Hatutan.com (12 Abríl 2022) Díli—Tribunál Distritál Díli (TDD) iha Tersa 12 fulan ne’e, hala’o primeiru julgamentu ba krime burla agravadu ne’ebé deskonfia involve emprezáriu na’in-ida arguidu CXG.

Julgamentu ba emprezáriu ne’e, tanba utiliza lezadu Jaime da Silva nia sertifikadu rai hodi fó garantia kréditu iha Banco Nacional Ultramarino (BNU) ho montante $60.000, hodi sosa saham kompãnia Timor Estividor, maibé to’o agora la fó fila lezadu nia sertifikadu rai. 

Iha audiénsia julgamentu, arguidu rekoñese momentu ne’eba laiha osan hodi sosa saham kompãnia Timor Estividor, nune’e uza lezadu nia sertifikadu rai hodi fó garantidu ba Banku hodi fó kréditu ho montante $60.000.

Maibé, laiha akordu ho lezadu atu fahe lukru tanba momentu ne’eba lezadu oferese sertifikadu rai ne’e ho gratuita ba utilizasaun durante periudu tinan tolu.

“Momentu ne’eba lezadu sei servisu iha ha’u nia kompãnia hanesan koordenadór iha konstrusaun sivil tanba ne’e nia oferese sertifikadu rai ne’e mai ha’u ho gratuita,” deklara iha audiénsia.

Hafoin rona arguidu, Tribunál adi’a hikas julgamentu ba loron seluk hodi kontinua rona sasin sira.

Antes ne’e, tuir akuzasaun hosi MP katak arguidu hanesan emprezáriu, maibé iha fulan Fevereiru tinan 2014 lezadu ajuda arguidu hodi oferese sertifikadu rai ba arguidu hodi utiliza ba garantidu kréditu iha Banku BNU ho montante $60.000 hodi sosa saham hosi kompãnia Timor Estividor maibé ho kondisaun ida katak, bainhira iha lukru hosi saham ne’e lezadu ho arguidu sei fahe.

Maibé, realidade depois de arguidu kréditu arguidu dezliga telemóvel to’o agora no lezadu husu fali sertifikadu rai maibé arguidu dehan banku foti ona.

Tanba ne’e, MP akuza arguidu ba pratika krime Burla agravadu ne’ebé previstu iha artigu 267 hosi kódigu penál TL.

Audiénsia julgamentu prezide hosi Juiz kolektivu, Afonso Carmona, Ercilia de Jesus no Evangelino Belo, Ministériu Públiku reprezenta hosi Prokuradór Reinato Berenahak, arguidu hetan asisténsia legál hosi Defensór Públiku.

Jornalista: Carmelita Isaac