Hatutan.com, (18 Marsu 2022), Dili-Mate-isin traballadór Timoroan, Arando Abel dos Santos (37) ne’ebé mate iha Korea Súl to’o ona iha Dili, Sesta (18/03/2022).

Ilustrasaun mate-isin

Matebian Armando Abel dos Santos hetan asidente iha tasi-laran bainhira hala’o nia kna’ar to’o rezulta lakon vida (mate) iha ninia servisu fatin iha Korea Súl iha loron 02 fulan-Marsu 2022.

Diretór Diresaun Nasionál Empregu Exteriór (DNEE), Filomino Soares informa, hafoin  akontesimentu ne’e, parte autoridade sira iha Korea Súl nian halo kedan prosesu investigasaun ba kazu ne’e, liu-liu halibur informasaun sira hodi buka tuir kona-bá motivu ka kauza sira ne’ebé rezulta vítima lakon vida.

“Nia ba Korea Súl iha  tinan 2019, nia servisu iha área peska. Tanba nia hetan asidente iha servisu fatin, foin daudaun, Governu Korea Súl halo investigasaun remata ona, informasaun sira-ne’e foti ona, sira mós entrega prokuradór Korea Súl nian, depois entrega ba embaixada Timor-Leste nian iha Korea no mós ho adidu traballu, hodi orienta sira halo prosesu transladasaun  mate-isin mai iha Timor,” Filomino dos Santos informa ba Hatutan.com, iha via telefone.

Advertisement

Matebian Armando Abel dos Santos, moris iha 09 fulan-Abríl 1985, iha Aldeia Mude (Asalau), Suku Meligo, Postu Administrativu Cailaco, Munisípiu Bobonaro.

Tuir observasaun Hatutan.com iha Aeroportu Internasionál Prezidente Nicolau Lobato, Dili, hatudu katak matebian Armando nia isin-mate to’o iha  aeroportu simu direta hosi Sekretáriu Estadu Formasaun Profisionál no Empregu (SEFOPE), Diretór Jerál, Paulo Alves, diretór Empregu exterior, Filomino Soares, inklui família sira matebian nian.

Reprezentante família, Alfredo Moniz da Costa espresa sentimentu triste, tanba lakon ona sira nia alin di’ak ida ne’ebé mak durante ne’e, sempre tulun malu iha família uma-laran, hodi hasoru situasaun saida de’it.

Alfredo haktuir, mate ho idade sei klosan, hodi husik hela maun-alin hamutuk na’in-haat inklui feto ida, no mós família tomak iha sira nia uma-lisan.

Maun-boot hosi matebian sira nia uma-lisan ne’e, haktuir, durante servisu iha Korea Súl, matebian sempre haruka osan mai família sira, no liu-liu ba nia alin sira ne’ebé oras ne’e sei eskola.

Advertisement

“Foin daudaun, antes nia mate, iha fulan-Janeiru 2022, nia haruka tiha osan $5,000 mai uluk, depois  ida-ne’e nia mós haruka tán $7,000, no oras ne’e sei iha banku,” Alfredo Moniz da Costa haktuir.

Traballadór Timoroan Na’in-12 Mak Lakon Ona Vida

Diretór Filomino Soares haktuir mós katak, hahú inísiu, traballadór timoroan sira ne’ebé lakon sira ona sira nia vida (mate) bainhira servisu iha  Korea Súl hamutuk na’in-12.

“Totál traballadór sira ne’ebé mak mate iha Korea Súl ne’e, ho ida ne’e tán, hamutuk na’in-12,” Filomino Soares hateten.

Maske nune’e, durante servisu iha Korea Súl, traballadór timoroan sira na’in-900 resin  fila ona mai TL, tanba kontratu hotu ona. Maibé, sira ne’ebé servisu, kuaze 3,000.

Advertisement

Jornalista: Rogério Pereira Cárceres