Hatutan.com (31 Maiu 2022), Díli—Governu Timor-Leste ne’ebé reprezenta hosi Comissão Interministeriál  kompostu hosi Ministério do Plano e Ordenamento (MPO), Ministério das Finanças (MF), Ministério Coordenadór dos Assuntos Económicos (MCAE) no Ministério do Transporte e Comunicações  (MTC) asina kontratu akizasaun no instalasaun ho kompañia Alcatel Submarine Network (ASN) kona-bá projetu Kabu Submariñu Fibra Óptika.

Governu reprezenta hosi Comissão Interministeriál kompostu hosi Ministério do Plano e Ordenamento (MPO), Ministério das Finanças (MF), Ministério Coordenadór dos Assuntos Económicos (MCAE) no Ministério do Transporte e Comunicações (MTC) asina kontratu akizasaun no instalasaun ho kompañia Alcatel Submarine Network (ASN) kona-bá projetu Kabu Submariñu Fibra Óptika, Tersa (31/05/2022).

Primeiru Ministru (PM) Taur Matan Ruak sai sasin ba kontratu ne’ebé asina direitamente hosi Ministro Plano e Ordenamento José Reis, Ministru das Finanças, Rui Gomes, Ministru Coordenador dos Assuntos Económicos no Ministru do Transporte e Comunicações José Agostinho ho reprezentante kompañia ASN, Marc Geno.

Lee Mós: Implementasaun Fibra Óptika, Governu Analiza Hela Dokumentu Hosi Empreza Haat  

Asinatura kontratu ne’e objetivu prinsipál atu hasa’e velosidade internet, halo redusaun ba folin internet liu-liu sei fasilita servisu Governu ho Eletróniku “E-Government” ne’ebé di’ak liu.

“Asina kontratu ba akizasaun no instalasaun ba ligasaun projetu liu hosi kabu submariñu Fibra Óptika ne’ebé mai hosi sidade Darwin, Irlándia no ohin marka istória ba projetu ne’ebe komesa dezenvolve iha tinan 2015 mai hosi programa no objetivu hosi VIII Governu hodi fornese internet ho kualidade ne’ebé as ba Timoroan hotu ho rápida no estabilidade,” Taur Matan-Ruak hateten iha diskursu, iha Palásiu Governu Tersa (31/05/2022).

Ministru Coordenador dos Assuntos Económicos no Ministru do Transporte e Comunicações, José Agostinho hateten pontu importante hosi kontratu ne’e atu rezolve problema komún ne’ebé daudaun ema hotu enfrenta relasiona ho velosidade internet ne’ebé lentu ho kustu ne’ebé karun.

“Situasaun jerál ne’ebé durante ne’e hasoru maka maske iha operadór telekomunikasaun tolu maibé velosidade internet lentu. Tanba ne’e, ohin loron importante ba Governu liu-liu iha seitór telekomunikasaun ne’ebé hakat tán pasu ida hodi sai solusaun ba problema komun ne’ebé iha. Tanba ne’e depois de asina kontratu ne’e ba oin kompañia mak sei responsabiliza oinsa Kabu ne’e bele mai Timor,” José Agostinho hateten.

Iha prosesu instalasaun ne’e rasik sei enfrenta obstaklu barak liu-liu iha tasi laran, maibé kompañia rasik iha maneira oinsa atu asegura Kabu ne’e karik hakoi fiu iha tasi okos.

Kontratu akizasaun no instalasaun ba projetu Kabu Submariñu Fibra Óptika ho durasaun fulan 19 ne’ebé sei hahú iha loron 01 Jullu 2022 no finaliza iha 31 Janeiru 2024 ho totál orsamentu millaun $39, maibé tinan primeiru prevee uluk millaun $9.6 ho karaktér multi annuál.

Investimentu ba Projetu ne’e hahú ho Option Agreement iha tinan 2017 hodi halo estudu Front-End Engineering Design (FEED).

Estudu refere finaliza iha tinan 2019 no hetan aprovasaun hosi Governo Timor-Leste nune’e lansa projetu ne’e ba públiku iha tinan 2020 no mós prosesu aprovizionamentu konklui iha 2022.

Investimentu ba Projetu Fibra Óptika 100% finansia hosi Governu Timor-Leste, Maibé projetu ne’e mós bele realiza tanba hetan apoiu finansiamentu “grand funding” hosi Governu Austrália liu hosi empreza VOCUS hodi prepara estudu FEED.

Tanba ne’e, Governu Austrália iha kompromisu atu fó apoiu nafatin ba iha prosesu implementasaun tuir mai hanesan Dezeñu ba Cabo Aterragem CLS.

Governu Liberaliza Seitór Fibra Óptika ba Kompañia Haat

Governu reprezenta hosi Comissão Interministeriál kompostu hosi Ministério do Plano e Ordenamento (MPO), Ministério das Finanças (MF), Ministério Coordenadór dos Assuntos Económicos (MCAE) no Ministério do Transporte e Comunicações (MTC) asina kontratu akizasaun no instalasaun ho kompañia Alcatel Submarine Network (ASN) kona-bá projetu Kabu Submariñu Fibra Óptika, Tersa (31/05/2022).

Governu mós liberaliza seitór vibra Óptika ba seitór privadu ka kompañia haat kompostu hosi kompañia Metrolink, Morakalindo, Sakomtel no Telkomsel.

Daudaun ne’e sei iha prosesu aprosimasaun ba dokumentu balun liu hosi Autoridade Nasional Komunikasaun (ANC) hodi haree rekezitus tékniku balun ne’ebé presiza kompleta.

“Governu mós liberaliza seitór vibra óptika ba seitór privadu ka kompañia haat ne’ebé hatama sira nia interese liu hosi proposta investimentu no momentu ne’eba ajenda iha Konsellu Ministru hodi hetan aprovasaun ba proposta investimentu hosi kompañia Metrolink, Morakalindo, Sakomtel no Telkomsel ne’ebé daudaun iha prosesu aprosimasaun ba dokumentu balun liu hosi ANC hodi haree rekezitu tekniku balun ne’ebé presiza kompleta,” Ministru Transporte e Comunicações, José Agostinho hateten.

Objetivu hosi liberalizasaun seitór Vibra Óptika ba seitór privadu haat ne’e hodi taka malu bainhira iha futuru Kabu Óptika hosi Governu nian iha problema balun maka kompañia seluk bele taka hodi kontinua asegura ninia kualidade.

Kritéria prinsipál ba seitór privadu sira maka tenki iha domíniu asesu públiku ne’ebé iha ligasaun ho autorizasaun hosi Ministériu Justisa (MJ), Diresaun Nasionál Transporte Maritima, inklui rai ne’ebé tenki iha lisensiamentu.

Jornalista: Carmelita Isaac