Hatutan.com, (04 Abríl 2022), Dili-Governu Austrália liuhosi sira-nia embaixada iha Timor-Leste, iha kompromisu boot hodi prioritize nia apoiu mai povu Timor-Leste iha programa bolsa da mãe jerasaun foun ninian.

Embaixadór Austrália iha TL, Bill Costello foto hamutuk ho Vise Primeira-Ministra, no Ministra Solidariedade Sosiál no Inkluzaun (MSSI), Armanda Berta dos Santos. Foto/Hatutan.com

Embaixadór Austrália iha TL, Bill Costello hateten, Governu Austrália no Timor-Leste, hakarak servisu hamutuk iha kestaun barak, liu-liu kona-bá igualdade no jéneru, programa kona-bá oinsá mak atu hakotu violénsia hasoru feto no labarik feto sira, inklui fó apoiu iha programa defisiénsia nian, no nutrisaun ninian ne’ebé importante tebe-tebes ba dezenvolvimentu ema nian iha Timor-Leste.

“Programa ida ne’ebé importante tebetebes ne’ebé ohin ami diskute mak, programa ida ne’ebé hanaran “bolsa da mãe jerasaun foun,” Embaixadór Austrália iha TL, Bill Costello hateten ba jornalista sira, hafoin halo reuniaun ho Vise Primeira-Ministra (VPM), Armanda Berta dos Santos, iha Salaun MSSI, Caicoli, Segunda (04/04/2022).

Bill Costello hatutan, iha programa bolsa da mãe jerasaun foun ne’e, sei apoiu osan ba inan no labarik sira ne’ebé sira nia idade  ki’ik, atu reforsa família sira, hodi bele fó nutrisaun di’ak ba sira-nia oan.

Atu atinje meta hirak ne’e, Austrália nia ekipa tékniku sira halo hela servisu ne’ebé mak maka’as  tebes hamutuk ho Ministériu Solidariedade Sosiál no Inkluzaun (MSSI), atu haree oinsá bele halo rejistu ba inan sira, hodi bele asesu ba osan liuhosi programa ne’e.

Programa ne’e sei lansa iha tinan 2022 nia klaran, no munisípiu Ainaro, Bobonaro, no Rejiaun Administrativa Espesiál Oé-cusse Ambeno (RAEOA), mak sai hanesan projetu pilotu ida, molok implementa tán ba munisípiu 10 seluk iha territóriu Timor-Leste.

“Ida ne’e hanesan ezemplu ida, sé ita halo di’ak ho programa ne’e di’ak tebes, ita sei haluan liután iha munisípiu hotu-hotu. Maibé ,ami koko atu téknikamente halo ida uluk ne’e di’ak liu lai, hodi nune’e bele sai ezemplu ba munisípiu hotu,” Embaixadór Bill Costello esplika tán.

Implementasaun ba programa ne’e, Governu Austrália valór orsamentu hamutuk tokon-hitu, dollár Australianu ka ekivalente ho  US$5,000,000.00.

Embaixadór Bill Costello sente priviléjiu no haksolok tebes, tanba bele hasoru ho Vise Primeira-Ministra no Ministra Solidariedade Sosiál no Inkluzaun (MSSI), Armanda Berta dos Santos, hodi ko’alia kona-bá asuntu sira dezenvolvimentu ema no mós ho programa protesaun sosiál ninian.

Liuhosi karta komunikadu, Vise Primeira-Ministra, Armanda Berta dos Santos, hato’o nia apresiasaun profundal ba suporta ne’ebé durante ne’e Governu Austrália oferese ona mai TL, no ohin, kontinua koopera tán planu sira ba oin. 

“Apresiasaun profunda ba suporta ne’ebé Governu Austrália oferese mai Governu Timor-Leste espesialmente apoiu vasina mai povu no hatudu rezultadu ne’ebé signifikante tebes kona-bá pandémia surtu Covid-19,” Armanda Berta dos Santos hateten.

Primeira Ministra Interina ne’e dehan, 2021 nudár tinan ne’ebé difisil tebes, maibé ohin ho esforsu no kompromisu boot entre nasaun Australia ho Timor-Leste, bele konsege ultrapasa situasaun sira ne’e hodi hasa’e imunidade populasaun nian, liuhosi vasina ne’ebé kontinua fornese to’o ohin loron iha territóriu laran tomak.

Governante ne’e mós husu atu hametin liután koordenasaun efetivu ho liña ministériu sira iha setór sosiál nian ho integradu, inklui hametin komunikasaun ho Ministériu Finansa (MF), liuhosi diresaun jerál Planeamentu no Orsamentu no ANAPMA.

Governu hili setór sosiál sai nudár ezemplu ida di’ak liu ba setór sira seluk bazeia ba mekanizmu ne’ebé uza ho entidade sira, atu iha koordenasaun liután, no estruturadu kompara ho setór seluk.

“Agradese ba programa Bolsa da Mãe Jerasaun Foun nudár investimentu di’ak ba futuru,” Armanda Berta dos Santos hateten.

Jornalista: Rogério Pereira Cárceres