Hatutan.com, (12 Marsu 2022), Dili-Polísia Nasionál Timor-Leste (PNTL) Munisípiu Dili, preparadu no garante, seguransa ba atividade kampaña Eleisaun Prezidensial (ElPrez) ba loron ikus iha kapitál Dili.

Notísia iha Relasaun: Kampaña Aprezenta Programa La’ós Soran Povu

Komandante PNTL Munisípiu Dili, Superintendente Xefe Henrique da Costa. Foto/Hatutan.com

Komandante PNTL Munisípiu Dili, Superintendente Xefe Henrique da Costa informa, dadaun ne’e, komandu Dili halo ona preparasaun planu ba seguransa nian hodi asegura ba kampaña loron ikus nian iha Munisípiu Dili entre loron 15 to’o 16 Marsu ne’e.

“Ita-nia planu seguransa nian, ita koloka hotu ona, ita hetan apoiu másimu hosi Unidade Espesiál, Komandu Jerál rasik, UPM ho UPF ne’ebé mak koloka iha Dili nian, atu garante seguransa ba iha kampaña nian,” Superintendente Xefe Henrique da Costa, informa ba Hatutan.com via telefone, Sábadu (12/03/2022).

Tuir planu, iha enseramentu kampaña eleitóral ne’e, parte komandu PNTL sei hatuun nia membru efetivu hamutuk na’in-600, hodi asegura seguransa iha Dili bele la’o iha pás no hakmatek.

Komandu PNTL mós sei la tolera militante, simpatizante no apoiante sira kandidatu PR nian ne’ebé  hakarak halo provokasaun ba malu hodi kria fali konflitu ka krime durante kampaña iha Dili.

“Ita hatuun ita-nia rekursu barak ne’e, para atu nune’e hodi garante ba ida ne’e, karik hanesan iha balu maka halo barullu ka, balu la tuir regras ka, ita sei foti kedas medida iha ne’ebá,” komandante Henrique afirma.

Komandante Henrique informa katak, atividade kampaña ikus nian, hosi partidu boot-rua, Frente Revolusionáriu Timor-Leste Independente (FRETILIN), ho Congresso Nacional de Reconstrucção de Timor-Leste (CNRT), ne’ebé tuir planu atu realiza dala-ida de’it iha kapitál Dili, iha 16 fulan-Marsu 2022 ne’e, iha ona mudansa ba oráriu.

Hosi mudansa ba oráriu kampaña ne’e, partidu FRETILIN ho Kmanek Haburas Unidade Nasionál Timoroan (KHUNTO), sei hala’o hotu dala-ida iha loron 16 fulan-Marsu 2022, maibé diferente iha fatin.

FRETILIN iha Tasitolu, no KHUNTO iha Kampu Alór, Dili. Nune’e, kandidatu PR hosi partidu CNRT nian hala’o antes iha loron 15 fulan-Marsu, iha Tasitolu, Dili.

Kona-bá perspetiva hosi sosiedade sívil, Fundasaun Mahein (FM) nian, ne’ebé dehan konfrontu entre militante partidu FRETILIN ho KHUNTO nian iha Domingu (07/03/2022), PNTL tarde halo atuasaun, Komandante Henrique hateten, sei foti situasaun ida ne’e sai hanesan lisaun ida ba PNTL Dili, nune’e bele kria planu seguransa ne’ebé di’ak liután.

“Hanesan autoridade seguransa, ita uza mós referénsia hosi kolega sira parte seluk ninian ne’e, atu nune’e, ita bele prepara ita nia seguransa di’ak liután,” Komandante Henrique hateten.

Jornalista: Rogério Pereira Cárceres