Hatutan.com, (19 Marsu 2022), Dili-Kandidatu Prezidente Repúblika (PR)  2022-2027, Francisco Guterres “Lú Olo” hamutuk ho nia Sekrétariu Jerál partidu FRETILIN, Mari Bin Amude Alkatiri, deklara ho fiar an katak Kandidatu PR husi partidu FRETILIN, Francisco Guterres “Lú Olo” manan metin ona iha eleisaun prezidensiál, Sábadu (19/03/2022).

Notísia iha Relasaun: Ramos-Horta Simu Desizaun Husi Povu Mezmu La Favorese Ba Nia

Kandidatu PR 2022-2027, Francisco Guterres “Lú Olo” vota iha Eskola Farol, Dili, Sábadu (19/03/2022). Foto/Hatutan.com

“Ha’u sempre konfia ba vitória, bainhira ita haree nia rezultadu. Ha’u hatete ona katak, ha’u fiar metin, ha’u fiar metin ba ida-ne’e, husik ba povu ninia votu ne’e mak sei konfirma,” Francisco Guterres “Lú Olo” hateten ba jornalista sira, hafoin vota iha sentru votasaun Eskola Farol, Dili.

Lú Olo afirma, sé de’it mak kompete iha eleisaun prezidensiál ne’e prontu atu bele manan, no mós prontu ba atu lakon.

Advertisement

“Mais ha’u dehan katak, ha’u sei manan,” Lú Olo hateten hodi hatutan tán, bainhira nia derrota karik iha eleisaun prezidensiál ne’e, nia parte prontu atu servisu hamutuk ho PR foun ne’ebé eleitu, tanba hotu-hotu mesak Timoroan.

“Be ita Timoroan, nusa labele? kampaña hotu ona, sura de’it votu ne’e kuandu hotu ona, maka ida ne’e ona. Ida de’it sai prezidente  repúblika, ita hotu nia prezidente  repúblika. Husu ba povu tomak atu hakmatek nafatin para ita lori ita nia eleisaun ida ne’e, la’o ho di’ak,” Lú Olo afirma.

Kandidatu PR ho númeru sorteiu 06 ne’e konsidera katak,  vota nu’udár aktu ida atu hametin TL nia estadu direitu demokrátiku hodi hadi’a, hodi hala’o dezenvolvimentu ida ne’ebé sustentavel, no hadi’a povu nia moris di’ak.

Iha fatin hanesan, Sekretáriu Jerál FRETILIN, Marí Bin Amude Alkatiri hatutan, laiha liafuan  ba Lú Olo atu lakon, tanba iha eleisaun ne’e sei hatudu Lú Olo mak manan.

“Manan, nia (Lú Olo) manan tiha ona. Laiha karik iha ne’e, nia manan tiha ona. Laiha karik, hau simu dala hira ona lakon. Ema balu mak lahatene, seidauk abituadu simu lakon. Mas ida ne’e ami manan,” Alkatiri hateten ho fiar an.

Advertisement

Hatán kona-bá nia mensajen ba apoiante no militante sira atu mantein nafatin pás no dame, Alkatiri dehan, husu ba partidu seluk karik, tanba FRETILIN sempre mantein pás ho establidade.

Observasaun Hatutan.com iha sentru votasaun Eskola Farol, loke iha tuku 07:00 Otl, no votasaun hahú iha tuku 07:19. Kandidatu PR “Lú Olo” to’o iha Sentru Votasaun Eskola  Farol, iha tuku 08:07 Otl, no akompaña hosi nia espoza Cidália Mouzinho Lopes, ho Sekretáriu jerál partidu FRETILIN, Marí Bin Amude Alkatiri.

Sentru Votasaun Eskola Farol, iha estasaun hamutuk haat, kompostu hosi 01 to’o 04. Suku Motael, kompostu hosi Sentru Votasaun haat mak hanesan, Sentru Juventude Bebora, Sede Suku Motael, Eskola Farol, no Armazén Ministériu Turizmu Komérsiu no Indústria (MTCI-Sigla Português). Hosi sentru votasaun haat ne’e, eziste totál eleitór na’in- 4,939.

 Jornalista: Rogério Pereira Cárceres

Advertisement