Hatutan.com, (30 Maiu 2022), Díli- Prezidente Repúblika, José Manuel Ramos-Horta parabéniza Dom Virgílio do Carmo da Silva, SDB ne’ebé Papa Francisco nomea bá membru foun koléjiu Kardeál nian.

Lee Mós : Papa Francisco Nomea Dom Virgílio Kardeál Dahuluk Uma Kreda Timor-Leste

Sua Eminénsia Kardeal Dom Vírgilio do Carmo da Silva, SDB, Arsebispu Arkedioseze Metropolitana Díli. Foto/Hatutan.com

PR José Ramos-Horta haksolok hafoin halo sorumutuk ho Arsebispu Metropolitana Arkidioseze Díli ne’e iha Camara Ekleziástika, Lecidere, Díli,  Segunda (30/05/2022).

Ramos-Horta  hateten, nia mai hasoru Arsebispu atu hato’o felisitasaun no fá parabéns bá povu no uma kreda Timor-Leste no fó obrigadu bá Santu Padre Papa Francisco ne’ebé nomea Arsebispu Díli bá estatutu Kardeál.

Xefe Estadu afirma Kardeál nu’udár prinsipe  bá igreja nune’e iha istoria uma kreda Katolika nian Kardeál sira importante tebes no estrutura Kardeál ne’e prestíjiu boot no iha estatutu tuir méritu ne’ebé Kardeál sira iha.

“Amu Arsebispu tamba nia matenek, simplisidade no umildade maka Amu Papa Francisco hili,” José Ramos-Horta haklaken.

Timor-Leste 98 porsentu katóliku entremu per kapita persentajen katólika iha mundu, Timor-Leste mak hanesan país ida ho populasaun maioria katóliku. Uma kreda katólika iha Timor-Leste halo ona tinan 500 no iha mundu uma kreda katóliku halo tinan 2000. Impériu bobot iha mundu hahú husi impériu romanu no sira seluk monu hotu no uniku Igreja katóliku mak hamriik metin.

“Estadu, Governu no parlamentu nasional sei kontinua parseria metin ho uma kreda no laiha ema ida bele nega papél uma kreda katóliku nian no mós relijiaun sira seluk,” Ramos-Horta afirma.

Lee Mós : Kardeál Nu’udár Prezente ba Povu no Sarani TL

Molok bá kumprimenta Arsebispu Arkidioseze Metropolitana Díli, PR Jose Ramos-Horta haksolok hasai ona komunikadu ida hodi hato’o nia sentimentu kontente bá desizaun husi Sua Santidade Papa ninia ne’e, hodi nomeia Dom Virgílio do Carmo da Silva, SDB nu’udár membru foun ida husi koléjiu Kardiál nian.

Pronunsiamentu ida-ne’e la’ós de’it lori prevelijiu ba Arsebispu Metropolitana Díli Sua Eminensia Don Virgílio do Carmo da Silva, SDB nu’udár pesoál, maibé mos nu’udár onra boot ida bá igreja katólika iha Timor Leste.

 “Prezidente Repúblika Jose Ramos Horta iha okaziaun barak sempre buka no hasae papél igreja katólika iha edukasaun, kultura, identidade no unidade nasional,” sita komunikadu ne’ebé Hatutan.com asesu.

Iha fatin hanesan, Xanselér Arkidioseze Metropolitana  Dili, Pe. Paulos Maia liu husi komunikadu bá imprensa hateten, Kreda Timor agradese ua’in tebes bá Maromak bá grasa boot ne’ebé Kreda Timor simu husi Maromak liu husi eskollamentu Amu Papa Francisco nian ba  Dom Virgílio do Carmo da Silva, SDB, nu’udár Kardeál foun bá igreja universal no Kardeál bá dahuluk bá Kreda Timor.

“Eskollamentu ida-ne’e fó sai rasik husi Amu Papa Francisco, iha Vatikanu iha Domingu (29/05/2022) iha Solenidade Ascenção do Senhor. Graça boot ida-ne’e nu’udár sinal katak Maromak besik tebes bá ita no hadomi tebes povu Timor, bá fidelidade tinan atus lima resin moris nu’udár sarani no nu’udár povu ida no rai ida ne’ebá hanaran-an Terra de Santa Cruz e Terra de Santa Maria,” Pe. Paulos Maia hateten.

Xanselér ne’e hatutan bá ema hotu nu’udár sarani, nu’udár fiar na’in no nu’udár lgreja agradese bá Maromak bá grasa boot ida-ne’e no tau matan didi’ak bá grasa ida-ne’e iha timoroan nia moris loron-loron ho  fidelidade bá Maromak.

“Ha’u sei hamutuk ho imi too mundu nia rohan (Mt. 28,20),” Nia hakotu.

Arsebispu Arkidioseze Metropolitana Dili, Dom Virgílio do Carmo da Silva, agradese bá felisitasaun husi Xefe Estadu no konsidera nomeasaun ne’e hanesan grasa no prémiu bá povu no sarani Timor-Leste ne’ebé foin selebra nia restaurasaun independénsia ba dala-20 (20 Maiu 2002-2022).

Jornalista: Vito Salvador