Hatutan.com, (28 Abríl 2022), Díli-Polísia Nasionál Timor-Leste (PNTL) Munisípiu Díli, liuhosi Eskuadra Kristu Rei, halo apreensaun ba motór 500, karreta mikrolete 11 no taxi haat (4) tanba viola lei seguransa rodoviariu.

Lee Mós : Motorizada Estadu Nian Rua Ne’ebé PNTL Prende iha Ámbitu Kampaña Seidauk Foti

Polísia Unidade Tranzitu Kontinua halo operasaun bá movimentu transporte iha Díli laran. Foto/Média PNTL

Karreta ho motór hirak ne’e autoridade PNTL halo apreensaun liuhusi operasaun pro-ativu iha tempu kalan dezde 21 to’o 27 kalan, fulan-Abríl ne’e.

Komandante PNTL Munisípiu Díli, Superintendente Xefe Henrique da Costa informa, operasaun ne’e ho objetivu atu kontrola sasán kro’at (arma branka), dokumentu sira motór karreta nian, inklui asesória sira hanesan espellu ho xapa matrikula.

“Evidénsia ne’ebé ohin eskuadra Kristu Rei halo ne’e, identifika katak, iha motór hamutuk 500, mikrolete 11, ho mós Taxi 4. Ida-ne’e maka sira prende, no sei pasa mai iha Tránzitu Munisípiu Díli  hodi aplika multa bá sira,” Superintendente Xefe Henrique da Costa informa ba jornalista sira, iha kna’ar fatin komandu Caicoli, Kinta (28/04/2022).

Razaun PNTL halo apreensaun ba evidénsia sira ne’e tanba, dokumentu sira transporte nian la kompletu, balu totalmente laiha dokumentu, no inklui motorista balu mós deteta katak, laiha karta kondusaun. 

Orientasaun sira kona-bá operasaun ida ne’e, la’ós hala’o de’it hosi Eskuadra PNTL Kristu Rei, maibé mós ba iha Eskuadra Vera Krús, Na’in-Feto  ho Dom Aleixo, hodi nune’e bele halo pasa iha tempu saida de’it, no evita mós krime iha kapitál Díli.

Komandante Henrique mós kontinua fó orientasaun ba komandante eskuadra no Seksaun ho Sub-seksaun sira, atu kontinua haforsa operasaun hodi evita konflitu, liu-liu buka tuir nafatin autór sira ne’ebé halo voice ho informasaun kro’at ne’ebé viral loos iha sosiál média  (SosMed).

Jornalista: Rogério Pereira Cárceres