Hatutan.com, (14 Maiu 2022), Díli-Ekipa konjunta kompostu hosi Polísia Nasionál Timor-Leste (PNTL) ho FALINTIL-Forsa Defeza Timor-Leste (F-FDTL), Sábadu (14/05/2022), hahú halo simulasaun hodi prepara bá simu bainaka importante sira ne’ebé mai Timor liuhusi Aeroportu Internasionál Prezidente Nicolau Lobato, Comoro, Díli.

Membru F-FDTL ho PNTL sira halo simulasaun bá eskolata bainaka VVIP ho VIP sira durante estadia iha Dili partisipa iha festa 19 to’o 20 Maiu 2022. Foto/Hatutan.com

Bainaka importante husi estranjeiru sira-ne’e mai TL atu partisipa iha serimónia tomada de pose bá Prezidente Repúblika (PR) eleitu, José Manuel Ramos-Horta bá Prezidente Repúblika períodu 2022-2027, no mós komemorasaun aniversáriu Restaurasaun Independénsia Repúblika Demokrátika Timor-Leste (RDTL) bá dala-XX, iha Tasi-tolu, Díli.

Komandante Unidade Espesiál Polísia (UEP), Superintendente Xefe Orlando Gomes hateten, simulasaun  ne’e hodi prepara bá simu bainaka importante sira hosi nasaun li’ur, hanesan Xefe Estadu ho Xefe Governu sira, inklui sira nia enkarregadu ne’ebé mai atu partisipa iha serimónia importante no istóriku Timor Leste nian iha 19-20 Maiu 2022.

Membru  UEP sira liuhosi Korpu  Seguransa Pesoál (CSP, sigla portugés)  maioria treinadu hotu. Maibé tanba serimónia importante rua ne’e, nu’udár serimónia nasionál, no bainaka hosi nasaun li’ur barak mak partisipa, nune’e maka membru sira presiza intensifika liután iha treinamentu hodi mentalize no hasa’e kapasidade membru sira ninian.

Advertisement

“Ita tenke halo treinu fila-fali para atu nune’e, sira bele halo sira-nia servisu eskolta nian, movimentu lori ita-nia bainaka importante di’ak no ho rekijitu  internasionál nian ne’ebé maka, horiseik, ita iha komandu UEP, kuaze membru sira ne’e, ita halo formasaun, treinamentu fila-fali ba sira,” Superintendente Xefe Polísia, Orlando Gomes, hateten bá jornalista sira, hafoin akompaña atividade simulasaun hosi membru PNTL ho F-FDTL sira  ne’e.

Preparasaun komandu PNTL nian, liuhosi EUP  bá ninia efetivu sira ne’e, depende ba númeru hosi bainaka sira ne’ebé mak atu mai. Maibé téknikamente, UEP preparadu hodi koloka membru sira bá halo eskolta.

Tuir planu, bainhira bainaka sira ne’e ho aviaun tun iha Aeroportu, Unidade Tránzitu sira hosi Polísia Militár ho PNTL ninian mak destakadu ho motorizada, halo kedan akompañamentu no komboiu ho motór bá to’o iha Otél sira ne’ebé Governu prepara ona nu’udár fatin ba deskansa.

To’o iha otél sira, membru PNTL liuhosi Unidade Espesiál Polísia (UEP) ho CSP  sira mak sei asegura to’o bainaka sira ne’e fila hosi Timor-Leste ba sira nia rai.

Membru PNTL husi Unidade Tranzitu halo simulasuan simu bainaka bá selebrasuan 19 to’o 20 Maiu 2022. Foto/Hatutan.com

Iha preparasaun téknika seguransa nian entre Komandu PNTL ho F-FDTL, hamutuk ho ekipa sira komisaun organizadora bá eventu nasionál rua ne’e, F-FDTL liuhosi Polisia Militár (PM), mak responsabiliza eskolta ba bainaka sira ne’ebé ho kualidade nu’udár Xefe Estadu sira, no Xefe Governu sira, no ho  nia reprezentante sira sei eskolta hosi PNTL.

Durante atividade simulasaun ne’e, akompaña mós hosi ekipa sira komisaun organizadora nian ba selebrasaun festa aniversáriu tinan 20 Restaurasaun Independénsia TL, ho mós reprezentante hosi Sekretária Estadu Arte no Kultura (SEAK), ne’ebé reprezenta hosi Eugénio Sarmento.

Advertisement

Jornalista: Rogério Pereira Cárceres

Advertisement