Hatutan.com, (24 Marsu 2022), Dili– Madeleine Albright, feto primeira iha Estadu Unidu Amerika (EUA) ne’ebé asume pozisaun nudár Ministra Estranjeiru EUA nian, hakotu-iis, Kuarta (23/03/2022), oras EUA nian.

Eis Ministra Estranjeiru EUA, Madaline Albright. Foto/AP/Sait Serkan Gurbuz

Madeleine Albright  hakotu-iis ho idade tinan 84 tanba sofre moras kankru no informasaun kona-bá Albright  nia mate hato’o direita husi parte família.

“Madeleine Albright, lutadora ida ne’ebé dedika nia an tomak ba demokrasia no direitu umanu la hatene kolen. Molok nia husik nia iis ikus nian, nia nudár hela profesora iha eskola esteriór Universidade Georgetown. Nia mós nudár prezidente Albright Stonebridge Group, parte husi  Dentons Global Advisors, prezidente Albright Capital Management, prezidente Fundasaun Bolsu Estudu Harry S. Truman, Prezidente Institutu Demokrasia Nasional, Prezidente Konsellu Polítika Defeza EUA no nudár eskritora di’ak,” haktuir família Albright liuhosi deklarasaun balun ne’ebé sita hosi ABC News, Kinta (24/03/2022).

Matebian Madeleine Albright asume pozisaun Ministra Estranjeiru EUA iha mandatu prezidente Bill Clinton iha 1997-2001. Molok ne’e,  Albright nudár Embaixadór EUA ba Nasoins Unidas (ONU) iha tinan 1993-1997.

Prezidente  Clinton Bill Clinton  ho eis Ministra Estranjeiru EUA nian, Hillary Clinton iha sira-nia afirmasaun hateten, Albright hanesan ministra negósiu estranjeiru no embaixadóra ne’ebé estra-ordináriu.

“Hanesan labarik ne’ebé iha Eropa bainhira akontese funu, Madeleine ho nia família obrigatóriu halai no evakua husi sira nia uma dala-rua,” kazál  Clinton haktuir.

Karta sentidu kondolénsia husi Xanana.

“Bainhira guerra fria termina no lori era foun hodi hamosu dependénsia global, nia komesa ko’alia ona  iha ONU no  ikus mai nia hola pozisaun hodi lidera Ministériu Estranjeiru EUA nian, no nia iha espíritu boot hodi luta ba liberdade, demokrasia no direitu umanu,” kazál Clinton ne’e tenik tan.

Kazál Clinton apresia tebes ho kompromisu Albright atu hakotu no halakon etílika iha Bosnia ho Kosovo, no apoia expansaun NATO nian ba Sentrál Europa, kombate proliferasaun arma nukleár, halo esforsu ba expansaun  EUA nian hodi reforsa  populasaun sivíl, redús númeru ema ki’ak, inklui redús dívida husi nasaun sira sub-dezenvolvidu no seluk-seluk tan.  Iha komunikasaun direta ikus entre kazál Clinton ho matebian Albright semana rua liubá, hatudu katak Albright  ne’ebé ho idade tinan 84 ne’e hatudu nia permanénsia no determinadu atu sai ho nia sapatu botas hodi afirma nia pozisaun apoiu no suporta  Ukránia hodi luta nafatin ba liberdade no demokrasia.

Xanana Hato’o Sentidu Kondolénsia

Hosi sorin seluk, Lider Karizmátiku, Kay Rala Xanana Gusmão, lori pozisaun hanesan  Xefe Negosiadór Prinsipál ba Asuntu Delimitasaun Fronteira Marítima, hato’o sentidu kondolénsia ba Madaline Albright,  ne’ebé husik hela ona família no povu EUA.

Iha karta sentidu kondolénsia ne’ebé haruka ba família matebian Albright ne’ebé Hatutan.com asesu, hatudu Xanana nia espresaun sente lakon tebes ema di’ak no determinadu ida no Xanana konsidera Albright konsidera mós hanesan belun di’ak ba povu Timor Leste.

Jornalista: Vito Salvadór