Hatutan.com, (05 Maiu 2022), Díli—Ministériu Transporte no Komunikasaun (MTK), Ministériu Petróleu no Minerais (MPM), ho Ministériu Agrikultura no Peska (MAP), sei distribui kupón mina nian ba kondutór sira transporte públiku, atu lori kupón ka voucher ne’e, ba enxe direta mina iha sentru kombustível sira ne’ebé governu identifika hamutuk 59 iha territóriu Timor-Leste.

Mikrolete 05 konsentra hamutuk iha Merkadu Lama hodi halo greve, Tersa (26/04/2022). Foto/Facebook.

Diretór Jerál MTK, Gaspár de Araújo hateten governu deside ona liu hosi dekretu lei númeru 18/2022, hodi fó biban ba ministériu tolu ne’e, atu bele organiza no hamosu diploma ministeriál tolu, atu bele distribui voucher kombustível ba operadór transporte sira.

Lee Mós: Benefisiáriu Sei Lori Voucher Enxe Kombustível Subsídiu iha Postu Abastesimentu 59

Daudaun ne’e MTK  rejista ona transporte públiku hamutuk 3.871 iha territóriu TL, la inklui transporte sira iha Rejiaun Administrativa Espesiál Oecusse Ambeno (RAEOA). Hosi transporte Áereo nian, iha aviaun rua no transporte marítima iha roo rua.

Hosi totál transporte públiku 3.871, bainhira sura hosi REAOA nian, maizumenus bele atinje 4.000 ne’ebé mak sei hetan kupón ka voucher kombustível.

“Ita foti desizaun katak mina ne’ebé folin liu, nia base line mak iha Dezembru tinan kotuk. Depois nia presu ne’ebé liu, ita sei selu liu. Ezemplu, iha Dezembru, folin mina ne’e $1,08 sentavu no agora sa’e. Ne’ebé másimu atu hetan maka litru 20 kada loron ba veíkulu ida vezes loron 90,” Gaspár de Araújo hateten ba jornalista sira iha kampus UNITÁL, Becora, Kinta (05/05/2022).

Diploma ministérial ida-ne’e, publika ona iha jornál repúblika no tama iha vigór durante fulan-tolu de’it, hahú hosi loron 01 Maiu to’o Juñu to’o 31 Jullu 2022. Maibé desizaun atu kontinua ka la’e, depende ba governu.

Iha dekretu lei ne’e define katak, Ministériu Petróleu no Minerais (MPM) define kona-bá folin kombustível.

Ministériu Transporte no Komunikasaun (MTK) ho Ministériu Agrikultura no Peska (MAP) haree kona-bá distribuisaun subsídiu kupón ba kombustível kada loron, transporte públiku hira mak atu enxe uluk mina iha sentru kombustível sira.

“Ne’e mak ami deside ona diploma sai tán tiha ona. Agora la’ós fó subsídiu ba ema ka kondutór, maibé bá transporte públiku sira hanesan, mikrolete, taxi, angguna, bus ho travel. Ne’ebé, ami define ona balun gazoel, balun gazolina depende nia distánsia. Ezemplu, bus sira hetan barak liu, hetan ki’ik liu maka mikrolete,” Gaspár esplika.

Mekanizmu distribuisaun subsídiu kupón ba kombustível nian, diretór jerál MTK ne’e informa, iha kuarta 04 Maiu, ministériu tolu ne’e, forma ona ekipa finansa nian ida atu halo distribuisaun voucher kombustível nian.

Maibé, téknikamente ekipa liuhosi Diresaun Nasionál Transporte Terrestre (DNTT) mak

distribui kupon sira ne’e iha munisipiu hotu no iha Dili sei define fatin rua ka tolu, nune’e bele fahe voucher ba sira ne’e.

“Entrada iha vigór 01 de Maiu, maibé semana oin foin komesa distribui señas. Neste momentu, ekipa sei servisu maka’as hela hodi halo preparasaun, no hein katak Segunda ita bele komesa fahe voucher ne’e,” Gaspár informa.

Hafoin enxe mina ba transporte, voucher ka kupón kombustível ne’ebé entrega ba postu abastesimentu kombustível ne’ebé fornese ona mina, sei lori fali kupón hirak ba entrega iha ministériu hodi halo pagamentu.

Lee Mós: Mikrolete Greve, DNTT Mantein Tarifa $0.15-$0.25

Jornalista: Rogério Pereira Cárceres