Hatutan.com, (11 Marsu 2022), Díli— Prezidente Republika, Francisco Guterres Lú Olo, Iha loron 09 fulan-Marsu promulga Dekretu Parlamentu Nasionál númeru 59/V kona-bá renovasaun ba medidas esesionais no temporárias, hodi hatán vijilánsia sanitária ba pandemia COVID-19, atu hanaruk vijénsia artigu 3 nian hosi Lei no. 24/2021, 19 Novembru.

Prezidente Repúblika (PR), Francisco Guterres Lú Olo. Foto/Média PR.

“Liuhosi Dekretu Parlamentu Nasionál hirak-ne’e mak determina renovasaun ba medidas esesionais no temporárias hasoru pandemia COVID-19, hodi hanaruk tan prazu vijénsia hosi artigu 3 Lei no. 24/2021 ninian, 19 Novembru, ba loron 120, tuir prevee iha artigu 5 hosi Lei no. 24/2021, 19 Novembru,” Hatutan.com sita komunikadu.

Notisia iha Relasaun:Lú-Olo Orgullu TL La Rejista Ona Timoroan Mate Ho COVID-19

Tuir Dekretu Parlamentu Nasionál no. 59/V, Parlamentu Nasionál fó autorizasaun ba Konsellu Ministrus atu determina, karik presiza, medidas esesionais no temporárias ba protesaun saúde públika tuirmai ne’e:

Regras kona-bá distansiamentu sosiál, ema halibur-malu, fase liman no uza máskara no ekipamentu protesaun pesoál seluseluk, naran katak ekipamentu hirak-ne’e la afeta uza-na’in sira-nia integridade fízika;

Izolamentu ba ema ne’ebé mak infetadu hosi moras COVID-19 no sira-ne’ebé deskonfia infetadu ona ho SARS-CoV-2 ka moras ho COVID-19, tuir prazu no kondisaun hirak ne’ebé nesesáriu hodi prevene transmisaun SARS-CoV-2 ka moras COVID-19;

Rekizisaun ba servisu, fasilidades, ekipamentus no ema ne’ebé nesesáriu atu hala’o atividade relasiona ho prevensaun no kontrolu ba pandemia COVID-19;

Taka temporáriu ka hamenus oráriu atendimentu nian ba públiku iha postu fronteira rai-maran, áerea no tasi nian;

Kuarentena ba sidadaun sira-ne’ebé hakarak tama mai iha rai-laran, tuir prazu no kondisaun hirak ne’ebé nesesáriu hodi prevene transmisaun SARS-CoV-2 ka moras COVID-19;

Bandu ema estranjeiru sira tama mai territóriu nasionál bainhira situasaun SARS-CoV-2 ka COVID-19 iha sira-nia territóriu ka rejiaun orijen bele fó risku ida ba saúde públika nian karik importa mai territóriu nasionál;

Asesu ba fatin ka atividade balun tenke komprova vasinasaun kompleta kontra COVID-19, ka tenke komprova rezultadu negativu iha teste detesaun SARS-CoV-2.

Jornalista: Vito Salvadór