Hatutan.com, (25 Maiu 2022), Díli—Konsellu Ministru (KM) aprova projetu Dekretu-Lei valór mínimu ba pensaun invalidés no ferik-katuas, Pensaun Sosiál no kria Sistema Verifikasaun ba Inkapasidade sira, ne’ebé aprezenta hosi Vise-Primeira-Ministra no Ministra Solidariedade Sosiál no Inkluzaun, (MSSI) Armanda Berta dos Santos.

Reuniaun KM. Foto/Média MPKM.

Dahuluk mak projetu Dekretu-Lei ne’ebé aprova valór mínimu ba pensaun invalidés no ferik-katuas.

Lee Mós: Dekretu-Lei ba Aprovasaun Konstituisaun Fundu Rezerva Seguransa Sosiál iha Ona

Objetivu hosi proposta ne’e atu garante valór mínimu pensaun invalidés no ferik-katuas, iha ámbitu rejime kontributivu seguransa sosiál nian, bazeia ba karreira kontributiva traballadór sira nian.

Advertisement

“Nune’e, objetivu maka atu garante katak pensaun sira ne’e, hosi rejime kontributivu, nunka sei iha valór ida-ne’ebé ki’ik duké pensaun sosiál sira, hodi nune’e bele valoriza esforsu kontributivu traballadór sira nian,” Hatutan.com sita komunikadu.

Daruak maka projetu Dekretu-Lei ne’ebé aprova Pensaun Sosiál.

Prestasaun sosiál foun, ne’ebé kria hosi diploma ida-ne’e, ho karáter pensaun sosiál ida no la’ós subsídiu, objetivu maka atu asegura rendimentu ida mínimu ne’ebé dignu ba ema hotu ne’ebé presiza liu, tanba laiha rendimentu seluk no iha situasaun ferik-katuas ka invalidés.

Pensaun sosiál ida-ne’e sei substitui Subsídiu Apoiu ba Ferik-Katuas no Inválidu sira (SAII), hodi halo sistema seguransa sosiál sai justu liután.

Ho alterasaun lejizlativa ida-ne’e pretende alterasaun sira tuirmai ne’e:

Advertisement

• Muda konseitu, hosi subsídiu ba pensaun sosiál;
• Altera ámbitu pesoál hodi inklui traballadór sira ne’ebé inklui iha sistema kontributivu, maske laiha direitu ba pensaun;
• Ajusta valór prestasaun nian, hodi garante katak valór pensaun nian la ki’ik liu duké limite liña pobreza internasionál nian;
• La permite akumulasaun ho rendimentu seluk ba benefisiáriu foun;
• Altera periodu ba pagamentu sira, hosi pagamentu semestrál ba pagamentu mensál;

Datoluk maka projetu Dekretu-Lei ne’ebé kria Sistema Verifikasaun ba Inkapasidade sira.

Objetivu hosi projetu ne’e maka atu kria sistema ida hodi halo verifikasaun ba situasaun inkapasidade ba efeitu atribuisaun prestasaun sosiál nian. Ho diploma ida-ne’e, define prosedimentu administrativu ba verifikasaun téknika iha situasaun inkapasidade.

Servisu Verifikasaun Inkapasidade hanesan instrumentu tékniku espesializadu ida, kompostu hosi meius téknikus no materiais, ne’ebé  sei funsiona iha servisu integradu iha Institutu Nasionál no Seguransa Sosiál (INSS): servisu perísia médika no servisu apoiu administrativu.

Jornalista: Vito Salvadór

Advertisement