Hatutan.com, (01 Juñu 2023), Díli—Loron 01 fulan-Juñu, hanesan loron mundiál bá labarik hotu iha mundu, inklui labarik sira iha Timor-Leste. Ho importánsia bá loron ida-ne’e, lider nasionál Timoroan sira-nian, hato’o parabéns bá labarik hotu iha mundu no liuliu labarik sira iha Timor-Leste.

Labarik Timor-Leste. Foto/Dezeñu Elio dos Santos da Costa

Tuir mai Hatutan.com sita kompletu mensajen lider nasionál sira nian bá labarik sira iha ámbitu selebrasaun loron mundiál labarik sira nian, 01 fulan-Juñu 2023. Mensajen sira-ne’e publika iha konta mídia sosiál Facebook ida-idak nian, mak hanesan Primeiro-Ministro: S.E Taur Matan Ruak, Xanana ba Ema Hotu, ho mós konta Facebook Marí Alkatiri.

Primeiru-Ministru  Taur Matan Ruak  

Ohin, 01 fulan-juñu, nu’udar loron Mundial ba Labarik sira iha mundu tomak inklui mós Labarik sira iha Timor-Leste. Tinan-tinan ita sempre festeza ho animasaun oioin hodi motiva labarik sira atu dezenvolve sira-nia talentu ba futuru. Governu, liuhosi Komisaun Direitu ba Labarik sira-nian sei kontinua buka oinsá atu tau matan ba labarik sira nia direitu fundamental sira ne’ebé hatuur ona iha polítika Governu nian. Tanba ne’e iha loron espesiál ida ne’e hakarak apela ba labarik sira hotu, atu aproveita imi nia tempu osan mean ida ne’e ho didi’ak ho estuda no estuda tanba imi mak futuru nabilan ba Timor-Leste.  

Ha’u nia mensajen xave ba imi labarik sira: “ESTUDA! ESTUDA! NO MATE IHA LIVRU NIA LETEN!”

Dala ida tan Parabéns!

Lider Karizmátiku Kay Rala Xanana Gusmão

Ohin, loron 1 Junhu 2023 hanesan loron espesial ba ita nia labarik sira. Loron Mundial ba Labarik sai eventu annual ne’ebe komemora husi nasaun hotu iha mundu no sai eventu espesial mos ba labarik Timor-Leste atu bele haksolok iha loron ida ne’e.

Loron Mundial ba Labarik nu’udar loron haksolok ba labarik sira atu bele goza sira nia tempo ho hamnasa tuir sira periodu ne’ebe gosta halimar no hahu aprende buat barak. Iha loron espesial ida ne’e, ita hanesan ema ne’ebe iha responsibilidade ba sira iha knaar boot ida atu fo tempo hamutuk ho sira, fo loron ida ne’e sai hanesan loron espesial ba sira tanba sira nu’udar futuru nasaun nian.

 Eis Primeiru-Ministru, Mari Alkatiri

Ohin, loron Internasional ba labarik.

Labarik reprezenta mehi ida nebe’e hahu husi Inan ho Aman sira nia domin ba malu.

Sira moris hanesa produtu domin nian.

Tanba ne’e futuru ba nasaun ida nebe’e hakarak harii ho domin no dame, futuru ida ne’e nia fundasi tenki klaru ba politika ida nakonu ho dame atu haburas no habelar domin ba labarik sira.

Nakonu ho dame no haburas no habelar domin ba labarik sira tenki liu husi dalan ida los atu harii kondisoens ba labarik sira hotu atu moris ho dignu, ho edukasaun ida ho kualidade, saúde ida ho qualidade no moris tomak ho dignidade.

Ne’e mak ita nia Luta nebe’e hahu tinan lima nulu ba kotuk.

A LUTA CONTINUA!

Mari Alkatiri

FUNDADOR

Jornalista Estajiáriu : Lazaro Pereira Quefi