Hatutan.com, (20 Marsu 2023), Díli—Komandu Polísia Nasionál Timor-Leste (PNTL), liuhosi Unidade Espesiál Polísia (UEP), planeia ona atu iha Eleisaun Parlamentár, Domingu 21 maiu 2023 destaka membru iha sentru votasaun sira ne’ebé konsidera iha poténsia bá konflitu.

Unidades Espesial Polisia (UEP) liu husi Seksaun Comando Operasaun Espesial (COE) hala’o treinamentu kona-bá Armas (21/10/2021). Foto/PNTL.

Komandante Unidade Espesial Polisia (UEP), Superintendente Xefe Polísia, Orlando Gomes atualiza katak, preparasaun bá kampaña no mós eleisaun Parlamentár, Unidade Espesial Polisia, primeiru halo ona treinamentu bá membru tomak.

Lee Mós: Previzaun Bá Eleisaun Parlamentár iha Maiu 2023

Preprasaun sira ne’e mak hanesan, treinamentu fíziku ho tékniku nune’e bele iha preparasaun di’ak hodi apoia seguransa iha kampaña no eleisaun nian.

Advertisement

“Ita preparadu. Maibé, planu espesifiku bá Unidade Espesial nian atu destaka ne’e haree loos bá fatin ne’ebé ita konsidera risku. Ida-ne’e mak ita bele apoia bá munisípiu sira,” Superintendente Xefe Orlando Gomes hateten iha Kuartél Jerál PNTL Caicoli, Díli, Segunda (20/03/2023).

UEP mós hein hela diretiva sira kona-bá operasaun nasionál nian hosi komandu PNTL. Bainhira diretiva ne’e sira simu ona maka Unidade Espesiál Polisia sei dezeña fali sira-ninia planu espesífiku ida oinsá koloka ninia membru sira bá iha terrenu, tuir risku.

“Ita bele fornese seguransa bá atividade sira ne’e tomak, durante kampaña nomós bá iha eleisaun tanba ita nia membru sufisiente,” Komandante Orlando Gomes hateten.

PNTL liuhosi Unidade Espesiál Polisia iha ninia planu própriu, halo treinamentu bá membru Corpo Segurança Pessoal Sira (CSP), Batallaun Ordém Públika, bá Kompañia Operasoens Espesiais.

Iha Sub-Unidade tolu ne’e, durante fulan ida sira fó treinamentu ona bá membru sira, atu prepara an apoia seguransa tantu órden públiku nomós bá fatin sira ne’ebé mak sira atu bá halo kampaña no eleisaun.

Advertisement

Kona-bá ekipamentus UEP nian sufisiente hela, tanba durante ne’e mós sempre hetan apoiu hosi komandu jerál PNTL, hosi parseiru sira, hodi fasilita membru sira halo servisu.

Maibé, UEP mós sei presiza tán ekipamentu sira balun atu apoia liután, liu-liu hodi mellora di’ak empeñamentu servisu iha terrenu.

Bainhira iha terrenu ona mak krime ruma mosu, UEP sei atua ho mekanizu ho sira legál nian ka tuir Lei no labele sees hosi lei.

Jornalista: Rogério Pereira Cárceres

Advertisement