Hatutan.com, (07 Abril 2022), Díli—Folin kombustivel (gazolina no gazóleu) iha merkadu nasionál, loron ba loron sa’e maka’as. Dezde fulan-Fevereiru to’o fulan Abríl, tinan ne’e, kombustivel nia folin hahú sa’e husi $1.10/litru  to’o $1.26/litru.

Folin kombustivel ne’e bazeia ba dadus no levantamentu ne’ebé TANE Konsumedór foti iha estasaun kombustivel 19 iha kapitál Díli ho distribuidór tolu hanesan, PERTAMINA internasionál, Esperansa Timoroan (ETO) ho Globál.

Foto Ilustrasaun foti husi Google

Estasaun kombustivel sira ne’ebé eziste iha Dili laran no sai hanesan alvu peskiza no levantamentu dadus husi TANE  Konsumidór nian hodi foti dadus, maka hanesan Estasaun kombustivel 19 mak hanesan Pertamina Fuel, 99 Fuel Station, Belak Fuel Station, Mãe da Graça Fuel, Borala Fuel, Lafaek Oil & Gas Fuel, Aitula Fuel, Mekar Fuel, De Shun Fuel, Mega Petroleum, 68 Petro Station, Eto Fuel, Mira Mar Fuel, Realistic Fuel, East Gas Fuel, Culuhun Fuel Station, Chongti Petrol, Super Fuel no Eto Fuel.

Haree ba fenómenu ne’e, TANE Konsumidór hato’o ona sujestaun ba Governu, maibé to’o agora seidauk iha resposta no laiha kontrolu husi Governu ka Governu la halo buat ida atu responde situasaun ida-ne’e.

“Folin mina kompara husi fulan-Marsu to’o fulan-Abríl kontinua sa’e maka’as no situasaun ida-ne’e hatudu momoos katak Governu la kontrola folin mina, maibé husik merkadu maka atu regula-an no TANE hato’o sujestaun sira Governu mós laiha resposta husi Governu,” Diretór TANE konsumidór, António Ramos  hateten liu husi konferénsia imprensa ne’ebé hala’o iha Vila-Verde-Dili, Kinta (07/04/2022).

Bazeia ba rezultadu peskiza ne’ebé halo hosi TANE konsumidór iha fulan-Fevereiru to’o fulan-Abríl hatudu katak, estasaun kombustivel PERTAMINA fuel boot liu kompara ho seluk, tanba aplika folin gazolina no gazóleu ho montante kada litru $1.26 ne’ebé mai hosi distribuidór PERTAMINA internasionál.

Estasaun kombustivel Realistic Fuel mak aplika folin ki’ik liu ba gazolina no gazóleu ho kada litru $1,10.

tuir mai tabele folin gazolina no gazóleu iha estasaun kombustivel sira ne’ebé ezeiste iha Dili laran 

Jornalista: Carmelita Isaac