Hatutan.com, (27 Juñu 2023), Díli-Komandu Polísia Nasionál Timor-Leste (PNTL) partilla situasaun sira kona-bá seguransa Timor-Leste nian bá adidu  seguransa sira hosi embaixada no korpu diplomátiku sira ne’ebé hala’o misaun diplomata nian iha Timor-Leste.

Komandante Operasaun Nasionál PNTL, Superintendente Xefe Polísia José Soares. Foto/Rogério Pereira Cárceres

Liuhosi sorumutuk ne’ebé iha Kuartél Jerál PNTL, Tersa (27/6/2023),  ho tema “Sharing Security Briefing” ne’e marka prezensa mós reprezentante sira hosi Adidu Seguransa Repúblika Indonézia nian, Xina, Austrália, Cuba, Filipina, Estadus Unidus, inklui  United Nations Development Program (UNDP), UNDSS, no Programa Dezenvolvimentu Polisia Timor-Leste ka Timor-Leste Police Development Program (TLPDP).

“Enkontru ne’e  atu ami  partilla informasaun bá adidu sira kona-bá seguransa iha territóriu Timor-Leste, nune’e, sira iha obrigasaun atu hatene kona-bá sira-nia prezensa iha Timor,” Komandante Operasaun Nasionál PNTL, Superintendente Xefe Polísia José Soares hateten bá jornalista sira.

“Ita koalia kona-bá seguransa iha territóriu timor-leste, antes de eleisaun, nune’e eleisaun, iha dadus, komparasaun tinan hirak bá kotuk, ho tinan ida ne’e, iha eleisaun ninian, ita mós atualiza kona-bá estatistiku kríme, iha territóriu timor laran, bá ita-nia maluk sira, nune’e mós estatistiku tránzitu ninian. Krime ne’ebé mak aas iha Timor, ida maka violénsia domestika, ho asalta malu,” Komandante José Soares informa.

Komandante operasaun nasionál PNTL nian ne’e dehan, durante asiste no aprezentasaun sira kona-bá situasaun seguransa mak oras ne’e iha rai-laran, parte komandu hetan apresiasaun hosi reprezenta adidu sira, no balu fó hanoin bá PNTL, atu oinsá mak bele mellora ninia atendimentu bá públiku.

Iha mós komentáriu balu negativu ne’ebé mak kabe bá iha kompeténsia PNTL nian. Maibé, iha asuntu balu ne’ebé la’ós kabe bá iha kompeténsia PNTL nian, sira tenke koordena ho diresaun sira seluk atu oinsá bele fasilita atendimentu bá públiku di’ak liután.

Seguransa bá Seremónia Posse Membru IX Governu Konstitusional

Hatán kona-bá preprasaun PNTL nian hodi fó seguransa bá seremónia tomada-de-posse bá Membru Governu da-sia (9) nian atu halo iha loron 01 fulan-Jullu 2023, komandante José Soares dehan, preparativus bá seremónia ida ne’e parte kompetente mak hato’o.

Ida ne’e kabe bá iha prezidénsia repúblika ninian, maibé, intermu seguransa nian, hosi komandu PNTL nia parte halo ona mós enkontru koordenasaun ho Prezidénsia Repúblika, sira prepara ona planu seguransa, no distribui hotu ona bá komandante sira.

Jornalista: Rogério Pereira Cárceres