Hatutan.com, (04 Abríl 2022), Díli- Kandidatu Prezidente Repúblika ho númeru sorteiu 1 (ida), José Manuel Ramos-Horta, liu husi nia ekipa susesu enfatiza ba povu  Timor-Leste katak bainhira eleitu iha eleisaun segunda volta no asume Prezidente Repúblika 2022-2027 kontinua servisu hodi liberta povu liu husi halo reforma iha área mikro finansas no dezenvolvimentu kapitál umanu no kria empregu ba foin-sa’e sira.

Notísia iha Relasaun: Assanami: Xanana-Horta Nia Ukun mak Eletrisidade Hale’u Timor

Kandidatu PR 2022-2027, José Manuel Ramos-Horta. Foto/Hatutan.com

Porta vóz Kandidatu PR José Ramos-Horta ba asuntu polítiku, Dionísio Babo liuhusi konferénsia ba imprensa iha sede nasional Kandidatu PR Ramos-Horta, Hudi Laran, Díli, Segunda (04/04/2022) hateten,  Ramos-Horta bainhira eleitu no nudár prezidente repúblika sei fó enfatiza ba prosesu desentralizasaun administrativa, kontinua halo reforma iha área mikro finansas no kontinua aposta no halo reforma legál no ida seluk mak dezenvolvimentu kapitál sosiál ne’ebé aposta iha dezenvolvimentu hodi servisu hamutuk ho Governu hodi investe maka’as ba iha foin-sa’e sira ne’ebé ho idade produtivu hodi hadi’a kreximentu ekonomia Timor-Leste nian.

Prezidente Repúblika iha obrigasaun morál politika atu obriga Governu aposta programa sira iha setór produtivu hodi fó benefísiu ba joven sira hodi redús númeru dezempregu iha Timor-Leste.

Konsiente katak kreximentu ekonomiku iha Timor Leste iha tinan lima ikus tun kauza husi jestaun no lideransa estadu nian ne’ebé inkapasidade no ida seluk todan husi pandemia COVID-19 halo situasaun politika, ekonomiku no sosial ne’ebé iha krize nanis, prezudika liután Timoroan sira.

“Ita louva povu Timoroan tomak, CNRT hamutuk ho aliadu no apoiante sira tomak ba pás no estabilidade no hamutuk ho ita-nia kandidatu José Ramos-Horta ita komprometidu atu kontinua lori povu sai husi situasaun susar hodi hakat ba oin ho kompromisu polítika ne’ebé iha,” Dionísio Babo hateten.

Dionísio Babo hatutan, labele politiza uma kbiit laek, subsídiu ba suku no seluk tan ba interese partidu hodi obriga eleitór sira atu fó votu iha loron eleisaun segunda volta nian, 19 fulan-Abríl 2022.

Iha parte seluk porta vóz asuntu jurídiku no konstituisaun, Avelino Coelho hateten, iha loron votasaun eleitór sira sei la vota de’it ba José Ramos-Horta, maibé vota ba prepozisaun orden konstitusionál hodi hametin no konsolida dezenvolvimentu no hatuur lolos iha nia fatin aktu istóriku ema hotu nian.

“Ema hotu nia kontribuisaun ita labele nega iha prosesu libertasaun rai doben ida ne’e,” Avelino Coelho hateten.

Avelino Coelho hatutan, la bele halo distorsaun faktu istóriku hodi minimiza kontribuisaun lider ida nian tamba interese partidária.

Iha konferénsia ba imprensa ne’e, porta vóz kandidatu José Ramos-Horta mos lamenta ho komísiu husi adversáriu politiku hamutuk ho nia apoiante sira halo alegasaun kona-bá fraude eleitorál no promete sei buka tuir faktu hotu no husu autoridade seguransa atu halo investigasaun.

Jornalista: Vito Salvador