoiu tomak ba komisaun organizadora atu eventu hotu bele realiza ho orden no to’o remata ho di’ak.

Komandante Operasaun Polísia Nasionál Timor-Leste (PNTL) Munisípiu Dili, Superintendente Asistente Polísia Luis Amaral, informa, komandu operasaun simu ona orientasaun husi Komandante Jerál PNTL, atu prepara planu operasaun espesífiku hodi simu Heroi Nasionál Francisco Guterres “Lú-Olo” nia isin-mate ne’ebé sei mai Timor-Leste iha Tersa-dadeer, 23 Juñu ne’e, hale’u tuku 6:30 Otl ho aviaun Aero Dili.

“Ne’ebé tuir planu membru PNTL sei koloka iha pontu estratéjiku sira iha dalan hodi garante seguransa no fasilita movimentu durante prosesu trnasladasaun maktoban husi Aeroportu Internasionál Prezidente Nicolau Lobato ba to’o maktoban nia rezidénsia iha Farol, Díli,” Superintendente Asistente Polísia Luis Amaral  informa.

Relasiona ho atividade Kopa Mundiál ninia, PNTL sei kontinua halo operasaun no patrullamentu iha área sira ne’ebé identifika hanesan pontu ajuntamentu nune’e evita halo barullu.

Mate-isin eis-PR Lú-Olo tua ona iha kaixaun. Foto/Espesiál

Francisco Guterres “Lú Olo” mak figura ida ne’ebé iha influénsia boot iha luta ba libertasaun nasionál. Nia mate ho tinan 71 iha Ospitál Prince Court, Kuala Lumpur, Malázia, hafoin simu tratamentu médiku intensivu.

Lú Olo moris iha Osú, Munisípiu Viqueque, iha loron  7 Setembru 1954. Nia dedika parte boot hosi nia moris ba luta libertasaun nasionál no kaer responsabilidade oioin iha rezisténsia durante okupasaun Indonézia. Hafoin Konis Santana mate iha 1998, nia asume lideransa polítika rezisténsia Timor oan nian.

Lú-Olo nia kontribuisaun ba nasaun hanesan 2001 eleitu nu’udár Prezidente Asembleia Konstituinte, órgaun ne’ebé responsavel ba elaborasaun Konstituisaun Repúblika, iha 2002-2007, hala’o knaar nu’udár Prezidente Parlamentu Nasionál, no tinan 2017-2022 Eleitu nu’udár Prezidente Repúblika.

Governu mós relembra kondekorasaun sira ne’ebé Lú Olo simu: Kolár Orden Timor-Leste iha 2009, Grande Kolár Orden Timor-Leste iha 2022, no Grande Kolár Orden Infante D. Henrique ne’ebé Repúblika Portugés atribui iha tinan hanesan. Kondekorasaun ne’e rekoñese ninia kontribuisaun ba Timor-Leste no ba hametin relasaun entre nasaun rua.

Governu fó omenajen ba membru importante ida iha luta libertasaun nasionál no hato’o sentidu kondolénsia kle’an ba nia espoza, oan sira no membru família sira seluk, ba FRETILIN, no mós ba povu timoroan tomak.

Governu rekoñese legadu dedikasaun no servisu ne’ebé Francisco Guterres “Lú Olo” fó ba konstrusaun Timor-Leste ida ne’ebé livre, demokrátiku no soberanu.

Vise-Primeiru-Ministru no Ministru Koordenadór Asuntus Sosiais, Mariano Assanami Sabino, informa, durante lutu nasionál loron-hitu, servisu la’o normál maibé husu sidadaun hotu respeita Lutu Nasionál.

“Ita husu konsekuénsia ba joven sira no povu katak ita hotu triste, tanba ita nia líder nasionál ida lakon iha ita nia leten, sira ne’ebé sobre vive husi luta ne’e. Tanba ne’e mak loron ba loron ita sempre haree katak la’ós de’it katuas sira maibé  joven sira loriku asuwa’in mós barak mak ba dadauk, tanba ne’e ita husu ho konsiénsia oinsá respeitu onra no glória ba ita nia saudozu”, Mariano Assanami Sabino hateten.

Vise-PM afirma, imi (jornalista) sei hein para agenda tuir mai kona-ba ba sekuensia sira lori saudozu Francisco Guterres Lu-Olo to’o Timor.

“Ita hotu laran triste, ita hotu sente hakfodak tanba saudozu atu bá mós ha’u mak hamutuk ho Ministru  para aviaun mai hodi ba Aeroportu ho esperansa boot ida katak sei di’ak para mai fali hamutuk ho ita,” Mariano  Assanami Sabino haktuir.

“Ita hotu iha esperansa boot, bainhira sé de’it moras ita hanoin nia tenke saúde rekupera lalais, no momentu ne’e nia la’o de’it ho nia karreta rasik ita hanoin katak la’ós problema hanesan ne’e. Maibé médiku sira haree todan ona ne’e mak presiza organiza aviaun mai ne’e. To’o iha ne’ebá mós sei iha komunikasaun bainhira ha’u iha Xina mós sei iha komunikasaun ho nia oan mane no ha’u halo kontaktu, ha’u sente katak kondisaun di’ak para bele rekupera fila-fali mais prontu hodi kalan mak ita rona fali notisia ida ne’e,” nia afirma tan.

Assanami hateten, voo aviaun espesial Aero Dili maibé aluga husi estadu para atu tula de’it saudozu ho ninia familia ema hotu ne’ebé iha ligasaun ida-ne’e.

Iha sorin seluk membru Komité Sentrál FRETILIN Francisco Vasconcelhos, hateten, saudozu to’o iha ne’e mak husi família no Komité Sentrál FRETILIN deside agenda ne’e prezide hanesan ne’ebé.

“Mais entantu, liuhusi meius ida ne’e ha’u hakarak hato’o dala ida tan agradese bá povu tomak nia solidaridade ba estadu, governu,  ba entidades hotu-hotu, komunidade tomak, no mós ba kamarada sira ne’ebé mak fó apoiu moral,” Francisco Vasconcelhos hateten.

Jornalista: Juvinal Cabral dos Santos