Hatutan.com, (30 Marsu 2022), Díli—Governu liu hosi reuniaun Konsellu Ministru (KM)  aprova projetu Deliberasaun ne’ebé aprezenta hosi Ministru Koordenadór Assuntus Ekonómikus, Joaquim Amaral, iha ne’ebé Governu rekoñese no fó saudasaun ba manifestasaun interese investimentu privadu nian iha setór telekomunikasaun, liuliu iha instalasaun kabu fibra ótika ba rede telekomunikasaun nian.

Reuniaun KM. Foto/Média MPKM.

“Ho deliberasaun ida-ne’e, Konsellu Ministru define mós katak órgaun no servisu sira administrasaun públika nian ne’ebé iha kompeténsia, tenke halo tramitasaun ba prosedimentu administrativu sira ne’ebé maka presiza ba konkretizasaun investimentu privadu nian iha setór telekomunikasaun nian sira, tuir lei ne’ebé vigora, ho karater prioritáriu,” Hatutan.com sita komunikadu.

Projetu Fibra Ótika hahú kedan iha IV to’o V Governu Konstitusionál bainhira Governu hahú investe maka’as iha projetu nasionál eletrifikasaun.

IV governu konstitusionál iha tempu ne’ebá iha vizaun naruk hodi dada kabu Fibra Ótika ba iha estasaun no sub estasaun Eletrisidade Timor Leste (EDTL) iha Timor Laran tomak liuhosi liña tranzmisaun EDTL ho distánsia hamutuk maizumenus 603 km, atu aproveita obra Fibra ótika liuhosi liña eletrisidade.

VI (sestu) governu konstitusionál, hetan aprovasaun hosi KAFI iha Novembru 2016 liuhosi prosesu normál ba estimasaun prelimináriu, planeamentu no orsamentu, ho verifikasaun hosi ADN no prosesu Aprovizionamentu no kontratu husi CNA.

Iha loron 15 fulan Novembru 2017, asina kontratu entre Governu reprezenta hosi Primeiru Ministru VII Governu no Timor Telecom ba projetu ho naran “Fornecimento, a instalação, a configuração e o comissionamento da rede nacional principal de fibra ótica,”.

Maibé, implementasaun ba projetu ne’e, hahú loloos iha 27 Marsu 2018 tanba iha Obstákulu ligadu ba eleisaun jerál 2017 no Eleisaun Antesipada 2018, no mós regime duo décimo, tuir mós bandu esportasaun globál ba ekipamentu hosi kompañia ZTE.  Maske iha difikuldade lubun boot ida nia laran, VIII governu konsege atinji rezultadu pozitivu.

Iha loron 24 fulan Janeiru 2022, Governu Timor-Leste (TL) hala’o ona analiza no estudu tékniku ba dokumentu hosi empreza nasionál no internasionál hamutuk haat, ne’ebé sei hetan legalizasaun no aprovasaun ikus iha Konsellu Ministru (KM) molok implementa projetu ‘Fíbra Optica’ mai TL.

Empreza haat ne’e mak hanesan Sacom Tel, Metrolindo, Moratelindo no mós Telekom Indonézia internasionál.

Ministru Koordenadór ba Assuntu Ekonómiku (MKAE), Joaquim Amaral hamutuk ho Ministru Transporte Komunikasaun (MTK), José Agustinho da Silva, aprezenta ona prosesu no progressu ne’e ba Primeiru-Ministru (PM), Taur Matan Ruak.

Faze dahuluk atu dada investidór sira, TL rasik tenke prepara uluk kondisaun hanesan infraestrutura sira tenke prepara mais kompetetivu.

Kona-bá ne’e, Primeiru Ministru mós fó nia apoiu tomak no husu atu Ministériu sira kontinua servisu hamutuk hodi aselera prosesu ne’e.

Jornalista: Carmelita Isaac