Hatutan.com, (27 Abríl 2023), Manatuto — Partidu Kmanek Haburas Unidade Nasionál Timor Oan (KHUNTO) promete bá povu hadi’a infraestrutura bázika atu povu bele moris ho dignu.

Lee Mós : KHUNTO Kompromete Tau Atensaun Bá Infrastrutura Bázika iha Lautem

Kampaña Partidu KHUNTO iha Munisípiu Manatuto, Kinta (28/4/2023). Foto/P.KHUNTO

Liuhosi kampaña polítika Partidu KHUNTO nian bá da-ualu iha Manatuto,  Kinta (27/4/2023), Prezidente Partidu KHUNTO, Armanda Berta da Silva dos Santos, afirma bainhira povu fó fiar bá partidu KHUNTO kontínua iha Governu da-IX períodu 2023-2028, tenke hadi’a liután kondisaun infraestrutura bázika bá povu, hanesan bee-moos, saneamentu, estrada, eletrisidade. Nune’e, povu bele moris ho dignu.   

Atuál Vise- Vise-Primeira-Ministra  iha VIII Governu Konstitusionál  ne’e afirma veteranus no povu mak tene  moris iha dignu. Dignu iha sira-nia hela fatin, tanba veteranu no povu sira-nia sakrifísiu mak rai ida-ne’e hetan liberdade.

“Sé la iha povu, sei la iha mós Estadu,” Armanda Berta dos Santos hateten hodi hatutan tan, bainhira povu kontinua fó konfiansa bá KHUNTO hodi hola parte iha Governu Konstitusionál da-IX, KHUNTO hakarak hadi’a di’ak liu tan seitór oi-oin, hanesan edukasaun, saúde, kria infrastrutura bázikas no kria kampu serbisu bá joven sira.

Nia hateten, KHUNTO hatudu dadauk ona iha Governu Konstitusionál da-VIII maské iha tinan hira ne’e, Governu ida-ne’e hasoru pandemia COVID-19  no dezastre naturál, maibé KHUNTO nia lideransa sira iha pozisaun xave sira, kontinua esforsu hodi implementa programa hotu, hodi atende ba povu-nia halerik sira.

Iha biban ne’e, lider supremu partidu KHUNTO,  José dos Santos “Naimori Bucar” afirma, timoroan tomak tenke hamutuk hodi sai família ida de’it atu lori dezenvolvimentu ne’e besik liu tan bá povu.

Nia hatutan, KHUNTO iha manifestu polítika nu’udar matadalan ida bá KHUNTO ninia ema sira bá asume kargu xave sira, hodi implementa de’it.

Partidu KHUNTO hala’o kampaña iha Munisípiu Manatuto, Kinta (27/4/2023). Foto/P.KHUNTO

Iha fatin hanesan kuadru médiu partidu KHUNTO,  António Armindo, fó sasin katak  durante KHUNTO nia ema bá asume pasta nu’udar Vise-Ministru Interior, KHUNTO implementa programa sira ne’ebé aliña-an iha Planu Estratéjiku Dezenvolvimentu Nasionál 2011 – 2030, hodi garantia estabilidade iha nasaun ida-ne’e.

Programa hirak ne’e, tuir António Armindo, la sees husi manifestu polítika Partidu KHUNTO ninian bá tinan lima nian, ne’ebé Líder Supremu Partidu KHUNTO sempre akonsela. Ho nune’e, bainhira iha on aestabilidade iha nasaun laran, dezenvolvimentu ne’e bele la’o tuir programa hirak ne’ebé mak aprova ona.

Sita hosi komunikadu imprensa Partidu KHUNTO nian, Konseleiru Nasionál,  Amuzi Magno halo apelu bá KHUNTO-oan sira lalika halo reasaun  negativa bá komentáriu negativa sira bá kuadru másimu partidu KHUNTO nian iha sira-nia serbisu sira. Maibé, foti kritika sira-ne’e  sai nu’udar pontu pozitivu atu meloria prestasaun servisu bá povu no rai ida-ne’e.

Komísiu Eleitorál ne’e hetan observasaun direita husi CNE no PDHJ, inklui hetan seguransa husi parte kompotente sira. Komísiu Eleitorál da-IX nian kontinua hala’o iha Kampu Futeból Hera, Postu Administivu Kristu Rei, Sábadu  (29/4/2023).

Jornalista : Vito Salvadór