Hatutan.com (13 Marsu 2022), KYIV– Jornalista Estadu Unidu Amérika (EUA), Brent Renaud, ne’ebé hala’o knaar jornalizmu perante situasaun funu iha Ukraina,  sofre no mate ho kondisaun trájiku.

Kartaun matebian Jornalista Brent Renaud. Foto/Espesiál

Antigu kontribuidór New York Times ne’e mate tanba hetan tiru husi forsa Rússia iha sidade Kyiv, Ukraina, Domingu (13/03/2022).

Tuir notísia ne’ebé Hatutan.com sita husi  JPNN.com katak, Brent Renaud la’o ba teritóriu  Irpin no haku’ur iha forsa Rússia nia-leet bainhira sira halo hela pasa revista  ka auto stop iha ponte Romanivsky. Bainhira, forsa Rússia hatene Renaud nia prezensa sertamente lansa tiru direta ba Brent Renaud.

Brent Renaud, moris iha 10 fulan-Fevereiru 1971, mete kadas iha fatin. Komandante Polísia Kyiv, Andrey Nebitov haktuir iha nia konta Facebook hateten, forsa Rússia oho jornalista mídia internasionál ne’ebé hala’o misaun atu haklaken lia-loos husi forsa agresór forsa Rússia ne’ebé lidera husi prezidente Vladimir Putin.

“Profisaun jornalista ne’e iha risku boot tebes, nune’e, Brent Renaud, sidadaun EUA ne’e lakon vida bainhira atu haklaken lia-loos ba mundu kona-bá situasaun funu iha Ukraina,” Nebitov hateten iha nia kronolojia Facebook.

Matebian  Renaud  nia kolega jornalista Juan Arredondo,  mós hetan kanek iha insidente ne’e no tuir Juan, inísiu matebian Renaud ho nia haku’uk hela ponte Irpin.

“Ami halo hela gravasaun vídeo ba refujiadu sira ne’ebé komesa husik hela sira-nia horik fatin,” Juan hateten.

Konflitu Rússia ho Ukraina ne’ebé akontese dezde loron 24 fulan-Fevereiru 2022, rezulta vitíma jornalista Brent Renaud husi EUA.

“Ami liuhusi postu operasaun no forsa Rússia tiru ami. Motorista mós halai fila kedas,” Juan haktuir.

Renaud ho Juan  mós fahe-malu atu bele salva an. Maibé, forsa Rússia hola asaun ne’ebé brutal.

“Ha’u haree Renaud hetan tiru iha nia kakorok,” Juan haktuir. (Daily Mail/NY Post/JPNN.com)