Hatutan.com (21 Jullu 2026) Hera-Autoridade Timor-Leste nian liu husi  Diresaun Servisu Investigasaun Kriminál (DSIK), Polísia Nasionál Timor-Leste (PNTL) halo operasaun kontinua ba rede scam call centre hodi detein tan Xinés na’in-21 iha rezidénsia ida iha área Hera, Munisípiu Díli, Tersa (21/7/2026).

Autoridade sira halo operasaun hodi detein Xinés na’in-21 iha rezidénsia ida iha Hera deskonfia rede scam call centre. Foto/Juvinal Cabral dos Santos

Hatutan.com ne’ebé akompaña mós operasaun ne’e iha lokal krime, hatudu katak  autoridade Timor-Leste nian hamutuk ho ekipa servisu  sekreta sira tama iha rezidénsia ne’ebé deskonfia rede scam call centre iha Hera hale’u tuku 11:30 Otl.

Rezidénsia ne’ebé Xinés sira arrenda ne’e tipu andár rua ne’ebé husi parte andár okos Xinés sira utiliza ba atividade ilisitu ne’e, no parte andár leten mak uma na’in hela no loke ofisina.

Iha uma andár rua ne’e parte okos kuartu tolu instala kama hamutuk-38 ne’ebé  sira utiliza ba toba, meza boot ne’ebé instala hodi halo atividade hamutuk hitu, kada meza tau kadeira 10 no balun kadeira tolu.

Iha operasaun ne’e autoridade sira foti sasán sira hanesan evidensia mak laptop marka Acer -14 ne’ebé tau hela iha meza, inklui starlink ne’ebé instala iha rezidénsia refere hamutuk-10, no pasaporte ho nasionalidade Xina nian ne’ebé seidauk sura.

Autoridade sira mós halo apreensaun ba  karreta rua ne’ebé Xinés sira utiliza no foti  foti mós ekipamentu sira seluk ne’ebé deskonfia iha ligasaun ba atividade ilisitu Scam Call Centre.

Komunidade ne’ebé hanesan viziñu iha Aldeia Ai-Loklaran, Suku Hera, Postu-Administrativu Cristo-rei Munisípiu, Melsiano Gustavo haktuir, iha fulan-tolu liubá atividade sira ne’e la deteta

“Sira só meudia no lokraik tuku 18:00 Otl sira ne’e mak sai ba hola sasán, loron bainleet ne’e sira la sai,” Melsiano Gustavo hanesan viziñu informa ba jornalista sira.

Durante sira ba hola sasán ne’e Xina sira taka ibun ho faru, ne’ebé dalaruma sira labele koñese Xinés sira ne’e.

“Antes PNTL halo buska no apreensaun iha Díli laran ne’e mak ami foin deskonfia katak sira mós dalaruma envolve hotu karik,  maibé sira nunka sai iha horas dader tuku 09:00 no 10:00 Otl sira ne’e”, komunidade ne’e haktuir.

Komunidade ne’e preukupa maibé durante ne’e sira hanoin katak traballadór balun ne’ebé servisu iha kompañia sira ne’ebé besik iha área ne’e.

Uma na’in lakhoi atu tau nia naran kompletu ho inisial EL, haktuir, sidadaun sira-ne’e mai asina kontratu ne’e relata katak sira iha kompañia legál ida ne’ebé hala’o sira-nia atividade buka osan mean no osan mutin.

“Husi inisiu sira mai halo kontratu ho ami ne’e sira informa katak sira mai halo servisu ida kona-ba buka osan mean no osan mutin nia, no dehan sira-nia kompania ne’e legál, no sira mai asina kontratu ne’e reprezentante ida mak mai asina”, uma na’in informa ba jornalista sira.

Nia hatutan, sira aluga uma ne’e ba tinan lima no selu kada tinan ida no dadaun ne’e sira selu uluk ona tinan ida nia ho  montante $38,400.00.

Nia informa, Sira hahú hela iha ne’e iha 03 Jullu 2026 bainhira sira asina kontratu uma na’in entrega save sira limita uma na’in atu asesu tama iha uma refere.

“Ami haree  lorloron ne’e sira nain haat ka lima mak iha ne’e hala’o sira-nia atividade, no dezde sira tama iha ne’e limita ami atu asesu ba sira-nia atividade. Ohin PNTL kaer no bolu ona ami mak ami foin hatene sira hamutuk na’in-21,” uma na’in ne’e haktuir.

Nia dehan, tanba atividade hirak-ne’e konsidera atividade ilegál tanba ne’e sei koopera ho PNTL hodi halo buska no apreensaun.

Jornalista: Juvinal Cabral dos Santos