Hatutan.com, (11 Fevereiru 2022), Dili-Eis Xefe Suku Grisenfor, Alexandrino Chavas nu’udar mós sasin ne’ebé asina akordu Kompra e Venda ba rai no uma Sede CNRT ne’e, rekoñese katak matebian José Jacinto da Costa Ricardo mak sosa uma ho rai husi uma no rai na’in, matebian António Cesar dos Martires Correia.

Notísia iha Relasaun: Sede CNRT iha Disputa

Sede Partidu CNRT. Foto/Hatutan.com

Rai ho uma atuál Sede Nasionál Partidu CNRT ih Bairro dos Grilos ne’e sai disputa entre família matebian José Jacinto da Costa Ricardo ho E.J.A Wijaya ne’ebé nu’udar sidadaun Indonéziu.

Kazu ne’e hetan ona desizaun husi Tribunál primeira instánsia ka Tribunál Distritál Dili (TDD) iha loron 21 fulan-Jullu 2021, ne’ebé husu atu  E.J.A Wijaya tenke selu kustu arrendamentu ho montante $52,500.00 ba Fariz Fauzi Sagran Ricardo nu’udar oan-mane husi matebian José Jacinto da Costa Ricardo.

E.J.A Wijaya, la konkorda ho desizaun Tribunál primeira instánsia nian. Nune’e nia ho nia advogadu privadu, Miguel Faria halo rekursu ba Tribunál Rekursu (TR) no to’o ohin loron sei prosesa iha  TR.

“Tuir ha’u nia koñesimentu momentu ne’ebá matebian José Jacinto da Costa Ricardo sosa rai ne’e husi matebian António Cesar dos Martires Correia, maibé ha’u asina hanesan koñesimentu autoridade lokál nu’udar xefe suku no iha tempu ne’ebá seidauk iha lei ruma ne’ebé dehan katak labele fa’an rai no enkuantu sosa no fa’an entre Timor oan ho Timor oan laiha problema, maibé kleur ona ha’u la hanoin tanba rai no uma iha Bairro dos Grilos ne’e maioria Estadu nian,” eis Xefe Suku Grisenfor Alexandrino Chavas ba Hatutan.com iha ninia uma, Bairo dos Grilos, Sesta (11/02/2022).

Maske nune’e eis xefe suku ne’e laiha koñesimentu kona-ba arrendamentu ne’ebé matebian José Jacinto da Costa Ricardo halo ho E.J.A Wijaya.

Advogadu Pedro Aparicio ne’ebé fó asisténsia legal ba Fariz Fauzi Sagran Ricardo iha prosesu disputa rai no uma Sede CNRT ne’e hateten, bazeia ba desizaun TDD katak Fariz Fauzi Sagran Ricardo maka sai nain ba rai no uma refere, tanba rai ne’e uluk matebian José Jacinto da Costa Ricardo nu’udar aman husi Fariz Fauzi Sagran Ricardo maka sosa husi matebian António Cesar dos Martires Correia .

“Depois  matebian José Jacinto da Costa Ricardo sosa rai ne’e, nia fó kontratu arrenda ba réu E.J.A Wijaya no ikus mai Wijaya fó tutan ba partidu CNRT hodi utiliza ba sede no Wijaya mós lakohi selu ona kontratu arrendamentu ho matebian José Jacinto da Costa Ricardo nia oan ne’ebé antes ne’e halo ona tanba ne’e ikus mai TDD deside katak kontratu arrenda hamate no konsidera Wijaya inkomprimentu, nune’e tenke entrega fali rai  ho uma ne’e ba nia nain matebian José Jacinto da Costa Ricardo, maibé liu husi advogadu Wijaya hatama fali rekursu ba Tribunal Rekursu (TR),” Pedro Aparicio esplika.

Advogadu ne’e mós konsidera estatutu rai-ne’e hanesan rai privadu ne’ebé nain maka matebian José Jacinto da Costa Ricardo, maibé sei nafatin nakloke karik husi parte CNRT hakarak ko’alia ka rezolve.

“Ami ko’alia beibeik ona ho parte CNRT, karik bele sira halo uma andár iha ne’ebá ona entaun sosa de’it ona, maibé to’o agora CNRT mós dehan hein de’it, ne’e maka ha’u nia kliente hein de’it to’o agora ne’e, maibé daudaun ne’e ita hein de’it desizaun husi TR nian ne’e oinsá,” Pedro Aparicio hateten.

Iha loron 02 fulan-Novembru 2006, autór Fariz Fauzi Sagran nia aman José Jacinto da Costa Ricardo (matebian) selebra akordu ho réu E.J.A Wijaya, atu selu arrendamentu tuir saida mak estabelese ho folin $5,000.00/tinan, durante tinan-25.

Hafoin José Jacinto da Costa Ricardo mate, iha loron 09 fulan-Abríl 2008, réu  E.J.A Wijaya husik tiha nia obrigasaun atu halo arrendamentu ba autór Fariz Fauzi Sagran.

Liuhusi kontaktu pesoál réu E.J.A Wijaya  nunka kolabora no kumpre nia obrigasaun ba arrendatáriu  tuir kontratu arrendamentu ne’ebé iha no réu E.J.A Wijaya  nunka konsidera ho sasán ne’ebé nia okupa ho estatutu aluga husi autór ka  Fariz Fauzi Sagran Ricardo nia aman (matebian),  José Jacinto da Costa Ricardo.

Jornalista: Carmelita Isaac