Hatutan.com, (25 Abríl 2022), Díli- Embaixadór Xina mai Timor-Leste, Xiao Jianguo, kontinua hatudu nia prontidaun hodi serbisu hamutuk ho  Gabinete Primeira Dama atu tulun timoroan sira iha área edukasaun, saúde, ekonomia no sosiál.

Lee Mós : Espoza Prezidente Repúblika Manán Prémiu GWLHOF ba Luta Kontra Dezigualdade

Embaixadór China ba Timor-Leste, Xiao Jianguo, hasoru malu ho espoza Prezidenti Repúblika Cidália Nobre Lopes Mouzinho Guterres. Foto/Média Gabinete Primeira Dama

Dezde Timor-Leste restaura nia independénsia  iha tinan 20-liubá  (20 Maiu 2002-2022), Governu Xina sempre tulun Timor-Leste iha setór oin-oin.

Primeira Dama, Cidalia Lopes Nobre Mouzinho Guterres, ba jornalista sira hafoin hasoru malu ho Embaixadór Xina, Xiao Jianguo iha Palásiu Prezidensiál, Díli, Segunda (25/04/2022), hateten Governu no Estadu Xina iha kompromisu  boot atu tulun nafatin Timor-Leste liu husi Gabinete Primeira Dama bazeia bá relatóriu no pedidu ba atividade sira ne’ebé Gabinete Primeira Dama aprezenta.

Embaixadór Xiao Jianguo orgullu ho prestasaun no serbisu ne’ebé Gabinete Primeira Dama hala’o durante ne’e hodi tulun orfanatu sira, apoiu família kbiit-laek no inválidu sira, tulun estudante sira no tau matan ba problema saúde komunitáriu, liuliu iha programa espesífiku sira bá inan no labarik feto sira.

Tuir avaliasaun Primeira Dama nian katak Timor-Leste sei menus iha fasilidade saúde, nune’e Gabinete Primeira Dama sempre buka meius oinsá tulun komunidade sira li husi tratamentu saúde ne’ebé gabinete oferese dezde 2017 to’o oras ne’e.

Jornalista: Vito Salvador