Hatutan.com, (16 Maiu 2022), Díli—Konsellu Ministru (KM) liu hosi sorumtu extraordináriu aprova proposta Rezolusaun Parlamentu Nasionál (PN) nian ne’ebé aprova Konvensaun entre Repúblika Portugueza no Repúblika Demokrátika Timor-Leste (RDTL), atu evita Dupla Tributasaun no atu Prevene Evazaun Fiskál iha matéria Impostu kona-bá rendimentu.

Reuniaun Konsellu Ministru (KM). Foto/Média MOP.

Konvensaun entre Repúblika Portugueza no Repúblika Demokrátika Timor-Leste ida-ne’e, asina ona iha Lisboa iha loron 27 fulan-setembru tinan 2011.

Lee Mós: KM Aprova Proposta Lei Opsaun Planu Prinsipál 2023

Atu tama iha vigór, Konvensaun ne’e tenke aprova hosi país rua, Portugál aprova ona Konvensaun, iha loron 8 fulan-juñu tinan 2012. Ho Proposta Rezolusaun ida-ne’e, hein katak Konvensaun tama iha vigór iha país rua ne’e.

“Objetivu hosi Konvensaun ne’e maka atu halakon dupla tributasaun internasionál iha deferente kategoria rendimentu ne’ebé simu hosi rezidente Estadu rua nian, nune’e mós atu prevene evazaun fiskál. Aleinde ne’e, hakarak mós atu kontribui mós ba kriasaun enkuadramentu fiskál ne’ebé estavel ne’ebé favoravel ba dezenvolvimentu troka komersiál no investimentu entre Estadu rua ne’e, hodi halakon difikuldade fiskál ba sirkulasaun kapitál, teknolojia no traballadór sira. Ho konvensaun ida-ne’e, atu fasilita troka informasaun natureza fiskál entre administrasaun tributária sira hosi Estadu rua ne’e,” Hatutan.com sita komunikadu.

Iha sorumutuk extraordinariu ne’e, aprova mós projetu Dekretu-Lei, ne’ebé aprezenta hosi Primeiru-Ministru, Taur Matan Ruak, kona-ba alterasaun datoluk ba Dekretu-Lei nu. 14/2018, loron 17 fulan-agostu, kona-ba orgánika Governu Konstitusionál VIII no alterasaun daruak ba Dekretu-Lei nu. 20/2019, loron 31 fulan-jullu, kona-ba Orgánika Ministériu Negósiu Estranjeiru no Kooperasaun.

Alterasaun ba Dekretu-Lei nu. 14/2018, loron 17 fulan-agostu, ida ne’e ho objetivu atu inklui iha kompozisaun Governu Konstitusionál VIII, Sekretáriu Estadu Komunidade Timoroan iha Rai-Li’ur.

Ho integrasaun Sekretáriu Estadu Komunidade Timoroan iha Rai-Li’ur iha kompozisaun Governu Konstitusionál VIII, ne’ebé rekoñese nesesidade no importánsia atu asegura hodi hametin lasu komunidade timoroan iha rai-li’ur ho komunidade nasionál, nune’e mós urjénsia atu asegura mekanizmu ne’ebé efikaz liu atu envolve sidadaun ne’ebé hela no serbisu iha rai-li’ur  iha prosesu dezenvolvimentu país nian.

Aleinde ne’e, halo mós alterasaun daruak ba Dekretu-Lei nu.20/2019, loron 31 fulan-jullu, kona-ba orgánika Ministériu Negósiu Estranjeiru no Kooperasaun, ho forma atu garante armonizasaun ida-ne’e ho lei orgánika Governu nian.

Liu hosi reuniaun estraordinariu ne’e, Konsellu Ministru aprova mós Dekretu-Lei, ne’ebé aprezenta hosi Primeiru-Ministru, Taur Matan Ruak, ne’ebé presede ba alterasaun dahuluk ba Dekretu-Lei nu.27/2016, loron 29 fulan-juñu, kona-ba Rejime Jurídiku Gabinete Ministeriál sira.

Liuhosi intervensaun normativa ne’e:

• Dezenvolve kuadru normativu iha organizasaun unidade administrasaun no finansas Gabinete Primeiru Ministru nian.
• Estabelese tratamenteu diferente ba Xefe Gabinete sira, ba efeitu remuneratóriu.
• Defini direitu funsionáriu no ajente sira administrasaun públika ne’ebé rekezita no destaka atu presta atividade iha gabinete ministeriál sira simu suplementu remuneratóriu ba prestasaun serbisu estraordináriu; no
• Defini mós ba membru seguransa pesoál hosi Membru Governu sira, direitu atu simu subsídiu risku nian iha kondisaun hanesan no ne’ebé  prevee ba seguransa pesoál Prezidente Repúblika nian.

Konsellu Ministru aprova mós projetu Dekretu-Lei, ne’ebé aprezenta hosi Primeiru-Ministru, Taur Matan Ruak, kona-ba obrigatoriedade atu sosa produtu nasionál sira iha ámbitu kontratasaun públika. Diploma ne’e estabelese obrigatoriedade atu sosa hosi administrasaun direta no indireta Estadu nian, pelumenus, 75% hosi sasan ne’ebé prodúz iha Timor-Leste, iha ámbitu operasaun kontratasaun públika kona-ba aihan ba konsumu ema nian.  Objetivu hosi medida hirak ne’e maka: hosi sorin ida, atu garante katak uma-ka’in sira ne’ebé mak ekonómikamente no sosialmente mukit tebes sei la lakon asesu ba aihan, rezultadu hosi aumentu signifikativu iha ninia presu.

Ho forma ne’e Estadu propoin atu ezekuta konjuntu medidas ne’ebé aumenta konfiansa ba operadór ekonómika sira, liuliu ba agrikultór sira, atu aumenta produsaun nasionál ba produtu agríkola sira.

Konsellu Ministru aprova  mós projetu Dekretu-Lei, ne’ebé aprezenta hosi Ministru Turizmu, Komérsiu no Indústria, José Lucas do Carmo da Silva, kona-ba alterasaun dahuluk ba Dekretu-Lei nu. 8/2022, loron 16 fulan-fevereiru, ne’ebé kria liña kréditu “ Fasilidade Garantia Kréditu Suave”. Hodi konsidera interese boot ne’ebé medida ne’e kria hamutuk ho setór privadu, Governu konsidera ne’e relevante atu hametin apoiu sira iha kuadru liña kréditu, ne’ebé introdúz iha alterasaun hirak tuir-mai ne’e:

• Inkui posibilidade empreza boot sai benefisiária;
• Valór totál hosi liña kréditu aumenta ba dolar amerikanu millaun lima-nulu
• Valór limite másimu hosi valór garantia kréditu ne’ebé fó ba kada empreza mikru, kiík, média ne’ebé selesiona atu hetan benefísiu hosi medida ne’e aumenta ba dolar amerikanu rihun atus- rua-lima-nulu
• Valór limite másimu garantia kréditu ne’ebé fó ba kada empreza boot ne’ebé selesiona ona atu hetan benefísiu hosi medida ne’e aumenta ba dolar amerikanu millaun ida.
• Prazu másimu hosi kontratu muda hosi tinan 3 ba tinan 10

Alterasaun bakuadru normativu liña kréditu “Fasilidade Garantia Kréditu Suave” ne’e atu konkretiza kompromisu ne’ebé iha Programa Governu nian atu kria kondisaun posivel sira hotu atu hasa’e diversifikasaun ekonómika, iha área produtiva, hanesan iha agrikultura, pekuária, peska no turizmu, aleinde setór indústria.

Ikus liu Konsellu Ministrus aprova Projetu Dekretu-Lei, ne’ebé aprezenta hosi Ministru Ensinu Superiór, Siénsia no Kultura, Longuinhos dos Santos, kona-ba medida apoiu ba estabelesimentu ensinu superiór privadu atu asesu ba internet. Medida ne’e ho objetivu atu fasilita asesu ba internet hosi parte dosente no estudante ensinu superiór privadu sira.

Apoiu estabelesimentu ba ensinu superiór privadu atu asesu ba internet ne’e konkretiza liuhosi pagamentu, hosi Estadu, ba kustu instalasaun no manutensaun ligasaun ba internet hosi parte dosente no estudante ensinu superiór privadu sira, hanesan valór relasiona ho tráfegu internet. 

Jornalista: Vito Salvadór