Hatutan.com, (26 Maiu 2022), Díli-Dezde tinan 2005 to’o 2022 ne’e, Ajensia bá Promosaun Investimentu no Esportasaun ka TradeInvest Timor-Leste rejista investor hamutuk 290 mak halo atividade investimentu iha Timor-Leste.

Investimentu no Konstusaun DFBC iha rai ho uma Estadu ne’ebé hamosu disputa entre SAPT ho ENSUL MECI. Foto/Hatutan.com

Husi númeru investor ne’e, fahe bá kategoria rua mak hanesan investor nasionál iha 60 no investor internasionál hamutuk 230. Hirak-ne’e hotu hetan  atribuisaun sertifikadu investor, deklarasaun benefísiu no akordu espesiál hodi halo sira-nia investimentu iha área agrikultura, turizmu no indústria.

Dadus Servisu Rejistu no Verifikasaun Emprezariál (SERVE) nian hatudu katak to’o oras ne’e  kompaña sira ne’ebé rejista tuir tuir lei sosiedade komersiál 30,000 liu.

Rekizitu ne’ebé iha tenke tuir lei investimentu15/2017 23 de Agostu ho kapitál mínimu $500.000 hodi konfirma investimentu liu husi sertifikadu investor ka asina akordu espesiál, nune’e bele hetan asesu ba rai no propriedade Estadu.

“Investor ne’ebé hetan ona asesu ba akordu espesiál ho Governu hodi halo investimentu iha Timor-Leste to’o agora seidauk to’o 10, tanba bainhira atu halo akordu investimentu sei liu husi prosesu naruk no sei hetan aprovasaun iha Konsellu Ministru, maske nune’e ami konsege hasai ona deklarasaun benefísiu bá kompañia Nasionál tolu maka hanesan kompañia Conve iha Lospalos, Santalun iha Maliana no ida tan ha’u la lembra ho objetivu atribuisaun ne’e atu prodús na’an manu iha ita nia rain no sira konsege prodús lubuk ida hodi fornese bá programa sesta bázika,”  Diretór Ezekutivu TradeInvest, Arcanjo da Silva hateten bá jornalista sira hafoin partisipa  semináriu advokasia diálogu tékniku entre setor públiku ho exportadores iha Hotel Timor, Díli, Kinta (26/05/2022).

Investor ne’ebé halo ona akordu investimentu iha Timor-Leste maioria implementa ona hanesan Pelican Paradise ne’ebé daudaun komesa halo tetuk fatin refere hodi konstrui otél no konsege rekruta ona traballadór timoroan.

Tuir Lei investimentu númeru 15/2017 23 fulan-Agostu hateten ba investor ne’ebé asina ona akordu investimentu ho Governu, maibé durante tinan ida la halo konstrusaun ka inisia  investimentu maka Governu iha devér atu anula  akordu refere.

Jornalista: Carmelita Isaac