Hatutan.com, (13 Jullu 2026) Díli– Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK), Segunda (13/07/2026), halo operasaun no buska hodi dezmantela tan atividade ilísitu scam call centre  iha área Comoro-Díli ho Ulmera-Liquiça.

Lee Mós: Kazu Jogu Ilísitu iha Bebonuk, MP Solisita bá Tribunál Aplika Medida Kausaun US$3000 no Proibisaun Aujénsia

Polísia dezmantela atividade ilísitu scam call centre iha Ulmera, Segunda (13/07/2026). Foto/Juvinal Cabral dos Santos

Iha operasaun ne’e, aturodiade sira konsege halo detensaun ba sidadaun Indonéziu no Xina hamutuk na’in-90, kompostu husi na’in-76 detein iha área Ulmera no na’in-14 iha Kampu Baru-Comoro.

Tuir observasun Hatutan.com  iha lokal operasaun nian iha Aldeia 4 de Setembru-Comro, hale’u tuku 12:12 Otl hodi  asegura seidadaun estranjeiru ho nasionalidade Xina na’in-14 ne’ebé hala’o hela atividade scam call centre.

Uma andár rua ne’e kama ne’ebé instala kada  iha kuartu-ualu no sidadaun sira ne’e uza hela hodi toba  hamutuk na’in-42, aleinde ne’e sira utiliza salaun kiik ida hodi halo atividade ne’e instala laptop-10.

Buska no aprensaun ne’e autoridade seguransa sira foti laptop, telefone no sasán sira ne’ebé deskonfia utiliza ba atividade scam call centre.

Polísia Nasionál Timor-Leste liuhosi ekipa DSIK sobu  mós rezidénsia ida iha área Ulmera Munisípiu Liquiuça iha uma andár rua, hodi detein sidadaun Xina na’in-ida no Indonéziu na’in-75 ho total suspeitu na’in-76.

Atividade ilísitu scam call centre iha área Comoro, Díli. Foto/Juvinal Cabral dos Santos

Sasán sira ne’ebé autoridade sira halo apreensaun mak  hanesan komputadór unidade 56 resin, telefone marka iphone no oppo A5S ne’ebé seidauk sura, passaporte Repúblika Indonézia, no simcard  operadórTelkomcel ho kuantidade barak ne’ebé seidauk sura, inklui starlink ne’ebé  instala iha fatin atividade hamutuk-haat (4).

Iha rezidensia aldeia Tetsari, Suku Ulmera, Postu-Administrativu Bazartete, Munisípiu Liquiça, uma na’in ne’ebé suspeitu sira aluga hodi halo atividade ilísitu ne’e hateten, momentu suspeitu sira mai  dehan aluga rai no uma ne’e atu rai sasán tanba sira importa karreta husi Japaun.

“Ne’ebé ami hanoin katak sira atu rai sasán ne’e mak hodi aluga uma no rai ne’e kona-ba buat sira seluk ne’e ami lahatene, ami hatene dehan sira aluga uma no rai ne’e de’it,” uma na’in ne’ebé husu atu la publika nia identidade ne’e informa.

“Kada fulan, sira selu US$2,750 no sira selu tinan rua ona, tuir kontratu selu kada tinan. Momentu ne’e mai kontratu ne’e Xina de’it ho maun Timor-oan ida depois ami halo kontratu ami ba asina ho maun advogadu ida, Timoroan ne’e servisu hamutuk ho sira. Ami so hatene de’it mak sira atu rai sasán tanba ne’e besik portu Tibar, karik liu tan ida ne’e ami lahatene, tinan rua ne’e sira selu ona US$64,000-resin,” uma na’in ne’e konta tuir.

Jornalista: Juvinal Cabral dos Santos