Hatutan.com, (09 Marsu 2022), Díli—Polísia Nasionál Timor-Leste (PNTL), iha tersa 08 Marsu, maizumenus tuku 20:00, kaptura joven na’in-13, iha aldeia Anin Fuik, Suku Madohi, Postu Administrativu Dom Aleixo, tanba halo planu atu asalta ema ka grupu seluk ho sasán kro’at.

PNTL kaptura joven na’in 13 ho sasan kro’at iha iha aldeia Anin Fuik, Suku Madohi, Postu Administrativu Dom Aleixo, iha Tersa (08/03/2022). Foto/Hatutan.com.

Prosesu kapturasaun ne’e liuhosi atividade patrulla rutina hosi Komandu PNTL Munisipiu Díli, liuhosi Eskuadra Dom Aleixo, Unidade Espesiál da Polísia (UEP), Forsa Rezerva, iha área Dom Aleixo nian.

Notisia iha Relasaun:PNTL Detein Suspeitu SC ho CD Tanba Na’ok Sasan Xineza

Objetivu hosi patrullamentu ne’e, primeiru atu halo prevensaun ba krime no Segundu, iha mós insidente ida ne’ebé mak akontese antes iha segunda 07 Marsu, iha grupu rua mak asalta-malu iha área Raikotu.

Advertisement

“Liuhosi Servisu Informasaun Polisia, informa ba komandu katak, iha grupu balun mak organiza malu atu ataka-malu iha kalan ne’ebá, nomós iha oras ne’ebé mak sira planeia tiha ona,” Komandante PNTL Munisípiu Díli, Superintendente Xefe Polísia, Hendrique da Costa esplika ba jornalista sira iha Komandu Caicoli, Kuarta (09/03/2022).

Hafoin simu tiha informasaun ne’e, komandu orienta kedan ba ekipa UEP ho membru sira iha Eskuadra Dom Aleixo halo kedan movimentu iha área ne’ebá.

“Bainhira sira halo atividade patrulla iha ne’ebá, sira rona ema barullu iha armajen ida nia laran, depois Polisia sira besik ba observa. Iha observasaun ne’e, hetan suspeitu hamutuk ema na’in 13 mak iha hela armajen laran, sira lori sasan kroat, hanesan sikat iha kanotak no balun sira kaer hela iha liman, atu halo asaun ruma,” Superintendente Xefe Polisia, Hendrique da Costa esplika.

Sasán kroat ne’ebé mak grupu joven sira ne’e uza hodi halo krime, mak hanesan, katana maubeka haat, katan Xina nian hodi taa na’an-ida, samurai ida, fiska borraxa lima, berlindus 280, fatuk ki’ik atu uza ho fiska, iha 250, rolamentus motor 20, besi kanu nia rohan, tuku belar ida.

Liuhosi prosesu identifikasaun ba Suspeitu sira hamutuk na’in 13 ne’e, na’in tolu haruka fila, tanba la envolve iha, ka la prepara ba iha asaun krime ruma. Maibé, suspeitu na’in 10 maka halo prosesu kontinuasaun ba sira.

Advertisement

“Suspeitu na’in-rua ho naran inisial JG, PC mak organiza nia kolega na’in ualu seluk, hodi prepara sasán kro’at ne’ebé temi iha leten, atu hasoru suspeitu ka grupu seluk balun, hosi parte arte marsiais seluk, ne’ebé mak tuda no estraga uluk sira nia uma iha dia 07 Marsu 2022,” Komandante Hendrique esplika tán.

Kazu ne’e rejista iha polisia, ho Número Único Crime (NUC), 0121/2022 DICML.

Suspeitu na’in 10 ne’e, komete krime iha artigu 211, kona-bá Arma Proibidu no konjuga ho lei númeru 05/2017, rejime jurídiku relativu ho prátika de Arte Marsiais, rituais, Arma Branka, no Rama Ambon.

Suspeitu sira, agora daudaun, detein iha Sentru Detensaun Munisipiu Dili ninian ho númeru prosesu, Númeru Úniku Krime, 0124/2022, DICML, hodi hein prosesu primeiru interogatóriu ba iha tribunal.

Jornalista: Rogério Pereira Cárceres

Advertisement