Hatutan.com, (25 Maiu 2022), Díli—Konsellu Ministru (KM) liu hosi sorumutu ordináriu iha Palásiu Governu, aprova projetu Proposta Lei ba autorizasaun lejizlativa kona-bá rekuperasaun empreza sira no insolvénsia, ne’ebé aprezenta hosi Ministru Koordenadór Assuntu Ekonómiku, Joaquim Amaral.

“Objetivu hosi pedidu autorizasaun lejizlativa nian ne’e ba Parlamentu Nasionál atu elabora lei moderna ida kona-bá Rekuperasaun no Insolvénsia, hanesan elementu esensiál ba kreximentu tesidu ekonómiku no investimentu país nian,” Hatutan.com sita komunikadu.

Lee Mós: KM Autoriza Loke Prosesu Tenderizasaun ba Rehabilitasaun Estrada Laga-Baguia

Nesesidade ida-ne’e mai hosi intensaun Governu Konstitusionál VIII atu transforma baze ekonomia timoroan nian hodi hasa’e reziliénsia no potensiál kreximentu, apoia no rezolve situasaun empreza sira nian ne’ebé iha situasaun finanseira difísil, maibé sei iha kondisaun ekonómika atu la’o.

Aleinde ne’e, atu fó resposta ba ezijénsia sira kona-bá integrasaun ba ASEAN no OMK ho kuadru lejizlativu ida ne’ebé reponde ba nesesidade sira país nian no ba kompromisu ne’ebé assume iha ámbitu internasionál.

Konsellu Ministru aprova projetu Dekretu-Lei ne’ebé halo alterasaun dahuluk ba Dekretu-Lei n.45/2015, loron 30 fulan-dezembru, ne’ebé kria Ajénsia Promosaun Investimentu no Esportasaun Timor-Leste,I.P, ne’ebé aprezenta mós hosi Ministru Koordenadór Assuntu Ekonómiku, Joaquim Amaral.

Diploma ida-ne’e ho objetivu atu ajusta rejime jurídiku TradeInvest, reforsa ninia kompeténsia sira hanesan entidade governamentál responsável ba promosaun, fasilitasaun no akompañamentu ba investimentu privadu no esportasaun sira iha Timor-Leste.

Aleinde ne’e, ho alterasaun ida ne’e iha objetivu atu garante uniformidade no konsisténsia hosi ordenamentu jurídiku nasionál, mak hanesan ajusta rejime jurídiku hosi ajénsia governamentál ida-ne’e ba Dekretu-Lei n.17/2015, loron 23 fulan-agostu, Lei Investimentu Privadu, ba Dekretu-Lei n.16/2021, loron 15 fulan-setembru, kona-bá Baze Jerál sira Organizasaun Administrasaun Públika nian no ba Dekretu-Lei n. 30/2020, loron 29 fulan-jullu, kona-ba Organizasaun Direta no Indireta Estadu nian.

Jornalista: Vito Salvadór