Hatutan.com (16 Maiu 2022), Díli—Tribunál Distritál Díli (TDD) iha Segunda 16 fulan ne’e kontinua hala’o julgamentu ba krime burla agravadu ne’ebé deskonfia involve jerente kompañia BROTHER HOOD arguidu Mario Freitas relasiona ho projetu pakote referendum hosi Ministériu Agrikultura no Peska (MAP) hodi halo konstrusaun ba morru iha Baucau-Villa ne’ebé ikus mai fó prejuizu ba lezadu José Manuel dos Reis nu’udár diretór kompañia UNIPAZPRO Lda.

Iha julgamentu kontinuasaun ne’e, liu hosi juiz kolektivu Argentino Luisa Nunes, José Gonçalves, Alvaro Freitas, esplika bazeia ba arguidu no lezadu nia deklarasaun, seidauk sufisiente hodi sai produsaun de provas ba Tribunál bainhira foti desizaun.

Lee Mós: Kazu Brother Hood-Unipazpro, Eis Tezoreira AECCOP Selu Tuir Orientasaun

Tanba ne’e, Tribunál sei presiza dokumentus balun hosi instituisaun Estadu ne’ebé oferese projetu refere.

Tribunál deside halo pedidu ho prazu loron 10 ba Ministru Agrikultura no Peskas atu fó dokumentus balun relasiona ho projetu refere no depois de simu dokumentu hirak ne’e maka foin bele halo alegasaun ba arguidu.

Tanba ne’e, Tribunál adi’a hikas julgamentu ba loron 31 fulan ne’e, hodi rona alegasaun hosi Ministériu Públiku (MP) ne’ebé reprezenta hosi Prokuradór Renato Berenahak.

Antes ne’e, tuir akuzasaun hosi Ministériu Públiku (MP) katak iha loron 23 fulan-Setembru 2009, Ministériu Agrikultura no Peska hala’o enkontru ho emprezáriu hosi Munisípiu 13 hodi ko’alia kona-bá “Pakote Referendum”, ne’ebé deside katak projetu ne’ebé atu halo tenke termina iha fulan-tolu nia laran, maibé bele prolonga bainhira obra ne’e atinje ona 50% ka 80%, bainhira la kumpre maka Governu sei la fó tán lisensa.

lha enkontru deside mós bele iha kompañia rua hamutuk hodi kaer obra ne’e, maibé tenke halo akordu konjunta antes hahú asina kontratu no vistu hosi Koordenadór Munisípiu, tanba ne’e, iha loron 23 fulan-Setembru 2009, lezadu ho nia kompañia UNIPAZPRO hamutuk ho arguidu hanesan jerente hosi kompañia BROTHER HOOD Lda ho diretór kompañia Nelson Belo asina akordu hodi halo projetu ne’e.

Iha loron 4 fulan-Outubru 2009 lezadu hamutuk ho arguidu halo enkontru ida ho koordenadór Munisípiu Baucau, Abrão Gabriel dos Santos Oliveira, hodi ko’alia kona-bá osan adiantamentu 20% ho nia valor $27,159.60, tanba ne’e sira dezloka kedan ba fatin konstrusaun hodi hasoru malu ho badaen Mateus da Silva Correia hodi halo kontratu traballu no selu badaen ho valor osan $5.000.00 no termina iha periods fulan-tolu nia-laran.

Iha loron 19 fulan-Outubru 2009, liuhosi loja Toko Lay fornese materiál konstrusaun ho valór $27,000, maibé iha loron iha loron 30 fulan-Outubru tinan 2009 arguidu halo pedidu ba iha AECCOP sem koñesimentu hosi lezadu, koordenadór Munisípiu hodi halo falsifikasaun hodi hetan $135.000.

Iha loron 3 fulan-Novembru 2009, lezadu haree projetu ne’ebé sira halo, maibé bada’e sira informa katak labele halo obra, tanba material laiha, ho nune’e, nia mai husu iha Toko Lay atu fornese material, maibé sira hatán dehan, arguidu mai foti ona osan 15% ne’ebé iha ho valor $12.697.30 hodi fó informasaun falsu katak arguidu maka diretór ba kompañia Brodher Hood, maibé diretór loloos kompañia maka Nelson Francisco Assis Belo.

Arguido mós halo falsifikasaun kona-bá relatóriu halo obra liu hosi pedidu ba iha Sekretáriu Estadu Agricultura, Marcos da Cruz hodi informa katak obra ne’e termina ona hodi husu pagamentu, maibé realidade obra sidauk termina ho nune’e koordenadór Pakote Referendu Munisípiu Baucau Abrão de Oliveira lakohi asina.

Ho arguidu nia hahalok ne’e, lezadu simu informasaun hosi José Coelho katak loos dunik arguidu falsifika dokumentu hodi ba foti xeke iha AECCOP hodi ba foti osan iha Banku sem koñesimentu hosi Iezadu no mós koordenadór Pakote Referendu Munisípiu Baucau.

Konsekuénsia hosi arguidu nia hahalok fó prejuizu ba lezadu ho montante $53.322,80, tanba ne’e MP akuza arguidu ba pratika krime burla agravadu ne’ebé previstu iha artigu 267 hosi kódigu penal TL.

Hafoin rona arguido ho lezadu, juiz prezide adia hikas julgamentu ba loron seluk hodi kontinua rona lezadu no sasin sira.

Audiénsia julgamentu prezide hosi juiz koletivu, Argentino Luisa Nunes, José Gonçalves, Alvaro Freitas, MP reprezenta hosi Prokuradór Reinato Berenahak no arguidu hetan asisténsia legál hosi Defensór Públiku Manuel Sarmento.

Jornalista: Carmelita Isaac