Hatutan.com, (13 Marsu 2022), Dili-Polísia Nasionál Timor-Leste (PNTL) Munisípiu Baucau, Domingu dadeer (13/03/2022), tuku 06:00 Otl, detein ona suspeitu na’in-tolu ho insiál DC, JFX ho CJFX, iha sira-nia hela fatin iha área Buibau, Postu Administrativu Baucau Vila, Munisípiu Baucau.

Notísia iha Relasaun: Na’in-ida Mate iha Ámbitu Kampaña Lú Olo iha Baucau

Vitíma João Hornai Ximenes, lakon vida iha insidente kampaña kandidatu PR Lú Olo iha Baucau, Sábadu (12/03/2022). Foto/PNTL

Komandante PNTL Munisípiu Baucau, Superintendente Polísia, António de Sá, infroma  suspeitu sira-ne’e PNTL halo detensaun  tanba deskonfia forte nudár autór prinsipál ba insidente iha kampaña kandidatu Prezidente Repúblika 2022-2027, Francisco Guterres “Lú Olo” iha Aldeia Darasulam Suku Gariuai, Baucau, Sábadu (12/03/2022).

Insidente ne’e rezulta João Hornai Ximenes, nudár apoainte Kandidatu Lú Olo nian ne’e lakon vida  tanba hetan pankada maka’as iha parte ulun.

Hafoin simu informasaun kona-bá kazu insidente iha Darasula, iha sábadu, 12 marsu 2022, maizumenus tuku 07 kalan, parte Komandu PNTL Munisípiu Baucau, orienta kedan membru sira buka tuir suspeitu sira atu bele halo kapturasaun. Infelizmentu, bainhira to’o iha área hela fatin Buibau, vitima sira lakohi koopera ho autoridade seguransa, tanba halai sees hosi sira-nia uma. 

“Ami kaptura  ona autór na’in-tolu agora submete hela ba iha identifikasaun. Sira ne’e kaptura iha área Buibau nian. Suspeitu ho vitima hosi hotu Buibau,” Superintendente Polísia, António de Sá informa ba Hatutan.com via telephone.

Suspeitu ho inisiál DC (tinan 24), nudár kaben na’in, ho profisaun fa’an pulsa, hela fatin iha Loidua, Buibau, Baucau. Suspeitu segundu, ho inisial JFX (tinan 21) sei klosan, profisaun agrikultór, hela fatin Lactua, Buibau no suspeitu ho naran inisiál CJFX (26) hela fatin iha Lactua, Buibau, sei klosan, no profisaun hanesan seguransa iha armajen Centro de Loguística Nacional (CLN) Munisípiu Baucau.

Komandante António de Sá informa rezultadu investigasaun hatudu katak, kazu ne’e mosu tanba kauza hosi ódiu malu entre Grupu Arte Marsiál (GAM) balun, nune’e aproveita ho okaziaun kampaña eleitóral hosi Kandidatu PR “Lú Olo” nian ne’e halo sira ataka malu, to’o rezulta vitima ida lakon vida.

“Sira ne’e, horseik partisipa hotu iha kampaña FRETILIN nian, sira uza atributu kompletu kampaña kandidatu PR Lú Olo nian. Sira ba iha ne’ebá hotu, ba partisipa kampaña iha Darasula,” Komandante António de Sá tenik.

Komandante António afirma, konfrontu entre vitíma ho suspeitu sira ne’e, la’ós tanba motivu politika, maibé sira maioria hosi militante FRETILIN nian ne’ebé partisipa hotu iha kampaña Kndidatu PR Lú Olo nian iha Darasula. Alende ne’e, sira iha relasaun família ba malu.

“Sira ne’e ódiu partikular. Kazu ne’e liga ba GAM ona, entaun sira lori ba to’o iha kampaña, sira ba oho malu iha ne’ebá, no iha momentu ne’e kedas, hosi grupu rua ne’e ataka malu, hodi fatuk tuda ba malu,”  nia hateten.

Informasaun ne’ebé Polísia arrola husi sasin sira katak, suspeitu DC lori besi kanu, baku ba testamuña insiál PP nia liman, parte karuk, hetan kanek kuak, no mós naklés, no rán sai barak, hafoin nia fila baku mate vitima Joăo, iha ninia kanuruk, no mós kabás.

Suspeitu JFX lori bandeira nia kain, hodi baku ba vitíma no testamuña JDB ninia liman, parte karuk, ikus mai rezulta hetan kanek, no mós bubu iha liman fuan no suspeitu CJXF ne’e, liuhosi suspeitu DC ninia kotuk, lori bandeira nia kain maka baku ba iha vitima Joăo Hornai Ximenes,” Komandante António de Sá hateten.

Tuir planu, iha segunda, 14 fulan-Marsu 2022, PNTL Baucau sei aprezenta kazu ne’e ba Ministériu Públiku, no enkamiña prosesu ba Tribubál atu bele submete ba Primeiru Interrogatóriu.

Jornalista: Rogério Pereira Cárceres