Hatutan.com, (19 Maiu 2022), Díli—Oras-ne’e daudaun Komandu PNTL hatún ona membru efetivu hamutuk 1.800 iha terrenu, hodi asegura serimónia investidura ba Prezidente Repúblika (PR) eleitu, José Manuel Ramos Horta, iha Tasi-tolu, Díli.

Membru PNTL hala’o seguransa ba ekipa konjunta ne’ebé ezekuta mandadu Tribunál Distritál Díli nian iha Ai-mutin, Díli (10/02/2022). Foto/PNTL.

“Planu operasaun konjunta liu hosi komandante operasaun koloka membru ne’ebé apoia hahú ohin kalan to’o aban,” Segundu Komandante PNTL Komandu Munisipiu Díli, Superintendente Polísia, João Sancho hateten ba jornalista sira iha kna’ar fatin Komandu Caicoli, Kinta (19/05/2022).

Lee Mós: Kompañia Jonize Rehabilita Estrada Kuaze Metru 680 Hosi Tasi-Tolu To’o Raikotu

Efetivu hirak ne’ebé komandu PNTL hatún, mai hosi unidade sira mak hanesan Unidade Espesiál Polísia (UEP), ho kompañia Corpo Segurança Pessoal (CSP), Unidade Patrullamentu Fronteira (UPF), Unidade Polisia Marítima (UPM), Kuartél Jerál PNTL, Unidade Polísia Tránzitu, inklui Komandu Munisípiu Díli rasik.

Advertisement

Membru sira-ne’e, hosi parte UEP ninian, balun mak komandu PNTL koloka ona ba fó seguransa ka halo eskolta ba iha VVIP ho VIP sira, Unidade Tránzitu Munisipiu Dili ho nasionál nian, akompaña bainka sira ba iha Otél ne’ebé sira deskansa bá, membru balun destaka ona iha estrada públiku sira, Forsa Rezerva sira halo operasaun movimentu hale’u kapitál Dili, no balun mak destakadu iha fatin serimónia iha investidura iha Tasi-tolu, Dili.

Komandante João hateten, atu asegura serimónia importante rua ne’e la’o ho hakmatek, la’ós de’it membru PNTL ho FALINTIL Forsa Defeza Timor-Leste (F-FDTL) sira mesak, maibé presiza entidade sira hotu-hotu ninia apoiu ba malu, nune’e eventu ne’e bele realiza ho di’ak to’o ninia rohan.

Blokeia Dalan ba Palásiu Prezidente Bairru-Pité

Iha festa aniversáriu ba Restaurasaun Independénsia RDTL ba dala-XX, 20 Maiu 2022, PNTL liuhosi Unidade Tránzitu Munisipiu Dili ho Nasionál, sei blokeia totál dalan ka estrada diresaun mikrolete 03 ho 10 nian, tanba serimónia ne’e sei realiza iha resintu Palásiu Prezidente Repúblika, Bairru-Pité.

Hanesan baibain, bainhira mikrolete 03 ho 10 hosi Comoro nian, sei tun liuhosi dalan ba Kampung Alór área Tasi-ibun.

Advertisement

Alende ne’e, movimentasaun transporte sira hosi área Becora ho Bidau nian sei haruka liuhosi dalan Palápasiu nian, hodi tun ba área tasi.

Transporte sira ne’ebé liuhosi área Bairru-Pité atu ba kapitál karik, tenke tuir nafatin dalan normál, mai liuhosi Bebobra, Colmera, nune’e labele hamosu engrafamentu ba movimentasaun transporte sira, durante seremónia nasionál ne’e.

“Ida ne’e mak presiza informa ba públiku, nomós komunidade iha kapitál Dili ida ne’e, hodi nune’e ita hotu akompaña, no halo tuir, no husu ba ita nia autoridade seguransa ne’ebé mak destakadu iha estrada públiku sira, hodi nune’e orienta no fasilita ita hodi partisipa iha seremónia importe rua ida ne’e,” Portavós Komandu jerál PNTL, Superintendente Xefe Polisia, Armando Monteiro, hateten liuhosi konferénsia imprénsa, Kuarta (18/05/2022).

Jornalista: Rogério Pereira Cárceres

Advertisement