Hatutan.com (27 Abríl 2022) Díli—Diresaun Nasionál Transporte Terrestre (DNTT), mantein nafatin ho tarifa ba pasajeiru mikrolete, hahú hosi 01 to’o 12 ho folin $0.15 ba estudante no $0.25 ba pasajeiru bai-bain ho razaun Governu sei oferese subsídiu kombustível.

Diretór Nasionál DNTT, António da Costa. Foto/Hatutan.com.

Maski iha lamentasaun barak hosi kondutór sira tanba folin mina ne’ebé sa’e iha merkadu nasionál, maibé DNTT sei la halo mudansa ba tarifa ne’ebé antes ne’e estabelese ona.

Lee Mós: Mikrolete iha Díli Greve Tanba Konbustível Folin Sa’e

“Horisehik ami bolu ona reprezentante kondutór mikrolete sira ne’e, hodi esplika kona-bá pozisaun Governu liu hosi DNTT to’o agora seidauk hasa’e tarifa ba pasajeiru sira ho razaun, primeiru la’ós mina de’it mak folin sa’e maibé ai-han báziku komesa sa’e. Segundu, liga ho problema ne’e Konselhu Ministru hasai ona dekretu Governu hodi fó subsídiu ba transporte públiku hotu hamutuk 3.871 iha territóriu Timor inklui Munisípiu sira. Tanba ne’e, horisehik ha’u ko’alia ho sira atu aguenta hodi atende lai pasjeiru sira liu-liu estudante hirak ne’ebé sei tuir ezame hodi hein implementasaun subsídiu ne’e,” Diretór Nasionál DNTT, António da Costa hateten ba jornalista sira iha knaar fatin DNTT, Balide, Kuarta (27/04/2022).

DNTT husu ba motorista sira atu labele hasa’e tarifa ba estudante no ba ema bai-bain sen koñesimentu hosi DNTT, tanba bainhira iha keixa ruma maka DNTT sei aplika multa no hasai lisensa operasaun hosi mikrolete ne’ebé hasa’e tarifa tuir sira nia hakarak.

Kona-bá subsídiu ne’e rasik, daudaun DNTT nasionál no Munisípiu sei halo preparasaun hodi alista karreta hirak ne’ebé tula pasajeiru tantu bus, angguna no mikrolete ne’ebé hetan lisensa operasaun hodi oferese subsídiu ne’e.

Subsídiu ne’e rasik fó durante fulan tolu, hahú iha fulan Maiu to’o Jullu ho montante kada fulan $150.

Atu implementa Dekretu Lei Númeru 18/2022, kona-bá atribuisaun subsídiu kombustível bá operadór transporte rodoviário públiku, aeros, marítima  nasionál no adkirentes  konvustível ba atividade agríkola no peska, iha Segunda (25/04/2022), Ministériu Petróleu no Rekursu  Minerál (MPRM) liu hosi Autoridade Nasionál Petróleu no Minerál (ANPM) halo ona sosializasaun ba operadores postu abastesimentu kombustível 59 iha territóriu nasionál ne’ebé hetan ona atribuisaun sertifikadu lisensa operasaun nian husi ANPM.

Iha loron 13 fulan-Abríl 2022, Konsellu Ministrus aprova Dekretu-Lei ne’e hodi hatán bá folin kombustível ne’ebé sa’e maka’as tanba efeitu husi funu Rúsia hasoru Ukránia.

Nune’e, Prezidente Repúblika aprova iha loron 19 fulan-Abríl no dekretu ne’e estabelese subsídiu finanseiru, ho natureza esesional no tranzitória ho objetivu hamenus impaktu ekonómiku husi folin kombustível ne’ebé sa’e.

Kombustível subsídiu ne’e atribui bá operadores transportes públiku no bá adkirentes kombustível destinadu ba atividades agríkola no piskatória.

Iha postu abastenamentu konbustível hamutuk 59 iha territóriu nasionál mak hetan lisensa operasionál husi ANPM, nune’e Governu sei fó de’it lisensa bá empreza hirak ne’ebé iha lisensa no sei la autoriza atu benefisiariu sira lori voucher bá enxe kombustível iha postu abastenamentu kombustível sira ne’ebé lahetan lisensa husi Governu liu husi MPRM diresaun ANPM.

Jornalista: Carmelita Isaac