Hatutan.com, (16 Maiu 2022), Díli-Governu Austrália liuhosi United Nations Department Safety and Security (UNDSS) iha Timor-Leste, Segunda (16/05/2022), apoia tán repeater lima (5) bá Komandu Jerál Polísia Nasionál Timor-Leste (PNTL) hodi fasilita PNTL sira-nia servisu ho rádiu komunikasaun.

Governu Austrália liuhosi United Nations Department Safety and Security (UNDSS) iha Timor-Leste apoia tán repeater lima (5) bá PNTL. Foto/Hatutan.com

Repeater nu’udár instrumentu eletróniku ne’ebé importante tebes bá rádiu PNTL nian hodi bele iha komunikasaun ida efetivu entre membru sira. Bainhira laiha repeater maka rádiu sira mós labele funsiona.

Xefe UNDSS iha Timor-Leste, Victor Shuckats hateten, ekipamentu repeater ne’ebé, sira entrega bá PNTL tanba sira hatene katak, membru PNTL presiza duni hodi utiliza bá sira-nia servisu komunikasaun loroloron.

Ekipamentu sira ne’e, sei entrega ba PNTL mak sai ona na’in no sei instala iha fatin ne’ebé de’it, tuir polítika komandu PNTL nian. Ekipamentu ne’e, sosa dezde misaun United Nations (UN) nian iha TL, ho valór orsamentu ne’ebé boot. Maibé, ekipamentu eletróniku ne’e, sei iha kondisaun ne’ebé di’ak.

Advertisement

“Hanesan ita boot sira hatete katak, PNTL ne’e hanesan ami nia parseiru servisu nian, no ami hatene katak, PNTL presiza tebes ekipamentu ne’e. Ekipamentu sira ne’e, hosi UN nian, no ami la uza ona, no ekipamentu sira ne’e sei funsiona no sira bele utiliza ba apoiu sira ninia servisu,” Xefe UNDSS iha Timor-Leste, Victor Shuckats, hateten ba jornalista sira iha hafoin serimónia entrega repeater lima ne’e iha Kuartél Jerál PNTL, Caicoli, Díli.

Xefe UNDSS iha Timor-Leste, Victor Shuckats. Foto/Hatutan.com

Komandante Jerál PNTL, Komisáriu Faustino da Costa, agradese bá UNDSS nia apoiu sira, tanba liuhosi asaun ne’e, bele tulun liután membru sira, hodi bele hala’o servisu ho di’ak liután, liu-liu fasilita atualiza informasaun hosi komandu munisípiu 12 ho Rejiaun Administrativa Espesiál Oé-Cusse Ambeno (RAEOA) mai iha Komandu Jerál PNTL.

“Serimónia ida ne’e, hosi UNDSS TL oferese ekipamentu ne’ebé mak ita-boot sira akompaña, ida-ne’e repeater para ita atu monta ba iha torre ne’ebé mak iha. Entaun, lori komandu PNTL nia naran, agradese ba sira. Sasán sira ne’e, sé PNTL  mak hola de’it mós, nia iha kustu ida ne’ebé mak boot kuaze $100,000,” Komisáriu Faustino da Costa.

Durante ne’e, PNTL sempre enfrenta problema iha liña komunikasaun, tanba repeater ne’ebé durante uza, ladún funsiona ho di’ak, no balu mak avaria ona. Bainhira ekipamentu repeater laiha, susar atu membru sira halo komunikasaun liuhosi rádiu.

Repeater hamutuk lima ne’e, inklui mós ninia asesór sira, ba komandu PNTL hodi bele konstrui ona ninia torre. Bainhira torre sira harii ona, ekipa sira sei halo kedan ona instalasaun ba repeater sira, nune’e bele kobre ba servisu sira komandu PNTL nian iha territóriu timor laran tomak.

Iha 2021, komandu PNTL konstrui ona torre rua, ida iha RAEOA, no ida iha kapitál Dili. Tuir planu, iha 2022 ne’e, sei konstrui torre ida tán torre ida  iha Oé-Cusse, 1 iha Bobonaro, Likisá 1 (Kutulau), no iha Ataúro iha torre 2. Alende ne’e, komandu PNTL halo mós manutensaun bá torre 1 iha Lautem.

Advertisement

Jornalista: Rogério Pereira Cárceres

Advertisement